Read urhobo Hibru 5 Bible Online

Hibru 5 - urhobo bible

Hibru 5

¹Kohwo kohwo re vwo mu orherẹn uherevie rẹ ihwo rọye a da sanọ, ka vwọ phia kẹ Ọghẹnẹ, re ọ vwọ kẹ okẹ re ọ vwọ gọ iye kẹ ihwo ri ru umwemwu.

²Ko ji ru dẹndẹn kẹ igbori kugbe otu ri ghwruru, fikiridie ovwiẹrẹ je gba riariẹ okpuyovwi rọye phihọ.

³Fiki rẹ ọnana na kọye ọ vwọ gbahọ ohọre rere ọ vwọ gọ iye fiki rẹ umwemwu robọ rọye kugbe ọ rẹ ihwo efa rhe.

⁴Ọnana rha de dia ọghọ rẹ ohwo di muẹ kẹ omobọ rọye-e, ẹkẹvuọvo Ọghẹnẹ sere, kirobo ro se Erọn.

⁵Ọtiọye rhe Kristi ọvo vwẹ oma mu orherẹn rode-e, ẹkẹvuọvo ohwo rọ ta kẹ nẹ, Wẹ hẹ Ọmọ mẹ, nonẹ na mi vwiẹ wẹ

⁶kirobo ro tare vwẹ asan ọfa, Wẹ hẹ orherẹn bẹdẹ, kirobo rẹ urhi ri Mẹlkizẹdẹk epha.

⁷Vwẹ ọke rọ vwọ herọ vwẹ ugboma na, Jesu nẹ ẹrhovwo ọ ghwa yare oyare, vẹ ekperẹ vẹ oviẹ, kẹ ohwo ro se sivwo nẹ ughwu, e de nyo kẹ fikiridie ohwo ọfuanfon rọ djẹ oshọ o ruẹ.

⁸A riẹnre nẹ Ọmọ o ruẹ, dede na yo ji yono obo re muẹ ọghọ vwẹ oma rẹ oja rọ rere;

⁹re vwo ruo gba nu kọ rhe dia esiri rẹ esivwo ri bẹdẹ na vwọ kẹ ayen ejobi ri mu ọghọ kẹ.

¹⁰Ohwo rẹ Ọghẹnẹ seri orherẹn rode kerẹ urhi ri Mẹlkizẹdẹk.

¹¹Avwanre mrẹ emu buebu ra ta kpahọ rẹ otọ rọye bẹn ẹfa, fikiridie ovwan se nyo ẹme-e.

¹²Kidie rhi te ọke nana iyono e rori nẹ ovwan a dia, ovwan ke rha hẹrhẹ nẹ e gbe yono ovwan iji rẹ ota rẹ Ọghẹnẹ. Ovwan guọnọ evie, ọ dia emuọre ọgangan.

¹³Kidie kohwo kohwo ro vie evie yo ji vwo obọ vwẹ ọvwata rẹ Ọghẹnẹ-ẹ, kidie yọ je hẹ omotete vwobọ.

¹⁴Ẹkẹvuọvo emuọre ọgangan ọye a vwọ kẹ omirẹgua, kẹ eye ri vwo ọhọ ri se vwo vughe emu esiri vẹ ọbrabra.