Read urhobo Jems 2 Bible Online

Jems 2 - urhobo bible

Jems 2

¹Imoni mẹ, wa vwẹ esegbuyota rẹ Ọrovwavwanre Jesu Kristi, Ọrovwohwo rọ vọnre vẹ urinrin na, vwo ni ohwo ẹro-o.

²Kidie ọ da dianẹ ohwo rhe evun rẹ ishọshi, rọ ghwẹ iro vẹ emwa iyoyovwi phihọ oma, ohwo ọfa rọ vwẹ ebẹre emwa rhuo da je rhe;

³wo de mu ọghọ kẹ ohwo rọ vwẹ emwa iyoyovwi rhuo na ta nẹ, Tidia omamọ rẹ asan, wa me rha ta kẹ ovwiogbere na nẹ, Mudia etiyin, eyẹ tidia akpanurhe yena;

⁴wo ji vwo ọfẹne vwẹ oma rẹ ovwan nu, wo ji hirhe oma phihọ oguẹdjọ umwemwu rọ vọnre vẹ iroro ọbrabra nu?

⁵Ovwan kerhọn, imoni mẹ re ghare. Ọ dia Ọghẹnẹ ọvo re sanọ ihwo rẹ akpọ se nẹ ovwiogbere na nẹ e rhe dia edafe rẹ esegbuyota kugbe ireuku rẹ uvie ro veri kẹ otu re guọnerọ na?

⁶Ẹkẹvuọvo ovwan phọphọ ovwiogbere na nure. Ọ dia otu rẹ edafe na ri shenyẹ ovwan otọna-a, o dia ayen ri ji kpono ovwan kpo ẹguare na-a?

⁷Ọ dia ayen ri ji miovwẹ odẹ oyoyovwi re mu ke ovwa na-a?

⁸Ọ da dianẹ ovwan yọnrọ uvi rẹ urhi na rẹ ovwan de nene obo rẹ ọbe ọfuanfon na tare nẹ, Guọnọ ọrivẹ wẹn kirobo wọ guọnọ oma wẹn, yu wo riẹn ru.

⁹Ẹkẹvuọvo wo de nẹ ẹro kẹ ohwo ọvo jẹ ọvo vwo, yu wo ru umwemwu, ke bru hwe we kirẹ ohwo rọ chọ urhi.

¹⁰Kidie kohwo kohwo rọ yọnrọn urhi na ejobi gba, ro de miovwi ọvo vwọ, yo gbe urhi na ejobi ku.

¹¹Kidie ohwo ro ji urhi nẹ, wo gbe igberadja-a, ọye ọvo re je ta nẹ, wọ dia ozighe-e. Ọ da dianẹ wo gbe igberadja-a, ẹkẹvuọvo wo da dia ozighẹ, ye wọ chọ urhi na nure.

¹²Ru kirobo re wọ tare, rere a vwẹ owẹ guẹdjọ kerẹ ihwo ri nenẹ urhi rẹ egbemọphẹ na.

¹³Kidie ohwo ro ni arodọvwẹ-ẹ ọ je cha mrẹ arodọvwẹ vwe ọke re de brorhiẹ rọye-e.

¹⁴Imoni mẹ, didi erere ri te ohwo, ọ da dianẹ ohwo tare nẹ ọye vwo esegbuyota ẹkẹvuọvo yo vwiro ru iruo-o? Kẹ esegbuyota yena se sivwo?

¹⁵Ọ da dianẹ omoni wẹn rẹ ọshare eyẹ ọ rẹ aye da ban phihọ, owẹvwe ki rhe ji hwe,

¹⁶Ohwo ọvo vwẹ usun rẹ ovwan na da ta kẹ ayen nẹ, yanran kpo vẹ ufuoma, jẹ evun vọn wẹ re oma wẹn tuabọ yọ vwẹ emu rẹ ayen guọnọre kẹ aye-en, kidie ọyena firi?

¹⁷Eriyin, esegbuyota re vwo ru iruo-o, yo ghwuru.

¹⁸Ẹkẹvuọvo gbe no, ohwo ọvo me ta nẹ, Wo vwo esegbuyota, okpuyovwi mẹ vwo ogangan rẹ iruo. Gbe djẹ esegbuyota wẹn ro vwo iruo-o na kẹ vwẹ, rere me rha wan oma rẹ iruo mẹ djẹ esegbuyota mẹ kẹ wẹ.

¹⁹We segbuyota nẹ Ọghẹnẹ ọvuọvo; etiyin uyota; idẹbono ji segbuyota, o de gue oma.

²⁰Ẹkẹvuọvo mi ju wẹ riẹn ẹkpa na, nẹ esegbuyota re vwo ru iruo-o yẹ ẹga oruẹ?

²¹Ọ dia iruo rẹ Ebraham ruru e vwo se ọvwata, rọ vwọ reyọ Aizik ọmọ rọye vwo ze izobo vwẹ enu rẹ agbada?

²²Wọ mrẹre nẹ esegbuyota vwọ ba iruo rọye vwi fiki rẹ iruo na kọye a vwọ mrẹ esegbuyota na vughe.

²³Ọbe ọfuanfon na da gba rọ tare nẹ, Ebraham de se Ọghẹnẹ gbuyọta, ọ da nẹrhẹ e kere phihọ ọvwata; e de se ugbeyan rẹ Ọgbẹnẹ.

²⁴Ovwan mrẹre nẹ fiki rẹ iruo a vwọ dia ohwo esiri, ọ dia fiki rẹ esegbuyota ọvo-o.

²⁵Ọ rha je dia fiki rẹ iruo na e vwo se Rehab rẹ igberadja na ohwo esiri, ọ ro se erhorha na phihọ uwevwi, ro de djẹ idjerhe kẹ ayen?

²⁶Kirobo rẹ ẹnwẹn de nẹ ohwo o mi ghwu na, eriyin esegbuyota ro vwo iruo-o ji ghwu rhe.