Read urhobo Hibru 2 Bible Online

Hibru 2 - urhobo bible

Hibru 2

¹Vwẹ ọtiọye na avwanre gba nabọ kerhọn rẹ obo rẹ avwanre nyori na, ọ rha dia ọtiọye-e avwanre de rhe bo ghwru.

²Kidie ovuẹ rẹ emakashe vuẹre na da ghene dia uyota rẹ ogbeku kogbeku rẹ ohwo ruru de vwo osa ro tere,

³komavọ avwanre sa djẹ vabọ rẹ avwanre da siẹn esivwo rode ọtiọna? Ọrovwohwo ri ke djẹ ẹsosuọ, avwanre otu ri nyoro kẹ iseri rọye.

⁴Yẹ Ọghẹnẹ ji se oseri vwẹ eka vẹ igbunu kugbe emuigbunu sansan kugbe okẹ rẹ Erhi Ọfuanfon na ghare kẹ ihwo kirobo rẹ ọhọre robọ rọye epha.

⁵Kidie ọ dia emakashe Ọghẹnẹ phi akpọ rọ cha na o rẹ avwanre ta na, phihọ obọ-ọ,

⁶E se oseri kpahọ vwẹ asan ọfa, Die ohwo rẹ akpọ epha ru wọ davwerhọn rọye, eyẹ ọmọ rẹ ohwo, ru wo nenesi rọye?

⁷Wọ marọ kpotọ emerha nọ emakashe na, wọ da vwẹ urinrin vẹ ọghọ vwo tughẹ,

⁸wọ da vwi kemu kemu hwa otọ kẹ chiyi. Asakiephana rọ vwọ vwi kemu kemu hwa otọ kẹ ohwo na, o ji vwo emu ọvuọvo ro je phio phihọ otọ rẹ isuesun rọye-e. Kirobo rọ epha na, avwanre je mrẹ emu ọvuọvo re jẹ vwọ hwa otọ kẹ-ẹ.

⁹Ẹkẹvuọvo avwanre mrẹ Jesu, ra mare kpotọ emerha nọ emakashe na, ra vwẹ urinrin vẹ ọghọ tughẹ fiki rẹ oja rẹ ughwu, ọtiọye na vwẹ oma rẹ ẹserọphẹ rẹ Ọghẹnẹ ọ sa vwọ davwe ughwu kẹ ohwo kohwo.

¹⁰Kidie o fori nẹ ọye, ra ma emu na ejobi kẹ na, rẹ emu na ejobi vwọ herọ na, sa vwọ reyọ emọ na vwo kpo urinrin, rere e sa dia ekobaro rẹ esivwo rayen na vwẹ oma rẹ oja rọ rere.

¹¹Kidie te ọye ro ru ihwo fon kugbe otu re ru fon na ejobi asan ọvo ayen nurhe. Kọye sorọ rẹ oma vwo jẹvuọ ro de se avwanre imoni,

¹²tanẹ Mi ghwoghwo odẹ wẹn kẹ imoni mẹ, vwẹ uherevie rẹ otu buebu mi de jiri uwe.

¹³Ọfa, Ke me vwẹ ẹro suọ. Ọfa, Mẹvwẹ na, kugbe emọ rẹ Ọghẹnẹ vwọ kẹ vwẹ.

¹⁴Kirobo rẹ emọ na herọ vwẹ oma vẹ obara na, eriyin okpuyovwi rọye ji vwo oma ọvo na, rere vwẹ oma rẹ ughwu ọ vwọ guọghọ ohwo ro vwo ogangan rẹ ughwu na, kọye hẹ, idẹbono na.

¹⁵Rọ vwọ mrasan sivwi ihwo ejobi re wan oma rẹ oshọẹdjẹ rẹ ughwu vwẹ oma kpotọ kẹ oviẹn ri bẹdẹ.

¹⁶Kidie o muẹro nẹ ọ dia emakashe a ta kpahe na-a ẹkẹvuọvo uvwiẹ rẹ Ebraham.

¹⁷Fiki rẹ ọtiọye na kọye a vwọ ma họhọ imoni rọye vwẹ idjerhe kidjerhe, rere ọ vwọ sa dia orherẹn rode ro nẹ aruẹdọn ro vwo esegbuyota vwẹ evun rẹ ẹga rẹ Ọghẹnẹ, rọ vwọ go ese rẹ imwemwu nẹ ihwo oma.

¹⁸Kidie fiki robo rẹ okpuyovwi rọye vwọ reoja ra vwọ davwọ ni, kọ je sa dia ọchuko kẹ ayen otu ra davwere.