Read urhobo 1 Pita 3 Bible Online

1 Pita 3 - urhobo bible

1 Pita 3

¹Ovwan eya ri kpo orọvwe, wa vwẹ oma kpotọ kẹ eshare rẹ ovwan, rere otu evo, ri se ota na gbuyota-a dede, a sa vwi fiki rẹ uruemu rẹ eya na ku ayen rhẹriẹ,

²siẹ rẹ ayen da mrẹ eyere esiri rẹ ovwan kugbe ọfanrhiẹ rẹ ovwan sioma nu.

³We jẹn ọsẹnvwe rẹ ovwan dia ọ rẹ ẹtoeme ọvo-o, iro re vwo gidi oma eyẹ ikpemwa-a,

⁴ẹkẹvuọvo e jẹn dia ohwo rọ djahere vwẹ obo udu vẹ evwarha ri jẹghwọrọ re dẹndẹn bọrọ bọrọ, rọ ghare gangan vwẹ obaro rẹ Ọghẹnẹ.

⁵Ọtiọye eya efuanfon rẹ awanre re vwẹ ẹro so Ọghẹnẹ ja sẹ osẹnvwe rẹ ayen da vwẹ oma kpotọ kẹ eshare rayen,

⁶kirobo ri Sera mu ọghọ kẹ Ebraham, ro vwo se ọrovwovwe. Asakiephana ovwan kẹ emọ rọye ru we de ru obo ri yoma rẹ emu ọvuọvo rhe guegue ovwa-an.

⁷Eriyin rhe ovwan eshare ri vwo eya, wa vwẹ iroro nene eya rẹ ovwan yeri, brigu hẹ ayen oma kidie eya na imihwo yẹghẹ, kidie te ovwan te eya na ri gbe koko reuku rẹ ẹserọphẹ rẹ arhọ na, rere e vwo jẹ ẹrhovwo rẹ ovwan ẹdajo.

⁸Ọ rọ ka oba, ovwan ejobi, ku evun gbe vwẹ erhi, re ehrọre, guọnọ imoni na, vwo udu ọlọlọhọ-kugbe udu dẹndẹn.

⁹Wa vwẹ umwemwu hwa osa rẹ umwemwu-u eyẹ ekan hwa osa rẹ eka-an; ẹkẹvuọvo ukpe rẹ ọyena nẹ ẹrhovwo, kidie ọna e se ovwan rhe, rere ovwan vwo vwo ebruphihọ.

¹⁰Kidie. Ohwo rọ guọnọ arhọ rọ guọnọ ẹdẹ esiri mrẹ, e jo si ẹrenvwe rọye nẹ eta ebrabra rere ẹbẹrunu rọye vwo jẹ eta rẹ abe eta;

¹¹e jo sioma nẹ umwemwu ro ru ọ rẹ esiri; e jọ guọnọ ufuoma rọ vwọ tua.

¹²Kidie ẹro rẹ Ọrovwohwo e hẹ enu rẹ ọvwata, erhọ rọye rhie phihọ kẹ ẹrhovwo rayen, Ẹkẹvuọvo Ọrovwohwo mukpahe otu ri ruẹ umwemwu.

¹³Asakiephana kono re sa wan ovwan oma rẹ oruru rẹ emu esiri eruo de rhe ovwan?

¹⁴Ẹkẹvuọvo ọ da dianẹ ovwan reoja vwi fiki rẹ ọvwata, ke bruphihọ kẹ ovwan. Wa djẹ oshọ rẹ aye-en, eyẹ we bru udu-u,

¹⁵ẹkẹvuọvo mu ọghọ kẹ Kristi kerẹ Ọrovwọhwo vwẹ obo udu wẹn. Choma kọke kọke re wọ vwọ chọ ochọ rẹ iphiẹrohọ rọ hẹ evun wẹn, dede na ruo dẹndẹn vẹ ọghọ;

¹⁶jẹ evun wẹn fon, rere, ọke ra da harhe owẹ, ayen otu re harhe uruemu esiri ru wo ru kẹ Kristi oma vwọ vo ayen.

¹⁷Kidie oyoma ra vwọ reoja fiki rẹ obo ri yovwiri, ọ da dia ẹguọnọ rẹ Ọghẹnẹ, nọ ra vwọ reoja fiki rẹ umwemwu re ruru.

¹⁸Kidie Kristi ghwu kẹ umwemwu obọvo kẹ ihwo ejobi nure, ọvwata ghwu kẹ iruimwemwu, rere ọ vwọ sa reyọ bru Ọghẹnẹ ra, e hwere ghwu vwẹ ugboma ẹkẹvuọvo ọ rhọre vwẹ evun rẹ erhi;

¹⁹etiyin o nu ra de re ghwoghwo kẹ erhi re hẹ uwodi,

²⁰ihwo ri mu ọghọ jovwo, ọke rẹ Ọghẹnẹ vwọ vwẹ odiri hẹrhẹ vwẹ ọke ri Noa, ọke rọ vwọ kare okọ na, re imihwo krẹn, kọye hẹ, ihwo ẹrenre, re sivwi nẹ oghwe na.

²¹Ame ẹreyọ na, rẹ ọ vẹ ọnana shephihọ na, o sivwẹ ovwan vwẹ asakiephana, o dia inuhu rẹ ugboma a hworhẹ fia-a ẹkẹvuọvo ọye ota rẹ evun ọfuanfon kẹ Ọghẹnẹ, vwẹ oma rẹ evrenushi ri Jesu Kristi,

²²ro kpo obo odjuvwu ro de tidia obọrhe rẹ Ọghẹnẹ, vẹ emakashe, otu ri suẹn kugbe ogangan ejobi da vwẹ oma kpotọ kẹ.