Read urhobo Hibru 10 Bible Online

Hibru 10 - urhobo bible

Hibru 10

¹Rẹ urhi na vwọ dia uhoho rẹ emu esiri rọ cha na yọ dia okpuyovwi rẹ emu na dẹn na-a, eriyin na iye ọvuọvo rẹ ayen gọ nẹ ukpe fi ukpe na, rhe se vwo ogangan rọ vwọ vwẹ esivwo kẹ ihwo ri sere gbuyota-a.

²Ọ dianẹ kẹ eriyin jovwo nọ manẹ e rhe jẹ iye ẹgo vwo-o? Ọ dianẹ otu re gọ iye na wan oma rẹ etiyin fon, manẹ ayen rha karohọ umwemwu ọfa-a.

³Ẹkẹvuọvo iye nana rẹ ayen gọ na kọ nẹrhẹ ayen karohọ umwemwu nẹ ukpe re fi ukpe.

⁴Kidie ọ pha bẹnbẹn rere ọbara rẹ ẹvwe kugbe irhuẹn vwọ sa ghwẹ imwemwu nu.

⁵Kọye, ri Kristi vwọ rhe akpọ na, ọ da ta, Iye kugbe egagọ wọ guọnọre-e, ẹkẹvuọvo ugboma vwọ rhuẹrẹ kẹ vwẹ;

⁶izobo ẹtorhẹ kugbe izobo rẹ umwemwu e vwerhẹ owẹ oma-a.

⁷Etiyin me da ta, Nighe, me rhere rhi ru ọhọre wẹn, E Ọghẹnẹ, kirobo re siro kpahe ovwẹ vwẹ evun rẹ ọbe na.

⁸Kirobo re siri na, iye ra gọre kugbe izobo ẹtorhẹ fiki rẹ umwemwu wọ guọnọre-e eyẹ oma rẹ ayen vwerha owẹ-ẹ (ra gọ nene urhi),

⁹Kọye ọ vwọ ta nẹ, Nighe, me rhere rhi ru ọhọre wẹn. O si ọ rẹsosuọ no rere ọ mrasa vwẹ ọrivẹ rhe.

¹⁰Vwẹ oma rẹ ọhọre yena a wan ru avwanre fon fiki rẹ iye ri Jesu Krisri vwẹ ugboma rọye gọ ẹsiẹvo kẹ ihwo ejobi.

¹¹Orherẹn korherẹn muẹdia kọke kọke vwẹ enu rẹ ẹga rọye, rọ vwariẹ iye ọvuọvo na gọ, yọ sa ghwẹ imwemwu nẹ-ẹ.

¹²Ẹkẹvuọvo ọke ri Kristi vwọ gọ iye na ẹsiẹvo goi vwọ kẹ imwemwn nu, o de tidia obọrhe rẹ Ọghẹnẹ,

¹³kọ hẹrhẹ bẹsiẹ ra vwọ vwẹ ivwighrẹ rọye hwa otọ kẹ chiyi.

¹⁴Kidie iye ọvuọvo goi na ọye o vwo ru ihwo na ejobi fon obọvo.

¹⁵Erhi Ọfuanfon na ji se iseri kẹ avwanre rhe, kidie rọ vwọ ta nu nẹ

¹⁶Ọnana hẹ ọphọ re me vẹ ayen cha re rẹ ẹdẹ yena da wan nu Ọrovwohwo re tare; ki mi phi urhi mẹ phihọ udu rayen, ki mi sio phihọ iroro rayen,

¹⁷ọ ke rha je ta ba, me gbe karohọ imwemwu rayen kugbe oruchọ rayen ọfa-a.

¹⁸Asan rẹ evwoghovwo nana epha nu, o gbe vwo iye ọfa ra gọ fiki rẹ umwemwu-u.

