Read urhobo Joshua 8 Bible Online

Joshua 8 - urhobo bible

Joshua 8

¹Ọrovwohwo na da ta kẹ Joshua, Wọ djẹ oshọ-ọ eyẹ ofu ji dje we-e, reyọ ihwo ri se phi ofovwi ejobi vwo ba oma, re wo vrẹn, kpo Ai; nighere, mi phi ovie re Ai na, vẹ ihwo rọye ejobi, orere rọye, phihọ obọ wẹn nure;

²ku wo ru kẹ Ai vẹ ovie roye kirobo ru wo ru ki Jeriko kugbe ovie roye, jokpa rẹ ekuakua rọye vẹ uchuru rọye ọvo wọ reyọ kẹ oma wẹn; ra hwa phihọ hẹrhẹ orere na, vwẹ obuko roye.

³Etiyin Joshua de vrẹn, vẹ ihwo ri se phiẹ ofovwi ejobi, ayen de kpo Ai; Joshua da sanọ ihwo uriori ọgban ri yivwaro, o de ji ayen yanran vwẹ ason.

⁴O de ji urhi kẹ ayen nẹ, Nighe, wa cha hwa phihọ hẹrhẹ orere na, vwẹ obuko roye, we tephe kẹ orere na kaka-a, ẹkẹvuọvo wa rhuẹrẹ oma kpahe,

⁵te omẹvwẹ, te ihwo ejobi re vẹ ovwẹ gba herọ na, ki si kerẹ orere na. Ọke rẹ ayen da vwọ sọ avwanre, kẹrẹ ọke ri jovwo, kẹ avwanre mrẹ ayen djẹ;

⁶kẹ avwanre riẹriẹ ayen nẹ evun rẹ orere na rhe, bẹsiẹ rẹ avwanre vwo si ayen nẹ evun rẹ orere na; kidie ayen tanẹ, ayen mrẹ avwanre djẹ, kirobo ri jovwo. Kẹ otiọye avwanre djẹ kẹ ayen;

⁷etiyin ku we vrẹn nẹ asan wa hwa phihọ na rhe, ku wa ro orere na, kidie Ọrovwohwo Ọghẹnẹ wẹn che phio phihọ obọ wẹn.

⁸Ọke rẹ ovwan da reyọ orere na nu, ku we phi erhanre phihọ orere na, kirobo rẹ Ọrovwohwo tare na; nighere, mi ji urhi na kẹ wẹ nure.

⁹Etiyin Joshua de ji ayen yanran, ayen da yanran kpo asan ra da hwa phihọ na, ayen da hwa phihọ uvwre ri Bẹtẹl vẹ Ai, vwẹ obuko ọnre vwẹ Ai, ẹkẹvuọvo Joshua da dia ohri rẹ ihwo na vwẹ ason yena.

¹⁰Joshua de vrẹn vwẹ irhiọke ride ọ da ghwẹ ihwo na koko, ọ da yanran, ọ vẹ ekpako rẹ Izrẹl vwẹ obaro rẹ ihwo rẹ Ai.

¹¹Otu rẹ ofovwi re vẹ ọye gba herọ da yanran, re si kẹrẹ orere na, ayen de mu erhọn vwẹ obohwẹre ọnre ri Ai, ugbo ọvo da wan uherevie rẹ ayen vẹ Ai.

¹²Ọ da reyọ ihwo kerẹ uriori iyori, ayen da hwa phihọ vwẹ uvwre ri Bẹtẹl vẹ Ai, vwẹ abọ ro kpo obuko ọnre vwẹ orere na.

¹³Kẹ etiyin unuofovwi na mu erhọn phihọ, kọye erhọn ro ma rho na vwẹ obohwẹre ọnre rẹ orere na, ẹko rẹ otete rọ hẹ obuko de won hẹ obọrhe rẹ ọnre. Ẹkẹvuọvo Joshua da dia evun rẹ iyara na vwẹ ason yena.

¹⁴Ọke rẹ ovie rẹ Ai vwo mrẹ ọnana te ọye te ihwo rọye ejobi, ihwo rẹ orere na, de bru okpakpa rhe vwẹ irhiọke ride kpo obo ọghwrọrọ rọ kpo obo Araba ra vwẹ ofovwi so Izrẹl; ẹkẹvuọvo ọ rha riẹn nẹ a hwa phihọ hẹrhẹ vwẹ obuko rẹ orere na-a.

¹⁵Joshua vẹ ihwo rẹ Izrẹl ejobi de me ru kerẹsiẹ rẹ ofovwi a da vware ayen oma, ayen da djẹ gare opharo vi obo aghwa.

¹⁶Etiyin e de se ihwo re hẹ evun re orere na nẹ e rhe vwọ tua ayen, rẹ ayen vwọ tua Joshua na yẹ ayen ro sherẹ kẹ orere na.

¹⁷Ohwo ọvuọvo gbi chekọ vwẹ Ai eyẹ Bẹtẹl, ro jẹ Izrẹl e vwọ tua-a; ayen de rhie orere na phihọ, vwọ tua Izrẹl yanran.

¹⁸Etiyin Ọrovwohwo da ta kẹ Joshua, Gba riẹn ubiri rọ hẹ obọ wẹn na ku Ai; kidie mi che phio phihọ owẹ obọ. Joshua da riẹn ubiri rọ hẹ obọ rọye na ku orere na.

