Read urhobo 2 Pita 1 Bible Online

2 Pita 1 - urhobo bible

2 Pita 1

¹Ọbe ri Saimọn Pita, odibo kugbe ọyinkọn ri Jesu Kristi, ro si rhe ayen otu ri vwo esegbuyota nure re vẹ avwanre gba hẹ abavo vwẹ evun rẹ ọvwata rẹ Ọghẹnẹ rẹ avwanre kugbe Osivwi rẹ avwanre Jesu Kristi.

²E jẹn ẹserọphẹ kugbe ufuoma buphihọ kẹ ovwan vwẹ evun rẹ erianriẹn rẹ Ọghẹnẹ kugbe Jesu Ọrovwavwanre.

³Ogangan rọye kẹ avwanre emu ejobi ro fori kẹ arhọ vẹ ẹfuọn, vwẹ oma rẹ erianriẹn rẹ ohwo ro se avwanre rhe urinrin rọye kugbe erhuvwu rọye.

⁴Vwẹ oma rọye ọ wan kẹ avwanre ive rọye rode ghaghare, rere vwẹ oma rẹ enana avwanre vwọ sa vabọ rẹ emu igbegbe re hẹ evun rẹ akpọ na fiki rẹ urhuru si vwe, rere avwanre se vwo obọ vwẹ oma rẹ ọrho rẹ Ọghẹnẹ na.

⁵Fiki rẹ ọnana dẹn na gba pharhe rere ovwan vwẹ uyoyovwi vwọ ba esegbuyota, uyoyovwi vwọ ba erianriẹn,

⁶erianriẹn vwọ ba oma ẹnyẹ vẹ emudiagan, emudiagan vẹ ẹfuọn,

⁷ẹfuọn vẹ ẹguọnọ rẹ imoni, ẹguọnọ rẹ imoni vẹ ẹguọnọ.

⁸Kidie emu nana da dia ewẹn ri de bu, ke djẹ wẹ ephieghe vwẹ evun rẹ erianriẹn rẹ Ọrovwavwanre Jesu Kristi.

⁹Kidie ohwo kohwo rẹ imu nana kanre yo rhuẹro yẹ orẹmrẹ rọye sheri-i yọ gbe rha karohọ nẹ a hworhẹ ọye nẹ imwemwu rẹ awanre na-a.

¹⁰Fiki rẹ ọtiọye na, imoni, gbe jẹ oruru rẹ use vẹ ẹjẹreyọ na gan vwẹ oma rẹ ovwan, kidie ovwan de ru ọnana ovwan gbi she bẹdẹ-ẹ.

¹¹Vwẹ ọtiọye na ka rhuẹrẹ idjerhe kẹ ovwan rẹ ovwan cha wan kpo uvie ri bẹdẹ na rẹ Ọrovwavwanre kugbe Osivwi rẹ avwanre Jesu Kristi.

¹²Fiki rẹ ọtiọye na ke me karohọ ovwan emu nana kọke kọke, dede na yẹ ovwan riẹn ayen yẹ owọ rẹ ovwan muotọ vwẹ evun rẹ uyota rẹ ovwan vwori na.

¹³Mi rori nẹ o yovwiri, vwẹ uche ọke ro krite re me vwọ hẹ ugboma nana, re me vwọ kpare iroro rẹ ovwan re me vwọ karohọ ovwan.

¹⁴Re me vwọ riẹn nẹ ọke ri mi che vwo ku ughoma nana phihọ otọ si kẹre re, kirobọ rẹ Ọrovwavwanre Jesu Kristi vwerọ nẹ vwẹ.

¹⁵Ke me mrẹ nẹ ọke ri mi de kpo nu ovwan vwọ sa karohọ ayen.

¹⁶Kidie avwanre nene ona rẹ esia ẹrhọghọ-ọ vwẹ ọke rẹ avwanre vwo dje ogangan na kugbe ẹcha rẹ Ọrovwavwanre Jesu Kristi kẹ ovwa-an, ẹkẹvuọvo avwanre rhie ẹro mrẹ avwanre jẹ dia iseri rẹ ọrho rọye.

¹⁷Kidie ọke rọ vwọ reyọ ọghọ kugbe urinrin mie Ọghẹnẹ Ọsẹ na kugbe ọke rẹ urhuru rẹ ọ ro vwo Ọrho kugbe Urinrin na vwọ dia oseri nẹ, Ọnana hẹ Ọmọ mẹ ro je vwe rẹ ivun rọye vwerhovwẹ,

¹⁸avwanre hẹ iseri rẹ urhuru nana ro se nẹ odjuvwu rhe na, kidie avwanre vẹ ọye re gba hẹ enu rẹ ugbenu ọfuanfon na.

¹⁹Ota rẹ aroẹmrẹ na ko muẹro phihọ. Ovwan ke riẹn ru rẹ ovwan da kerhọn rẹ ọnana kerẹ urhukpẹ rọ la vwẹ evun rẹ ebri, bẹsiẹ rẹ ọke vwo rhiẹ rẹ isio rẹ urhiọke cha vwọ varhe vwẹ udu rẹ ovwan.

²⁰Vwẹ ẹsosuọ ejobi we gbe jẹ ọnana ro ovwan, nẹ aroẹmrẹ re hẹ ọbe ọfuanfon na de dia obo rẹ ohwo ọvo di muẹ otọ rọye fa-a,

²¹fikiridie o vwo aroẹmrẹ ọvuọvo ro di nẹ udu rẹ obọ rẹ ohwo cha-a, ẹkẹvuọvo ihwo rẹ Erhi Ọfuanfon na muru re ta ota ro nẹ obọ rẹ Ọghẹnẹ rhe.