¹⁹Vwẹ ọtiọye na, imoni, fiki rẹ obo rẹ ọbara ri Jesu vwọ kẹ avawnre arueyivwo vwọ ro ẹshẹ na,

²⁰vwẹ oma rẹ idjerhe ọkpokpọ ro je ghwo na rọ wan oma rẹ amwa na rhie kẹ avwanre na, kọye hẹ, ugboma rọye,

²¹rẹ avwanre re vwo vwo orherẹn rode vwẹ enu rẹ uwevwi rẹ Ọghẹnẹ,

²²e gbe jẹ avwanre vwẹ udu esiri rọ vọnre vẹ esegbuyota vwo si kẹrẹ, re avwanre si emu ọbrabra nẹ iroro rẹ avwanre ra vwẹ omamọ rẹ ame họ ugboma rẹ avwanre.

²³E gbe jẹn yọnre esegbuyota rẹ iphiẹrohọ rẹ avwanre na gan e phieghe-e, kidie ohwo ro ve ive kẹ avwanre na ohwo rẹ uyota;

²⁴e gbe jẹ avwanre roro obo re jeje ohwohwo oma vwẹ ẹguọnọ kugbe iruo esiri,

²⁵e jẹn avwanre ghwẹ oma koko, a rha hẹrhiẹ oma kirobo rẹ otu evo ruẹ-ẹ, ẹkẹvuọvo e bru ohwohwo uche, marho kẹ ọke nana rẹ ovwan vwọ mrẹ nẹ Ẹdẹ na si kẹre re.

²⁶Kidie avwanre da vwẹ ẹro koko ru umwemwu rẹ avwanre vwo vwo erianriẹn rẹ uyota na nu, o rhe vwo iye ọfa ra cha gọ fiki rẹ umwemwu-u,

²⁷ẹkẹvuọvo kẹ iphierohọ rẹ oshọẹdjẹ rẹ ẹdjọeguo, ophu rẹ erhanre rọ cha torhẹ ukọn na.

²⁸Ohwo rọ chọ urhi ri Mosis ihwo ivẹ eyẹ erha de se iseri kpahọ nu ka teyọ hwe o vwo aruẹdọ-ọn.

²⁹Ki bro ehwe ọbrabra we rori nẹ e hwe ohwo na ro ni Ọmọ rẹ Ọghẹnẹ na saka, ro de rhe gbe ọbara rẹ ọphọ na ra vwọ hworhẹ fon na ẹgua, rọ da rha kpare ophu rẹ Erhi rẹ ẹserọphẹ na?

³⁰Kidie avwanre riẹn ohwo rọ tare nẹ, Ihriẹriọ ọ mẹ, mẹvwẹ re hwa osa. Ọfa, Ọrovwohwo che guẹdjọ rẹ ihwo rọye.

³¹Emu ro mu oshọ gangan re vwo she phihọ obọ rẹ Ọghẹnẹ ri bẹdẹ na.

³²Ẹkẹvuọvo gba karohọ ọke ri jovwo, ọke rẹ ẹro rẹ ovwan vwo rhie nu, wo de chirako rẹ ohọnre ọgangan vẹ oja,

³³ọke ọvo e kpokpo ovwan ra da harhe ovwan ekan vwẹ azagba, ọke ọvo a da vwẹ ovwan ba otu re ruru ọtiọye.

³⁴Kidie ovwan re ehrọre re otu re mu phihọ uwodi, re vwo gborho ekuakua wẹn oma da vwerhe owẹ, kidie okpuyovwi wẹn riẹnre nẹ wo vwo ekuakua ri yoma nọ eyena re je tọn nọ.

³⁵Vwẹ eriyin na we rhe ku aroeyivwo rẹ ovwan kuẹfia-a, ro vwo osa rhuarho.

³⁶Kidie o fori re we chirako, rere we vwo se ru ọhọre rẹ Ọghẹnẹ re we vwo obo ro veri na.

³⁷Kidie ọmọke krẹn, ọ rọ cha rhe na kọ cha rhe o che kri-i;

³⁸ẹkẹvuọvo esegbuyota ko sivwi ọvwata mẹ rhọ o de sioma reyọ, erhi mẹ vwo omavwerhovwẹ kpahọ-ọ.

³⁹Ẹkẹvuọvo avwanre dia otu ri siẹoma reyọ a ghwọrọ aye-en, ẹkẹvuọvo ayen otu ri segbuyota re sẹro rẹ ẹnwẹn rayen.