Read urhobo 2 Tẹsalonaika 2 Bible Online

2 Tẹsalonaika 2 - urhobo bible

2 Tẹsalonaika 2

¹Avwanre rẹ ovwan, imoni, kpahe ẹcha rẹ Ọrovwavwanre Jesu Krisri kugbe ọke rẹ avwanre da cha ghwẹ koko ra vwa,

²nẹ we jẹn udu rẹ ovwan fobọ phariẹ-ẹ eyẹ udu brẹ ovwa-an, eyẹ erhi eyẹ ota, eyẹ ọbe ra vwẹ evun roro nẹ avwanre si rhe ovwan, rọ ta nẹ ẹdẹ rẹ Ọrovwohwo na te nure.

³We jẹ ohwo ọvuọvo phiẹn ovwan vwẹ idjerhe kidjerhe-e; kidie ẹdẹ yena ji te-e, jokpa nẹ ọ ro muẹ kpahe ihwo na ka rhe tavwe, ra da vwẹ onogbozighi na phia, kugbe ọmọ rẹ ughwru na,

⁴ro muẹ oma kpenu ro muẹ kpahe koghẹre koghẹre rẹ ẹdjọ eyẹ obo ra gọ ejobi, ukuko rọye ọ da rhe vẹn phihọ agbara vwẹ evun rẹ uwevwi rẹ Ọghẹnẹ, ro ghwoghwo nẹ ekpuyovwi rọye hẹ Ọghẹnẹ.

⁵Ovwan rha karohọ nẹ ọke re me vẹ ovwan je vwọ herọ me ta ọnana kẹ ovwan?

⁶Yẹ ovwan riẹn obo re darọ ji vwẹ asakiephana ra je vwọ phia vwẹ ọke rọye na-a.

⁷Kidie igbunu rẹ onogbozighi na re ruẹ iruo vwẹ etinẹ na; ohwo ọvuọvo na kọye re de dajẹ rhi te ọke na bẹsiẹ re che vwo sio nẹ idjerhe na.

⁸Ọke yena ka cha vwẹ onogbozighi na phia, Ọrovwohwo Jesu kọ cha vwẹ ota rẹ unu rọye hwe ghwu kọ ghwọrọ vwẹ omavwọphia kugbe ẹcha rọye.

⁹Ẹcha rẹ onogbozighi na vwẹ oma rẹ iruo rẹ Idẹbono na ọ cha rhe vẹ ogangan ejobi vẹ eka rẹ ọphiẹvwẹ kugbe igbunu.

¹⁰Vwẹ uvun umwemwu vẹ ophiẹvwẹ rẹ ayen otu re ghwọrọ kuẹfia, fikiridie ayen senre ayen guọnọ uyota na-a e de rhe sivwi ayen rhọ.

¹¹Vwẹ ọtiọye na Ọghẹnẹ da vwẹ erhi rẹ ibeghe ọgangan kẹ ayen, rere ayen vwo se efian gbuyota.

¹²Ọtiọye na ayen ejobi ri se uyota na gbuyota-a re ghọghọ vwẹ umwemwu eruo ke bruhwe ayen.

¹³Imoni rẹ Ọrovwohwo guọnọre, obo re gba phihọ avwanre ohọre rere kọke ejobi avwanre a kpẹvwẹ Ọgbẹnẹ kẹ ovwan, rọ vwọ sanọ ovwan reyọ kẹ esivwo, vwẹ oma rẹ orufuọn rẹ Erhi na, kugbe obo rẹ ovwan vwo se uyota na gbuyota.

¹⁴Ọnana kọye o se ovwan rhe vwẹ oma rẹ iyẹnrẹ esiri rẹ avwanre, ọtiọye na rere ovwan vwo se vwo urinrin rẹ Ọrovwohwo Jesu Kristi.

¹⁵Vwẹ ọtiọye na, imoni, we mudia gan, rere we churu obo mu uruemu rẹ avwanre yono ovwan na, ọ rẹ ota rẹ unu eyẹ ọbe re siri.

¹⁶Asakiephana gbe jẹ ekpuyovwi rẹ Ọrovwavwanre Jesu Kristi, kugbe Ọghẹnẹ Ọsẹ rẹ avwanre, rọ guọnọ avwanre rọ da kẹ avwanre ufuoma ri bẹdẹ kugbe omamọ rẹ iphiẹrohọ rẹ ẹserọphẹ,

¹⁷o bru udu rẹ ovwan uche ọ vwẹ owọ rẹ ayen muotọ vwẹ iruo kiruo oyoyovwi kugbe ota.