Read urhobo Hibru 4 Bible Online

Hibru 4 - urhobo bible

Hibru 4

¹Eriyin na, ovwan gba kẹnoma ọ rha dia eriyi-in, ive ro ve phihọ kẹ avwanre na nẹ avwanre kpo omaerovwo rọye na vwo jẹ ovwan abọ ẹva.

²Kidie e gbe ikun esiri na kẹ avwanre kirobo re ji gbe kẹ ayen; ẹkẹvuọvo ota na rẹ ayen nyori na fi erere kẹ aye-en, fikiridie a mrẹ esegbuyota vwẹ oma rẹ ayen otu ri nyoro-o.

³Kidie avwanre ri segbuyota na che kpo omaerovwo yena, kirobo ro tare nẹ, Kirobo mi vwo ophu duvwu ayen iyori na, o rhe je ayen te omaerovwo mẹ-ẹ, dede na ye ru iruo na ejobi gba nẹ ẹtuọhọ rẹ akpọ na rhe.

⁴Kidie ọ je ta vwẹ asan ọfa kpahẹ ẹdẹ righwrẹ na nẹ, Ọghẹnẹ de rovwoma vwẹ ẹdẹ righwrẹ na vwẹ enu rẹ iruo rọye ejobi.

⁵Vwẹ evun rẹ etinẹ na ọvo na ọ da ta, Ọ rhe jẹ ayen te omaerovwo mẹ-ẹ.

⁶Ovwan mrẹre nẹ ihwo evo herọ re cha ro evun rẹ omaerovwo na, yẹ ayen ihwo ra ka ta ota na kẹ cha sa ruọ-ọ fiki ri jẹ ọghọ emuo.

⁷Ọ je rhoma bru ẹdẹ ọvo, Nonẹ, tanẹ dede Devid vwẹ unu ta krekri re, kirobo ra tarọ jovwo na, Nonẹ na we de nyo urhuru rọye, we vwo udu-u.

⁸Kidie ọ dianẹ Joshua sa kẹ ayen omaerovwo jovwo nọ, Ọghẹnẹ a rha rhoma ta ota rẹ ẹdẹ ọfa-a.

⁹Vwẹ ọtiọye na ẹdẹ rẹ omaerovwo ọfa jẹ herọ vwọ kẹ ihwo rẹ Ọghẹnẹ.

¹⁰Kidie kohwo kohwo rọ sa ro omaerovwo rẹ Ọghẹnẹ na nu ko ji rovwoma nẹ iruo rọye kirobo rẹ Ọghẹnẹ ruru.

¹¹E gbe jẹn avwanre pharhe ra ro omaerovwo yena, rere ohwo ọvuọvo vwo je she kerẹ ihwo ri jẹ ọghọ evwo na.

¹²Kidie ota rẹ Ọghẹnẹ na ọkpokpọ gbrọgbrọ sasasa, dandan kerẹ ọlọkọ rẹ ako ivẹ, rọ nyavwe udu vẹ erhi rhie phihọ, rọ hẹriẹ ẹrho vẹ otu, o krẹ ro ki vughe iroro vẹ omeru rọ hẹ evun rẹ udu-u.

¹³O vwo emama ọvuọvo ro sioma nu kẹ-ẹ, emu na ejobi rhie phihọ ghwroro kẹ ohwo rẹ avwanre vẹ ọye gbe yerẹ kuẹgbe na.

¹⁴Rẹ avwanre vwo vwo orherẹn rode na ro yeri vrẹn idjuvwu na, Jesu rẹ Ọmọ rẹ Ọghẹnẹ na, e gbe jẹn avwanre yọnre esegbuyota rẹ avwanre gan.

¹⁵Kidie avwanre vwo orherẹn rode ro jẹ ọdavwẹ rẹ avwanre eriẹẹn, ẹkẹvuọvo ọ rẹ avwanre vwori na je vwẹ ohwo ra davwini devure kerẹ ekpuyovwi rẹ avwanre, yo ru umwemwu-u.

¹⁶E gbe jẹ avwanre sikẹre ekete rẹ ẹserọphe na vẹ ẹroẹvwọsuọ, rere avwanre mrẹ arodọvwẹ reyọ kugbe ẹserọphẹ rọ cha avwanre uko vwẹ ọke rẹ ọbẹnvwẹ.