Read urhobo 1 Pita 4 Bible Online

1 Pita 4 - urhobo bible

1 Pita 4

¹Ri Kristi vwọ reoja vwẹ ugboma nure na, gba vwẹ iroro ọvuọvo yena choma, kidie kohwo kohwo rọ reoja vwẹ ugboma nure yọ vabọ rẹ imwemwu,

²vwẹ ọtiọye na ovwan ki yere akpọ rẹ ovwan ro chekọ ọ gbe dia ọ rẹ urhuru sivwe rẹ ugboma ọfa-a ẹkẹvuọvo kẹ ọ rẹ ọhọre rẹ Ọghẹnẹ.

³Gbe jẹn ọke rọ wanre na te kẹ eruo rẹ obo ri Keferi guọnọ ruẹ, ri ruẹ fanrhiẹ fanrhiẹ, urhuru sivwe, idi-ẹda, re mrẹ ọre ghọghọ, idi-emuo, ẹdjọ ro gbegọ.

⁴Ko gbe ayen unu nẹ asakiephana ovwan gbi rhe nene ayen do edo yangha yangha na-a, kẹ ayen harha ovwan;

⁵ẹkẹvuọvo ayen cha nẹ iyẹnrẹ kẹ ohwo ro choma ro vwo guẹdjọ rẹ ihwo ẹkpokpọ vẹ ighweghwu.

⁶Kidie fiki rẹ ọnana e vwo ghwoghwo iyẹnrẹ esiri na kẹ otu ri ghwuru, dede nẹ a vwẹ ayen guẹdjọ vwẹ ugboma kerẹ ihwo na, re ayen sa dia vwẹ erhi kerẹ Ọghẹnẹ.

⁷Oba rẹ emu na ejobi si kẹre re; fiki rẹ ọtiọye na gbe ru dọe re ẹro hiẹ wẹ vwẹ ọke wọ da nẹ ẹrhovwo.

⁸Ọ rọ marho ejobi ovwan vwo ẹguọnọ kẹ ohwohwo, kidie ẹguọnọ rhurhu imwemwu buebu.

⁹Ovwan ghọ erhorha we guẹ-ẹ.

¹⁰Kirobo ra kẹ ovwan okẹ bu te, ovwan je kẹ ohwohwo rhe, kerẹ omuidi rẹ esiri rẹ Ọghẹnẹ ro ghara ẹserọphẹ rọye.

¹¹Kohwo kohwo rọ ta ota, ọ me ta kerẹ ọboepha rẹ Ọghẹnẹ; kohwo kohwo rọ gọ ẹga, ọ me ga vwẹ ogangan rẹ Ọghẹnẹ vwọ kẹ; rere vwi kemu kemu ejobi a sa vwẹ urinrin kẹ Ọghẹnẹ vwẹ oma ri Jesu Kristi. Ọye a vwẹ urinrin kẹ kugbe isuesun bẹdẹ bẹdẹ. Isẹ.

¹²Imoni, we jẹ ọdavwini rẹ odjadja rẹ erhanre ro bru ovwan rhe rhe davwe ovwan ni na gbe ovwan unu-u, kerẹsiẹ ra mrẹ nẹ emu ọkpokpọ re phia kẹ ovwan.

¹³Ẹkẹvuọvo ghọghọ ra vwọ mrẹ nẹ wọ je re vwẹ ekẹn oja ri Kristi, rere ovwan sa vwọ ghọghọ re oma vwerhe ovwan vwẹ ọke rẹ urinrin rọye da cha phia.

¹⁴A da ghwọ ku ovwan fiki rẹ odẹ ri Kristi, yẹ e bruba kẹ ovwan, fikiridie erhi rẹ urinrin kugbe ọ rẹ Ọghẹnẹ vẹ ovwan herọ.

¹⁵Ẹkẹvuọvo e jẹn ohwo ọvuọvo reoja kerẹ ozighẹ-ẹ, eyẹ oji-i, eyẹ ọvwuvumwemwu-u, eyẹ ọta-ọpata-a;

¹⁶yẹ ohwo ọvo da rhe reoja kerẹ ohwo ro nene Kristi, e jẹn oma vuọ-ọ, ẹkẹvuọvo vwẹ otọ re oja yena e jẹn ọ vwẹ urinrin kẹ Ọghẹnẹ.

¹⁷Kidie ọke na tere rẹ ẹdjọeguo na che vwo muhọ vwẹ evwruwevwi rẹ Ọghẹnẹ re; ọ da dia avwanre o vwo muhọ, komavọ oba rẹ ayen otu ri mu ọghọ kẹ iyẹnrẹ esiri rẹ Ọghẹnẹ na-a cha dia?

¹⁸Ọ da dianẹ ọ pha bẹnbẹn re e vwo sivwi ọvwata, tivọ ihwo ri gbe ẹgua kugbe iruimwemwu da cha vwẹ oma phia?

¹⁹Fiki rẹ ọtiọye na e gbẹ jẹn ayen otu re reoja kirobo rẹ ọhọre rẹ Ọghẹnẹ epha ru obo ri yoma rere ayen phi ẹnwẹn rayen phihọ obo rẹ ọmẹma rẹ esiri na.