Read urhobo Jems 1 Bible Online

Jems 1 - urhobo bible

Jems 1

¹Jems odibo rẹ Ọghẹnẹ kugbe Ọrovwavwanre Jesu Kristi, ri si ọbe nana rhe orua ihwivẹ na re hrabọ ro akpọ na ejobi, mi yere ovwan.

²Imoni mẹ, ovwan ghọghọ, vwẹ ọke rẹ ọdavwini de te ovwan oma;

³jo mu we ẹro nẹ odavwini de te ohwo ro vwo esegbuyota oma, ko vwo emudiaga.

⁴Gbe jẹ emudiaga wẹ ru iruo rọ gbare, rere wọ vwọ sa gbare tototo, wo jẹ emu ọvuọvo kare owẹ-ẹ.

⁵Ẹkẹvuọvo ohwo ro rhe vwo aghwanre vwẹ usun rẹ ovwa-an, e jọ nọ vwẹ obọ rẹ Ọghẹnẹ, ọye ri se siobọ nẹ kemu kemu kẹ ohwo, ọ ghwọ kuẹ ohwo-o; kọ vwọ kẹ.

⁶Ẹkẹvuọvo e gbe jo vwo esegbuyota kpahe obo rọ nọre na, o rhe vwo evun ivẹ-ẹ, ohwo ro vwo evun ivẹ ọ họho abadi rọ họnra rẹ odju muẹ cha muẹ kpo.

⁷E gbi jẹ ohwo yena roro nẹ ọye cha mrẹ emuọvo reyọ vwẹ obọ rẹ Ọrovwohwo-o.

⁸Ohwo ro roro iroro ivivẹ, ro hwe oma muẹ vwẹ asan ọvo-o.

⁹E jẹn omoni ro dia ovwiogbere ghọghọ fikiridie e vwiro kpenu.

¹⁰Ẹkẹvuọvo odafe je ghọghọ fikiridie e vwiro kpotọ, kidie kirobo rẹ ododo vwioro o mi she kufia na, eriyin akpọ rọye cha dia.

¹¹Kidie ọnre cha bẹrẹ rhe vẹ uvo ogangan, rhi mu ẹbe na, i mi rhi vwioro, idodo na mi rhi she kufia, erhuvwu rọye ejobi mi rhi ghwru kufia: eriyin ọdafe vẹ oyan rẹ eki rọye je cha phoriẹn kufia.

¹²Ebruphihọ kẹ ohwo ro chirako vwẹ ọke rẹ odavwini: fikiridie o de mudia gan, ko vwo erhu rẹ arhọ na, rẹ Ọrovwohwo ve phihọ kẹ otu re guọnerọ.

¹³Ọke rẹ odavwini de te we oma, wọ ta nẹ, Ọgbẹnẹ re davwẹ ovwẹ ni-i; fikiridie asan vwẹ umwemwu davwẹ Ọghẹnẹ nẹ-ẹ yẹ okpuyovwi rọye davwẹ ohwo ọvuọwo nẹ-ẹ.

¹⁴Ẹkẹvuọvo ọke rẹ urhuru si vwe vẹ ẹguọnọ rẹ ugboma na de rhi bunọ re, ke ghwa ọdavwini cha.

¹⁵Ọke rẹ ẹguọnọ rẹ ugboma da rhe mrevun re ko vwiẹ umwemwu; umwemwu de rhi bunọ re kọ ghwa ughwu cha.

¹⁶Imoni mẹ, wo ja phiẹn ovwa-an.

¹⁷Kemu kemu esiri na ejobi obo odjuvwu i nẹ cha, nẹ obo rẹ osẹ rẹ urhukpẹ na cha ohwo ro vwo ẹrhẹriẹ-ẹ, rẹ uhoho re ebri ọvuọvo rheri-i.

¹⁸Ọhọre obọ rọye o vwọ reyọ avwanre ru emọ vwẹ oma rẹ ota rẹ uyota na, o de ru avwanre rere, avwanre vwọ dia oka rẹ emamọ rẹsosuọ rẹ ihwo rọ ka ma.

¹⁹Imoni mẹ re ghare, ovwan riẹn ọnana. Ẹkẹvuọvo e ji kohwo kohwo fobọ nyo ẹme, ọ fobọ, kpahe ota-a, ọ fobọ mu ophu-u.

²⁰Kidie ophu vẹ ota ọbrabra rẹ ohwo rẹ akpọ cha fobọ shephihọ uruemu esiri rẹ Ọghẹnẹ guọnọre-e.

²¹Fiki rẹ eriyin na, ovwan gbe siobọ nẹ eta imiomiovwi na kugbe imwemwu rẹ ovwan, re wa vwẹ oma kpotọ reyọ ota ra kọn phihọ udu rẹ ovwan na, ro se sivwi erhi rẹ ovwan.

²²Ẹkẹvuọvo ovwan dia ihwo re sa vwẹ ota na ruẹ emu e dia ihwo ri nyo ọvo-o, re phiẹn omaobọ rẹ ayen.

²³Fikiridie ohwo ro di nyo ota na ọvo rọ dia ohwo ro se ruẹ-ẹ, ọ họhọ ohwo rọ vwẹ ughegbe ni opharo;

²⁴Kidie ọ vwiro ni oma nu ọ da ro otafe siẹvuọvo na oma ro niri na da ghwa chọrọ ẹro.

²⁵Ẹkẹvuọvo ohwo rọ nabọ ni urhi na fiotọ, urhi rẹ egbomọphẹ na, rọ nabọ fuẹrẹ, ọ dia ohwo ro nyo nẹ ọ chọrọ ẹro-o ẹkẹvuọvo rọ da dia ohwo ro nyo nẹ ọ ru, ko vwo ebruphihọ vwẹ iruo rọye.

²⁶Ọ da dianẹ ohwo rori nẹ ọye ọgba rẹ egagọ, rọ sẹro rẹ ẹrevwe rọye-e, ẹkẹvuọvo rọ da phiẹn udu rọye, yẹ egagọ rẹ ohwo yena ofefe.

²⁷Omamọ rẹ egagọ ro jẹ ẹgua evwo vwẹ obaro rẹ Ọghẹnẹ rẹ avwanre kugbe Ọsẹ rẹ avwanre na ọ na, rere o mie te asan rẹ emephran orivwi kugbe eyauku re hẹ ukpokpogho, rere o rhe si oma rọye phrẹphrẹ nẹ etatọrọ rẹ akpọ na.