Read urhobo Hibru 12 Bible Online

Hibru 12 - urhobo bible

Hibru 12

¹Fiki rẹ eriyin na, re avwanre vwọ mrẹ nẹ iseri buebu riariẹ avwanre phihọ na, e gbe jẹn avwanre won oghwa koghwa, kugbe umwemwu rọ gba avwanre na phihọ otọ, e gbe jẹn avwanre vwẹ erhiori djẹ onẹ rọ hẹ obaro na,

²avwanre gba tọn ẹro vi Jesu ọkobaro kugbe orugba rẹ esegbuyota rẹ avwanre, ohwo rọ vwi fiki rẹ aghọghọ rọ hẹ obaro kẹ chiri odjadja rẹ aghagha na, ọ davwerhọn rẹ omaẹvuọ na-a, o de rhi tidia obọrhe rẹ ekete rẹ Ọghẹnẹ.

³Gbe roro ohwo yena ro chirako rẹ ehwẹjẹ vẹ ophọphọvwe rẹ iruimwemwu vwo kpahọ, rere oma vwo jẹ ovwan ẹrhọ.

⁴Ohọnre rẹ ovwan vẹ umwemwu họnra na wa je họnrọ te asan rẹ oma rẹ ovwan de hwẹ obara-a.

⁵Uche ro bru ovwan na ghwa chọrọ ovwan ẹro nure obo rọ vẹ ovwan jẹ iroro te kerẹ emọ na nẹ? — Ọmọ mẹ, wo nẹ uchebro rẹ Ọrovwohwo saka-a, eyẹ wo jẹ ivun miovwo uwe vwẹ ọke ra da ghwọ ku we-e.

⁶Kidie ohwo rẹ ivun rọye vwerha Ọrovwohwo ọye o ghwọ kuẹ, ọmọ ro se phihọ oma ọye ọ fa.

⁷Ọ ghwọ rere ovwan vwo se chirako. Ọghẹnẹ ruẹ ovwan kerẹ emọ; ki didi ọmọ ọsẹ rọye jẹ ghwọ kuo?

⁸A rha ghwọ ku ovwan kirobo ra ghwọ ku emọ ri chekọ-ọ, yẹ ovwan kẹ evwọrobọ e dia emọ-ọ.

⁹Ọfa, ọsẹ rẹ aruakpọ na ghwọ kuẹ avwanre avwanre mi mu ọghọ kẹ ayen. Kẹ avwanre rhe se mu ọghọ kẹ Ọsẹ ro vwo irhi ejobi re wa rhọ-ọ?

¹⁰Kidie ọmọke krẹ ọye ọsẹ rẹ aruakpọ na ghwọ kuẹ avwanre kirobo ro jere, ẹkẹvuọvo fiki rẹ erhuvwu rẹ avwanre ọye o vwọ ghwọ, rere avwanre vwọ fon kerẹ okpuyovwi rọye.

¹¹Asakiephana ẹghwọ ejobi da ohwo ọ vwerha oma-a; ukuko rọye ọ me rhe vọn vẹ ufuoma vẹ ọvwata vwọ kẹ otu re vwiro yono.

¹²Fiki rẹ ọtiọye na gba kpare abọ rẹ ovwan ri gbe phihọ otọ na kpenu, ovwan riẹn igbo rẹ ovwan ri Sida na,

¹³rere wa gbẹn idjerhe ọphiọnphiọn kẹ awọ rẹ ovwan, rere awo ri ghwuru vwo je sida ẹkẹvuọvo rere i vwo je sivwi.

¹⁴Pharhe re wọ vẹ ihwo ejobi vwọ dia kugbe vwẹ ufuoma, kidie ẹfuọn tiọnana da kare ohwo, ohwo yena sa mrẹ Ọrovwohwo-o.

¹⁵E ja mrẹ nẹ ohwo ọvuọvo fiabọ rẹ ẹserọphẹ rẹ Ọghẹnẹ na-a; e jẹn owọ urhe rẹ ophu tan cha vwẹ ohri rẹ ovwan rọ so okpetu-u, ro che gbe ihwo buebu ẹgua-a;

¹⁶e jẹn ohwo ọvuọvo dia ọvwọfanrhiẹ-ẹ eyẹ ro jẹn ẹgha ẹriẹn kerẹ Isọ, rọ vwi fiki rẹ emọre shẹ ọkpako rọye.

¹⁷Kidie ovwan riẹnre nẹ ukoko na rọ vwọ guọnọ nẹ ọye reuku rẹ ebruphihọ, a da siọn kẹ, kidie ọ gbe mrẹ ọke vwo kurhẹriẹ-ẹ, edobo rọ vwẹ oviẹ guọnọ te na.

¹⁸Kidie ovwan je rhe yan te obo re je obọ e vwo te-e, ẹkuerhanre ro la grigrigri, kugbe ebri, okuku hwi, kugbe ọgbogho,

¹⁹kugbe edo rẹ ọgban, kugbe urhuru rẹ otu ri nyoro da rẹ nẹ e gbi gbe ikun na kẹ aye-en.

²⁰Kidie ayen se chirako rẹ urhi re jiri-i, Ọ da dianẹ eranvwe rọ tobọ vwẹ oma te ugbenu na, kẹ phio hwe.

²¹Rẹ oshọ rẹ asan na rhi vwo muo re, Mosis da ta, ke me phariẹ guegue vẹ oshọ.

²²Ẹkẹvuọvo ovwan rhe yan te ugbenu ri Zayọn re, re te orere rẹ Ọghẹnẹ ri bẹdẹ na re, kọye hẹ Jerusalẹm rọ hẹ obenu na, kugbe ukoko rẹ emakashe gbidi re ghwẹ koko re orẹ,

²³kugbe ọghwẹgbe rẹ emekpako re si odẹ rayen phihọ odjivwu, kugbe oguẹdjọ kọye hẹ Ọghẹnẹ rayen ejobi, kugbe erhi rẹ ihwo re dia ọsoso re ru gba,

²⁴kugbe Jesu o vwrohọre rẹ ọphọ ọkpokpọ na, kugbe ọbara ra fẹre rọ ta ota esiri nọ ọbara rẹ Ebẹl.

²⁵We ja mrẹ nẹ ovwan siẹn ohwo rọ ta ota na-a. O da dianẹ ayen siẹn ohwo rọ ta ota kẹ ayen vwẹ akpọ na rẹ ayen da djẹ vabọ-ọ, komavọ ọ dia rẹ avwanre sa vwọ djẹ vabọ ra da siẹn ohwo ro ta ota kẹ ayen nẹ odjivwu rhe.

²⁶Vwẹ ọke yena urhuru rọye ko kpogho akpọ na; ẹkẹvuọvo asakiephana o vẹri nure, Kẹ ẹsiẹvo ri chekọ o diane kẹ akpọ na ọvo mi che kpogho-o ẹkẹvuọvo ji te odjivwu rhe.

²⁷Ephẹrẹ nana, Kẹ ẹsiẹvo ri chekọ na, dje phia nẹ e che si obo ri kpogho no, kọye hẹ obo ra mare, rere obo ri je kpogho vwọ daji.

²⁸Vwẹ ọtiọye na e gbe jẹn avwanre kpẹvwẹ rẹ avwanre vwo vwo uvie ro je kpogho, kẹ avwanre ga omamọ rẹ egagọ ro fo ẹreyọ kẹ Ọghẹnẹ, vẹ etete kugbe udidi; kidie Ọghẹnẹ rẹ avwanre na hẹ erhanre rọ ghwọrọ.