Read urhobo Joshua 6 Bible Online

Joshua 6 - urhobo bible

Joshua 6

¹Asakiephana a da kare Jeriko gbe vwẹ obo evun tẹ otafe fiki rẹ ihwo rẹ Izrẹl; ohwo ọvuọvo rua otafe-e, ohwo ọvuọvo rua orere na-a

²Ọrovwohwo da ta kẹ Joshua, Nighere, mi phi Jeriko phihọ owẹ obọ, kugbe ovie rọye vẹ egba ri yivwaro vwọ.

³We ne udje riariẹ orere na, ihwo rẹ ofovwi na ejobi ki ne udje riariẹ esiẹvo. Kẹ ọtiọye ovwan ruo ẹdẹ esan.

⁴Irherẹn ighwrẹn ke reyọ owanre rẹ egbo ighwrẹn vwọ ka obaro kẹ ekpeti na; vwẹ ẹdẹ righwrẹn ku we ne udje riariẹ orere na asieghwrẹn, yẹ irherẹn na re hworo ewanre na.

⁵Ọke re ayen de hworo ighoro rẹ egbo na re ayen de dje ofu krekri, re ovwan de ghwe nyo edo rẹ owanre na, etiyin ihwo na ejobi ki mu kuvwie; igbẹhẹ ri Jeriko na ko che ghwie she totọ, ihwo na ọvuọvo ke cha vẹn ruọ.

⁶Ọtiọye Joshua rẹ ọmọ ri Nọn de se irherẹn na ọ da ta kẹ ayen, Reyọ ekpeti rẹ ọphọ na, gbe jẹn irherẹn ighwrẹn reyọ ewanre rẹ ighoro rẹ egbo ighwrẹn re ka obaro kẹ ekpeti rẹ Ọrovwohwo na.

⁷Ọ da ta kẹ ihwo na, Wa yan obaro; ne udje riariẹ orere na, rere ihwo re choma rẹ ofovwi na yan hẹ obaro kẹ ekpeti rẹ Ọrovwohwo na.

⁸Kirobo ri Joshua ji urhi kẹ ihwo na, irherẹn na ighwrẹn re yọnrọn ewanre ighwrẹn rẹ ighoro rẹ egbo na da ka obaro kẹ Ọrovwohwo, ri hworo ewanre na, vẹ ekpeti rẹ ọphọ rẹ Ọrovwohwo na ro nene ayen.

⁹Ihwo re choma rẹ ofovwi na da ka obaro kẹ irherẹn na ri hworo ewanre na, edje rẹ obuko da vwọ kpahe ekpeti na, yẹ ewanre na re se kọke kọke.

¹⁰Ẹkẹvuọvo Joshua de ji urhi kẹ ihwo na nẹ, We kuvwie-e eyẹ we je nyo urhuru rẹ ovwa-an, eyẹ we jẹn ota ọvuọvo nẹ unu rẹ ovwan cha-a, rhiri re te ẹdẹ re me vwọ ta kẹ ovwan nẹ we kuvwie; kesiẹye we ki kuvwie.

¹¹Etiyin ọ da tanẹ e mu ekpeti rẹ Ọrovwohwo na riariẹ orere na, ayen de muo riariẹ ẹsiẹvo; ayen de rhivwi rhe obo erhọn na, ayen da rhe vwerhẹ obo erhọn na vwe ason na.

¹²Etiyin Joshua de vrẹn vwẹ irhiọke ride, irherẹn na de mu ekpeti rẹ Ọrovwohwo na.

¹³Irherẹn ighwrẹn re ghwa ewanre rẹ ighoro rẹ egbo ighwrẹn re ka obaro kẹ ekpeti rẹ Ọrovwohwo na da yan obaro, ri hworo owanre na kọke kọke, ihwo re choma rẹ ofovwi na da ka obaro kẹ ayen edje rẹ obuko da vwọ kpahe ekpeti rẹ Ọrovwohwo na, yẹ ewanre na re se.

¹⁴Vwẹ ẹdẹ rivẹ ayen de ne udje riariẹ orere na obọvo, ayen de rhivwi kpo obo erhọn na. Ọtiọye kọye ayen ruru ẹdẹ esan.

