Read urhobo Taitọs 1 Bible Online

Taitọs 1 - urhobo bible

Taitọs 1

¹Pọl, odibo rẹ Ọghẹnẹ kugbe ọyinkọn ri Jesu Kristi, ro ghwoghwo esegbuyota na kẹ ihwo rẹ Ọghẹnẹ sanọ reyọ, rere ayen vwọ riẹn uyota na vẹ uyoyovwi rọye,

²vẹ iphiẹrohọ rẹ arhọ ri bẹdẹ na, rẹ Ọghẹnẹ rẹ uyota na ve phihọ rhahae rhe.

³Ẹkẹvuọvo ọke ro bruru vwọ gba nu, ọ da rhe vwẹ ota rọye phia vwẹ evun rẹ iyẹnrẹ esiri na, kọye a da vwẹ ovwẹ mu ni mi gbe ghwoghwo urhi rẹ Ọghẹnẹ Osivwi na.

⁴Mi siro rhe Taitọs, ọmọ mẹ ri mi vwiẹri vwẹ esegbuyota ọvuọvo na. Ẹserọphẹ vẹ ufuoma ro nẹ obọ rẹ Ọghẹnẹ rẹ Ọsẹ na kugbe Kristi Jesu Ọsivwi rẹ avwanre, nene uwe dia.

⁵Ọna re sorọ me vwọ yan je uwe vwo vwẹ obi Krit, rere wọ vwọ rhuẹrẹ obo ri miovwiri vwẹ oboyi phihọ, rere wọ rha vwẹ ekpako mu vwi korho korho kirobo ri mi dje kẹ wẹ.

⁶Eshare ri vwo abe-e, re rọvwọre ẹsiẹvo kpoi, rẹ emọ rọye vwo esegbuyota, re ghwọ-ọ, re họnra-a, ri yivwaro-o.

⁷Kidie Ibishọpu, kerẹ odibo rẹ Ọghẹnẹ, o vwo abe-e, o mu oma kpenu-u eyẹ ọ fobọ mu ophu-u eyẹ ọ dia ogbaudi-i eyẹ o gbe ozighi-i eyẹ o vwo urhuru rẹ erere-e,

⁸ẹkẹvuọvo o ru ẹse, ivun rẹ erhuvwu vwerhọ, o se sun oma rọye rọ dia ohwo rẹ ọsoso, fuanfon, dẹndẹn;

⁹rọ nabọ yọnrọn uyota rọ hẹ evun rẹ uyono na, rere o vwo se bruche vwẹ evun rẹ uyono na, kugbe o vwo se dje kẹ otu re phra aphro.

¹⁰Kidie ihwo zighi zighi buebu herọ, re ta eta ifefe, re phiẹn ihwo, marho kẹ otu re yavwere na;

¹¹o fori rere ihwo yena rhurhu unu rẹ ayen, ihwo re kparẹ ọsoso rẹ uwevwi ghwọrọ, ri vwi fiki rẹ erere yono obo rẹ ayen eyono-o.

¹²Ọvo vwẹ usun rẹ ayen na, ọmraro rayen, tare nẹ, ihwo ri Krit vwenẹ evwọnrọn efian, eranvwe ebrabra, evwufeti egbọre.

¹³Iseri nana uyota, Fiki rẹ ọtiọye na gba nabọ ghwọ ku ayen gangan, rere ayen yọnrọn esegbuyota na gan.

¹⁴Wo jẹn ayen davwerhọn rẹ ikun ifefe rẹ ihwo ri Ju-u, kugbe uyono efian rẹ ihwo ri ghwru nẹ idjerhe rẹ uyota na.

¹⁵Vwẹ obọ rẹ ọvwata emu na ejobi ki yovwe re. Ẹkẹvuọvo vwọ kẹ ihwo ri gbe ẹgua ri segbuyota-a, emu na ejobi ki miovwẹ.

¹⁶Ayen vwẹ oma nẹ nẹ ayen riẹn Ọghẹnẹ; ẹkẹvuọvo ayen wan evun rẹ iruo rayen siọn, iruo rayen tuoma, ayen kpare oma kpenu, ayen ki rhe gbobọnyẹ iruo esiri ejobi.