¹⁹Ihwo re hwa phihọ na da ghwa vẹn nẹ aghwa rhe gidi gidi, rọ ghwa vwọ riẹn obọ rọye na, ayen da ghwa djẹ okpokpakpa ra ro evun rẹ orere na ayen da reyọ, okpokpakpa na ayen de ghwe phi erhanre phihọ orere na.

²⁰Ọtiọye na ọke rẹ ihwo rẹ Ai, vwo ni obuko, nighe, ivwirhi rẹ orere na de mu kpenu; ayen gbi vwo ogangan vwọ djẹ kpenẹ kpenẹ-ẹ; kidie ihwo re djẹ ro aghwa da rhoma vwọ tua ihwo re vwọ tua ayen.

²¹Ọke ri Joshua vẹ ihwo rẹ Izrẹl ejobi vwọ mrẹ nẹ ihwo re hwa phihọ na reyọ orere na nure, nẹ ivwirhi rẹ orere na mu kpenu, etiyin ayen de rhivwi re hwe ihwo rẹ Ai.

²²Efa de nẹ evun rẹ orere na rhe vwọ so ayen; ọtiọye na uherevie rẹ Izrẹl kọye ayen epha, evo abọ nana, efa abọ yena, Izrẹl de hwe ayen, rhiri bẹsiẹ rẹ ohwo ọvuọvo gbi chekọ-ọ.

²³Ẹkẹvuọvo ayen de mu ovie re Ai ọkpokpọ, ayen de muo rhe Joshua.

²⁴Ọke rẹ Izrẹl vwo hwe ihwo rẹ Ai ejobi nu vwẹ evun rẹ uphephẹ rẹ aghwa ra djẹ ayen ra na bẹsiẹ ra vwọ vwẹ ọlọkọ hwe ayen ọvuọvo nu, Izrẹl ejobi de rhivwi kpo Ai, ayen da vwẹ ọlọkọ ghwọrọ mu otọ.

²⁵Ayen ihwo ri ghwuru vwẹ ẹdẹ yena, te eshare te eya, da dia uriori ihwivẹ, ayen ejobi na ihwo rẹ Ai.

²⁶Kidie Joshua si obọ rọye reyọ-ọ, rọ vwọ riẹn ubiri na phihọ obaro na, bẹsiẹ ro vwo hwe ihwo rẹ Ai na ejobi re kakare.

²⁷Jokpa rẹ uchuru vẹ ekuakua re hẹ evun rẹ orere na ọye Izrẹl ghwẹ reyọ, kerẹ urhi rẹ Ọrovwohwo ji kẹ Joshua.

²⁸Etiyin Joshua da torhẹ Ai, o de vwo ru erhurhu bẹdẹ, kirobo rọ epha rhi te nonẹ na.

²⁹O de churu ovie rẹ Ai si urhe re te ovwọnvwọn; rẹ ọnre vwọ she re Jọshua da ta ke ayen nẹ, a rhan orivwi rọye nẹ urhe na, rere e muo teye anurhoro rẹ ughere rẹ orere na, a da kua ekru rẹ ibieragha nyẹ, ro ji mudia vwẹ etiyin rhi te nonẹ na.

³⁰Etiyin Joshua da so agbada phihọ Ugbenu rẹ Ebal kẹ Ọrovwohwo, Ọghẹnẹ rẹ Izrẹl,

³¹kirobo ri Mosis rẹ odibo rẹ Ọrovwohwo tare kẹ ihwo rẹ Izrẹl, kirobo re siro vwẹ ẹbe rẹ urhi rẹ Mosis, agbada rẹ ibieragha re sheri-i, re ohwo ọvuọvo vwẹ utehru te-e; ayen de ze izobo rẹ ẹtorhẹ kẹ Ọrovwohwo na, kugbe izobo rẹ ufuoma rhe.

³²Vwẹ etiyin, vwẹ irharo rẹ ihwo rẹ Izrẹl, o de si phihọ enu rẹ oragha na ọbe rẹ urhi ri Mosis, rẹ ọye ọvo siri.

³³Izrẹl ejobi, e rẹ erhorha kugbe e re vwieri vwẹ uwevwi, vẹ ekpako rọye inotu rayen vẹ iguẹdjọ rayen, de mudia abọ rivẹ rẹ ekpeti na vwẹ obaro rẹ irherẹn ri Livae ri mu ekpeti rẹ ọphọ rẹ Ọrovwohwo na, ebru evo rẹ ayen e hẹ obaro rẹ Ugbenu rẹ Gerizim ebru evo ri chekọ e hẹ obaro rẹ Ugbenu rẹ Ebal kirobo ri Mosis odibo rẹ Ọrovwohwo na tare vwẹ ẹsosuọ, nẹ ayen bruphihọ kẹ ihwo rẹ Izrẹl.

³⁴Ukuko rọye o de se eta rẹ urhi na ejobi, ebruba te ekan re herọ, kirobo re si phihọ ọbe rẹ urhi na ejobi.

³⁵O vwo eta rẹ urhi na ọvuọvo rẹ Mosis jiri na ri Joshua je se kẹ ọghwẹgbe rẹ Izrẹl na-a te eya na, te imitete na, kugbe erhorha na re dia ohri rẹ ayen.