¹⁵Vwẹ ẹdẹ righwrẹn ayen de vrẹn rẹ ọke vwo rhie nu, ayen de ne udje riariẹ orere na asieghwrẹn kirobo ri jovwo; ẹdẹ yena ọvo ọye ayen ne udje riariẹ orere na asieghwrẹn.

¹⁶Vwẹ obọ righwrẹn na, re irherẹn na vwo hworo owanre na re, Joshua da ta kẹ ihwo na, We kuvwie; kidie Ọrovwohwo phi orere na phihọ owẹ obọ nure.

¹⁷Te orere na kugbe obo re herọ ejobi kẹ a vwẹ ayen ze kẹ Ọrovwohwo rere a ghwọrọ ayen kufia; jokpa ri Rehab rẹ igberadja na ọvo vẹ ihwo rẹ uwevwi rọye ọvo re cha rhọ, kidie o si ikọn re ji rhe na nu.

¹⁸Ẹkẹvuọvo ovwan kẹnẹ oma kẹ obo re vwo ze kẹ ẹghwọrọ na, ọke ra da vwẹ ayen ze kẹ ẹghwọrọ nu wa da rha vwẹ obọ te obo re vwo ze na ku we che ru erhọn rẹ Izrẹl dia kẹ ẹghwọrọ, ku wa cha so okpetu kẹ.

¹⁹Ẹkẹvuọvo idọnọ kugbe oro ejobi, vẹ ekuakua rẹ ẹrovwo kugbe itehru, e pha fuanfon kẹ Ọrovwohwo; ka ghwẹ ayen kpo uwevwi rẹ efe rẹ Ọrovwohwo na.

²⁰Ọtiọye na ihwo na de kuvwie, e de hworo ewanre na. Rẹ ihwo na ghwe vwo nyo umri rẹ ewanre na, ihwo na ejobi de ghwe kuvwie ghwrọrọrọ, igbẹhẹ na de ghwe ghwie she re kpae, ihwo na da ghwa họrhọ ro evun rẹ orere na, ohwohwo vwọ kpahe ohwo, ayen da reyọ orere na.

²¹Ayen da vwẹ obọ te otọ vwẹ ọlọkọ guọghọ obo re hẹ orere na ejobi, te eshare te eya, te ighele te ekpako, irhuẹn, igodẹ, kugbe ekẹtẹkẹtẹ.

²²Joshua da ta kẹ ihwo ivẹ ri re dorhẹ rẹ otọ na, We kpo uwevwi rẹ igberadja na, rere wa reyọ aye na rhe, kugbe ihwo ro vwori ejobi, kirobo ru we duvwu iyori vwọ ke na.

²³Ọtiọye na imighele na ri re dorhẹ rẹ otọ na da ro evun rẹ uwevwi na, ayen da reyọ Rehab, vẹ ọsẹ rọye kugbe oni rọye vẹ imoni rọye kugbe obo ri rhere ejobi; ayen da reyọ uvwiẹ rọye, ayen de phi ayen phihọ otafe rẹ erhọn rẹ ihwo rẹ Izrẹl na.

²⁴Ayen da torhẹ orere na, vẹ ihwo re hẹ evun rọye; jokpa rẹ idọnọ vẹ oro, kugbe ekuakua rẹ ẹrovwo vẹ utehru, eye ayen ghwẹ kpo uwevwi rẹ efe rẹ Ọrovwohwo na.

²⁵Ẹkẹvuọvo Rehab rẹ igberadja na, kugbe evwruwevwi rẹ ọsẹ rọye, kugbe ihwo ro vwori ejobi, Joshua de sivwi ayen rhọ, ọ da dia Izrẹl rhiri rhi te nonẹ na, fikiridie o sivwi ikọn ri Joshua jiri re dorhẹ ri Jeriko.

²⁶Joshua de duvwu iyori kẹ ihwo na ejobi vwẹ ọke yena, tanẹ, Ekan kẹ kohwo kohwo vwẹ obaro rẹ Ọrovwohwo ro vrẹnri nẹ ọye ra bọn orere na, Jeriko ọmọkpako roye kọye o hwe vwo mu uchivwo rọye vi. Ubrevwiẹ rọye kọye o rhe hwe vwọ ghwẹ edọvi phihọ anurhoro rọye.

²⁷Ọtiọye kọye Ọrovwohwo vi Joshua gba herọ; usi rọye de titi ro otọ na ejobi.