Read urhobo Joshua 23 Bible Online

Joshua 23 - urhobo bible

Joshua 23

¹Ọke krekri vwọ wan nu, rẹ Ọrovwohwo vwọ vwẹ urovwoma kẹ Izrẹl vwẹ oma rẹ ivwighrẹn re riariẹ ayen phihọ nu, yi Joshua ghworo ọ ke rha tọn hẹrẹhẹrẹ,

²Joshua de se Izrẹl ejobi, ekpako vẹ igbuyovwi rayen, iguẹdjọ vẹ inotu rayen, ọ da ta kẹ ayen, Me ghworo mi ki ji kri akpọ re,

³ovwan je mrẹ obo rẹ Ọrovwohwo Ọghẹnẹ wẹn ru kẹ ẹgborho nana ejobi na fiki ovwan, kidie Ọrovwohwo Ọghẹnẹ rẹ ovwan re họnre kẹ ovwan.

⁴Nighere, me ghare ẹgborho ri chekọ na utute kẹ erua rẹ ovwan re ọ dia ẹkẹn uku rẹ ovwan, vwọ ba ẹgborho ri mi bru kufia nure na, nẹ Jọdan re te Abadi Rode na vwẹ obuko ọnre.

⁵Ọrovwohwo Ọghẹnẹ che bi ayen phihọ obuko kẹ ovwan, ọ da djẹ ayen nẹ obaro rẹ ovwan; ku wa reyọ otọ rayen, kirobo rẹ Ọrovwohwo Ọghẹnẹ rẹ ovwan ve kẹ ovwan.

⁶Fiki rẹ ọtiọye na gba nabọ mudia gan re we ru emu ejobi re si phihọ evun rẹ urhi ri Mosis na, we kuoma rhẹriẹ no kpo obọrhe eyẹ obọhwẹre-e

⁷nẹ wa vẹ ẹgborho ri chekọ vwẹ ohri rẹ ovwan na gbe ọguagua kugbe-e, eyẹ we se odẹ rẹ edjọ raye-en, we se ayen duvwe-e, eye wọ ga aye-en, eye we diguẹ kẹ aye-en,

⁸ẹkẹvuọvo we churu mu Ọrovwohwo Ọghẹnẹ rẹ ovwan kirobo ru we ruru rhi te nonẹ na.

⁹Kidie Ọrovwohwo na djẹ ẹgborho ride re goma nẹ obaro rẹ ovwan; vwọ kẹ ovwan, a je mrẹ ohwo ọvuọvo ro yivwi mudia hirhe opharo ku ovwan rhi te none na-a.

¹⁰Ohwo ọvo vwẹ ohri rẹ ovwan sa djẹ ihwo uriori, kidie Ọrovwohwo Ọghẹnẹ rẹ ovwan re họnra kẹ ovwan, kirobo ro ve kẹ ovwan.

¹¹Gba nabọ kẹnẹ oma rẹ ovwan, we nyo, re wa guọnọ Ọrovwohwo Ọghẹnẹ rẹ ovwan.

¹²Kidie we de kuoma rhẹriẹ, we de re kuoma gbe imihwo rẹ ẹgborho nana ri chekọ vwẹ ohri rẹ ovwan rẹ ovwan vẹe ayen da rọvwọ kugbe, rẹ ovwan da reyọ eya rayen re da reyọ e rẹ ovwan,

¹³wa gba riẹn gbagba nẹ Ọrovwohwo Ọghẹnẹ rẹ ovwan gbe sa djẹ ẹgborho na nẹ obaro kẹ ovwa-an; ẹkẹvuọvo ayen ke dia ufi vẹ ugodo kẹ ovwan, ubi ro che vurhu uwe ẹfẹn, kugbe unwẹ ro che duvwu uwe ẹro, bẹsiẹ wa cha vwọ ghwọrọ nẹ otọ oyoyovwi nana rẹ Ọrovwohwo Ọghẹnẹ rẹ ovwan vwọ kẹ ovwan na.

¹⁴Asakiephana mi muegbe mi che vwo kpo idjerhe rẹ ihwo rẹ akpọ ejobi ra re, yẹ ovwan riẹnre vwẹ evun rẹ udu vẹ erhi rẹ ovwan, ovwan ejobi, nẹ egbudugbu rẹ emu esiri na ejobi rẹ Ọrovwohwo Ọghẹnẹ rẹ ovwan veri kẹ ovwan, ejobi ru gba re, ọvuọvo ro je ruo herọ-ọ.

¹⁵Ẹkẹvuọvo kirobo rẹ emu esiri rẹ Ọrovwohwo Ọghẹnẹ rẹ ovwan ve kẹ ovwan na ro de ru ayen ejobi gba kẹ ovwan na, eriyin rhe Ọrovwohwo je cha vwẹ emu ọbrabra kẹ ovwan, bẹsiẹ rọ vwọ guọghọ ovwan nẹ otọ yoyovwi nana rẹ Ọrovwohwo Ọghẹnẹ rẹ ovwan vwọ kẹ ovwan na,

¹⁶ọ da dianẹ ovwan gbe ọphọ rẹ Ọrovwohwo Ọghẹnẹ rẹ ovwan na ẹgua, rọ vẹ ovwan rere na, wa da ra ga ẹdjọ efa we de digue tẹ otọ kẹ ayen. Etiyin ophu rẹ Ọrovwohwo kọ cha tua kpahe ovwan, ku wa ghwọrọ re nẹ otọ esiri nana rọ vwọ kẹ ovwan na.