Read urhobo Jems 5 Bible Online

Jems 5 - urhobo bible

Jems 5

¹Edafe na, ovwan mọ, wa viẹ we bunu vwọ kẹ ukpokpogho ro bru ovwan cha na.

²Efe rẹ ovwan gbori putuputu, eghwọghwọ re emwa rẹ ovwan ejobi rẹ.

³Iro vẹ idọnọ efuanfon rẹ ovwan mu ekegba; ekegba na ke cha rhoma se iseri hwẹ ovwan vwẹ obọ, ke cha torhe ovwan kerẹ erhanre. Ukuko rẹ akpọ na ovwan ke cha ghwẹ efe koko gbidi.

⁴Gbe nighe osa rẹ ihwo re wan ewan kẹ wẹ, rẹ wọ teye bọma, i ro brenu hwe we; enuebro rẹ ihwo ri vun enẹ kẹ wẹ, Ọrovwohwo Ọghẹnẹ rẹ ofovwi nyo ayen ejobi re.

⁵Ovwan nabọ re akpọ na yoyovwi, avwerhe rẹ ovwan rere ọbasa-an; ovwan reyọ ekuakua rẹ ihwo rẹ ovwan hweri ekueku vwọ ghẹrẹ udu rẹ ovwan.

⁶Ovwan brorhiẹ hwe, ovwan teyọ ihwo esiri na hwe; yẹ ayen nenẹ ovwan si oma-a.

⁷Imoni mẹ, ovwan gba vwẹ erhiori hẹrhẹ, bẹsiẹ rẹ Ọrovwohwo cha vwọ rhe. Nighe ọghwẹrẹ vwẹ erhiori hẹrhẹ emamọ rọ kọnre, bẹsiẹ rẹ osio ke rhe rhọ, re emamọ na cha vwọ ghwo.

⁸Ovwan vwo erhiori rere wan vwẹ udu te otọ; kidie ẹcha rẹ Ọrovwohwo si kẹre re.

⁹Imoni mẹ, ovwan guẹ ohwohwo-o, rere e vwo jẹ ovwan eguo; nighe, obrorhiẹn mudia vwẹ anurhoro re.

¹⁰Imoni mẹ, ovwan gba vwẹ ẹro keri erhiori vẹ oja rẹ otu rẹ emraro rẹ awanre na, re ta ota vwẹ odẹ rẹ Ọrovwohwo rere.

¹¹Nighe, ebruba kẹ ihwo ri chirako rhi te oba; ovwan ji nyo usi rẹ obo rẹ Ọrovwohwo ru kẹ Job te, vwẹ okuko rọye, obo ro nẹ arodọvwẹ kẹ te.

¹²Ẹkẹvuọvo ọ rọ marho ejobi, imoni mẹ, ovwan vwẹ odjuvwu eyẹ akpọ duvwẹ iyori-i; eyẹ kemu kemu ofa-a; ẹkẹvuọvo jẹ ẹjo wẹn dia ẹjo, rere e wẹn dia e; rere e vwo ju we ebrohwe.

¹³Ono re reoja vwẹ uherevie rẹ ovwan? e jọ nẹ ẹrhovwo. Ohwo rẹ ivun vwerha? E jọ so une rẹ ejiro.

¹⁴Ono rẹ honvwan vwẹ uherevie rẹ ovwan? e jo se ekpako rẹ ishọshi; rere ayen nẹ ẹrhovwo kẹ, rere ayen vwẹ evwri ghworo vwẹ odẹ rẹ Ọrovwohwo.

¹⁵Omamọ rẹ ẹrhovwo rẹ esegbuyota ko sivwi ohwo rọ họnvwan na, Ọrovwohwo kọ kparọ vrẹn; ọ da dianẹ o ru imwemwu jovwo, kẹ vwo ghovwo.

¹⁶Ovwan rhọvwe imwemwu rẹ ovwan kẹ ohwohwo, rere ovwan ohwohwo nẹ ẹrhovwo kẹ ohwo, rere e vwo sivwi ovwan. Ẹrhovwo rẹ ọvwata sẹ nọ umuesia.

¹⁷Ilaija ọye ohwo kirobo rẹ avwanre epha na, ọ da nẹ ẹrhovwo nẹ osio rhọ-ọ, osio ghine rhọ ọsoso rẹ ẹgbukpe erha gbẹ emeranvwe esa-an.

¹⁸O da rhoma nẹ ẹrhovwo; osio ke rhe rhọ, otọ ki rhi di ẹbe.

¹⁹Imoni mẹ, ọ da dianẹ ohwo ghwru nẹ idjerhe rẹ uyota na, rẹ ohwo ọvo de kuorhẹriẹ;

²⁰e gbe jọ riẹn nẹ, ohwo ro yono oruimwemwu kurhẹriẹ nẹ idjerhe rọye o sivwẹ erhi ọvo nẹ ughwu, ọ ke rha vwẹ ukpo rhurhu imwemwu muotọ.