Read urhobo Joshua 3 Bible Online

Joshua 3 - urhobo bible

Joshua 3

¹Vwẹ irhiọke ride Joshua de vrẹn o de mu oyan nẹ Shitim, ọ ve ihwo rẹ Izrẹl ejobi; ayen de rhi te Jọdan, ayen won phihọ etiyin tavwe re ayen ke wanvrẹn.

²Vwẹ oba rẹ ẹdẹ re erha inotu na da yan erhọn na duvwu

³ayen de ji urhi kẹ ihwo na nẹ, Ọke wa da mrẹ ekpeti rẹ ọphọ rẹ Ọrovwohwo Ọghẹnẹ wẹn na rẹ irherẹn ri Livae muru, ku we mu oyan nẹ asan rẹ wa epha re we nene,

⁴rere wa vwọ riẹn idjerhe ru wa cha yan wan, kidie wa je wan idjerhe nana dẹvo-o. Dede na uvwre cha dia usun rẹ ovwan vẹ ọrọye, uvwre ro sheri te kubit uriori ivẹ; we biẹ kẹrẹ-ẹ

⁵Joshua da ta kẹ ihwo na, We ru oma rẹ ovwan fon; kidie odẹ rọ cha na Ọrovwohwo che ru igbunu vwẹ ohri rẹ ovwan.

⁶Joshua da ta kẹ irherẹn na, We mu ekpeti rẹ ọphọ na, re wa ka obaro kẹ ihwo na. Ayen de mu ekpeti rẹ ọphọ na, ayen da ka obaro kẹ ihwo na.

⁷Ọrovwohwo da ta kẹ Joshua, Nonẹ na mi che mu we kpenu vwẹ irharo rẹ Izrẹl ejobi, rere ayen riẹn nẹ, kirobo me vẹ Mosis diarọ na, ọtiọye me vẹ owẹ je dia.

⁸Ku wo ji urhi kẹ irherẹn na ri mu ekpeti rẹ ọphọ na nẹ, Ọke we de rhi te egbẹn rẹ urhie ri Jọdan na, ku we mudia kpehre vwẹ uherevie vwẹ evun ri Jọdan na.

⁹Joshua da ta kẹ ihwo rẹ Izrẹl na, Bi te obonẹ, re we nyo eta rẹ Ọrovwohwo Ọghẹnẹ wẹn na.

¹⁰Joshua da ta, Vwẹ oma rẹ ọna wa vwọ riẹn nẹ Ọghẹnẹ ro jeghwo na ọ hẹ uherevie rẹ ovwan, nẹ o che jẹ ihwo ri Kenan, ihwo ri Hẹt, ihwo ri Hiv, ihwo ri Periz, ihwo ri Girgash, ihwo rẹ Amọr, kugbe ihwo ri Jebu ẹ djẹ nẹ obaro wẹ-ẹn.

¹¹Nighere, ekpeti rẹ ọphọ rẹ Ọrovwohwo na cha ka obaro kẹ ovwan kpo Jọdan.

¹²Asakiephana gba reyọ eshare ihwivẹ nẹ orua rẹ Izrẹl rhe, orua ọvo ohwo ọvo.

¹³Ọke rẹ awọ rẹ irherẹn ri mu ekpeti rẹ ọphọ rẹ Ọrovwohwo na, Ọrovwohwo ro vwo akpọ na ejobi na, ghwe te ame ri Jọdan na, ame ri Jọdan na kọ che bru dje ọ gbe djẹ ọkẹre-e, ame rọ dje nẹ obenu cha kọ cha kpahe ẹtan.

¹⁴Ọtiọye na, ọke rẹ ihwo na vwo mu oyan nẹ itughẹ rayen, rẹ ayen ra wan Jọdan vrẹn vẹ irherẹn na ri mu ekpeti rẹ ọphọ na re ka ọbaro kẹ ihwo na,

¹⁵ọke rẹ ihwo re ghwa ekpeti na rhi vwo te Jọdan, rẹ awọ rẹ irherẹn re ghwa ekpeti na ghwa vwọ ro ame na (kidie Jọdan ku reghe erhọn rọye ejobi vwẹ ọke orhọ na),

¹⁶ame na rọ djẹ nẹ obenu cha de yeri kpenu gogorogo, vwẹ Adam, orere na rọ hẹ orhoma ri Zaretan, ame rọ djẹ kpo obo abadi na vwẹ obo Araba, Abadi rẹ Ughweraka na, da ghwa kpo yamu otọ; ihwo na da wanvrẹn hirharo ku Jeriko.

¹⁷Ọke rẹ Izrẹl ejobi vwọ wan otọ ọyaya na vrẹn, irherẹn na re ghwa ekpeti rẹ ọphọ rẹ Ọrovwohwo na de mudia otọ ọyaya vwẹ uherevie ri Jọdan, bẹsiẹ rẹ ẹgborho na ejobi vwọ wanvrẹn Jọdan nu.