Read urhobo 1 Timoti 1 Bible Online

1 Timoti 1 - urhobo bible

1 Timoti 1

¹Ọnana ọhe ri Pọl, ọyinkọn ri Kristi Jesu vwẹ ọ rẹ urhi rẹ Ọghẹnẹ Osivwi rẹ avwanre kugbe Kristi Jesu iphiẹrohọ rẹ avwanre,

²Ro si rhe Timoti, ọmọ mẹ rẹ uyota vwẹ esegbuyota: Ẹserọphe, arodọvwẹ, kugbe ufuoma rọ nẹ obọ rẹ Ọghẹnẹ Ọsẹ na kugbe Kristi Jesu Ọrovwavwante nene uwe dia.

³Ọke ri mi vwo kpo Masidonia me da ta kẹ owẹ nẹ, daji Efesọs rere wo dje kẹ ihwo evo ri yono uyono, nẹ ayen gbi yono nyono ọfa-a,

⁴eyẹ ayen gbe davwerhọ rẹ esia ẹrhọghọ kugbe ikun rẹ ọrarahe rẹ edẹ rẹ uvwiẹ re sua aphro vwo ghohọnyẹ uyono rẹ Ọghẹnẹ kọye hẹ esegbuyota na;

⁵obo rẹ avwanre nẹ vwẹ idjedje rẹ avwanre hẹ ẹguọnọ ro nẹ omamọ rẹ udu rhe kugbe evun esiri kugbe uvi re esegbuyota.

⁶Ihwo evo ri phieghe nẹ ọnana de ho ghwru ra ro eta ifefe,

⁷re guọnọ nẹ ayen dia iyono rẹ urhi na, yẹ ayen vwo ẹruọ rẹ obo rẹ ayen ta-a eyẹ obo rẹ ayen vwi fiki rọye vwẹ obọ sa ndu na-a.

⁸Asakiephana avwanre riẹnre nẹ urhi na yoma, ọ da dianẹ ohwo ru obo re wan urhi,

⁹e gbe jẹ ọnana ro ovwan nẹ, a vwi fiki rẹ ovwata ji urhi-i ẹkẹvuọvo fiki rẹ onogbozigbi kugbe ijẹọghọ evwo, fiki ohwo rọ riẹn Ọghẹnẹ-ẹ kugbe ọruimwemwu, vwọ kọ ijẹfuọn kugbe ọ ro gbe ẹgua, vwọ kẹ otu ri hwe esẹ vẹ otu ri hwe ini, vwọ kẹ otu re fa ihwo hwe,

¹⁰vwọ kẹ evwọfanrhiẹ, vwọ kẹ ọshare rọ rọvwọ ọshare, vwọ kẹ otu ri mu ihwo shẹ, evwọrọn efian, vwọ kẹ otu ri se oseri rẹ eku, kugbe oghẹre rẹ emu ehrahra efa ri she phiho omamọ rẹ uyono-o,

¹¹kirobo rẹ iyẹnrẹ esiri rẹ urinrin rẹ Ọghẹnẹ re bruba kẹ na epha ra vwọ kẹ vwẹ yọnre na.

¹²Me kpẹvwẹ Kristi Jesu Ọrovwavwanre, rọ kẹ vwẹ ogangan nana, kidie o ni vwe fo ohwo rẹ uyota, ro vwo se vwe phihọ iruo rọye,

¹³dede na dẹvure jovwo me phọpherọ mi kpokpiro me da harhọ; ẹkẹvuọvo o de ni arodọvwẹ mẹ fikiridie ughẹghẹ vẹ ijesegbuyota mi vwo ruo,

¹⁴ẹserọphẹ rẹ Ọrovwavwanre de rhi reghe nvwe phihọ vẹ esegbuyota vẹ eguono re hẹ evun ri Kristi Jesu.

¹⁵Ọnana omamo rẹ ora ro fori rẹ ihwo ejobi reyọ nẹ, Kristi Jesu rhe akpọ na rhi sivwi iruimwemwu. Mẹvwẹ hẹ onotu rẹ iruimwemwu;

¹⁶fiki rẹ ọnana me vwọ mrẹ arodọvwẹ nẹ, vwẹ evun mẹ, kirobo re me dia onotu jovwo na, Jesu Kristi se vwo dje omamọ rẹ ọdiri rọye phia rọ dia oniru kẹ ihwo ri che se gbuyota vwobọ ri ji che vwo arhọ ri bẹdẹ na.

¹⁷Asakiephana vwọ kẹ ovie ri bẹdẹ, ro jeghwo, re jẹmrẹ, Ọghẹnẹ ọvuọvo kpoi, ọye a vwẹ ọghọ vẹ urinrin kẹ rhiri bẹdẹ. Isẹ.

¹⁸Urhi nana mi ji kẹ wẹ, ọmọ mẹ, Timoti, kirobo ra mraro kpahe owẹ jovwo na, rere wọ da karohọ ayen wọ vwọ sa họnre omamọ rẹ ohọnre,

¹⁹rere wo churu obọ mu esegbuyota wẹn, wo jẹn evun wẹn fon. Otu ri siobọ nẹ evun ọfuanfon na rhi shu okọ rẹ esegbuyota rayen kufia.

²⁰Usun rẹ ihwo yena kọye Himniọs kugbe Alẹkzanda epha, kẹ ayen mi mu vwọ kẹ Idẹbono re ayen yono re ayen vwo jẹ avwavwe ebro.