Read urhobo 2 Pita 2 Bible Online

2 Pita 2 - urhobo bible

2 Pita 2

¹Ẹkẹvuọvo emraro rẹ efian rhi mu vwẹ ohri rẹ ihwo na, kirobo rẹ iyono rẹ efian je hẹ ohri rẹ ovwan na, re bẹbẹ vwẹ uyono rẹ ohra cha, re tobọ siẹn Onini na ro dẹ ayen na, rọ nẹrhẹ ughwu rhe ghwọrọ ayen kpregede.

²Ihwo buebu che nene ọfanrhiẹ rayen, ka cha vwi fiki rẹ ayen harhe idjerhe rẹ uyota na.

³Fiki rẹ urhuru kugbe ọphiẹvwe rayen ke cha vwẹ ovwan chueki; nẹ awanre rhe ọye obruhwe rayen vwọ hẹ otọ, o vwo ovwerhẹ vwẹ ọke rẹ ẹghwọrọ raye-en.

⁴Kidie ọ da dianẹ Ọghẹnẹ vwo ghwovwo emakashe ri ru umwemwu-u, ẹkẹvuọvo ọ da kpare ayen phihọ erhanre e de mu ayen phihọ ukpotọ rẹ obo etan rẹ ebri hwi bẹsiẹ rẹ ẹdẹ ẹdjọ vwo te;

⁵ọ da dianẹ o vwo ghovwo akpọ rẹ awanre-e, ẹkẹvuọvo ọ da sẹro ri Noa, aghwoghwo rẹ ọvwata, kugbe ihwo ighwrẹ efa, ọke rọ rhe vwọ vwẹ oghwe ghwọrọ akpọ rẹ ihwo umwemwu na;

⁶ọ da dianẹ ro vwo hirhe irere ri Sodọm vi Gomora vwọ hẹ iwurhie o de vwo bruhwe ayen nẹ e phoro ayen nẹ akpọ na rọ vwọ dia oniru kẹ ayen ihwo umwemwu;

⁷ọ da dianẹ o sivwi Lọt rẹ ọvwata na, rẹ ofu rẹ ọfanrhiẹ rẹ ihwo umwemwu djeri

⁸(fiki rẹ obo rẹ ọvwata yena mrẹre ro nyori rọ vwọ hẹ ohri rẹ ayen na, ophu de muo vwẹ erhi rẹ ọvwata rọye kẹdẹ kẹdẹ vwi fiki rẹ ozighi rẹ uruemu rayen),

⁹kẹ ọtiọye Ọrovwohwo je riẹn obo ro sivwi ihwo efuanfon rọye nẹ ọdavwini, ọ me rha sẹrọ rẹ ohwo umwemwu hẹrhe ehwe bẹsiẹ rẹ ẹdẹ rẹ ẹdjọeguo na vwo te.

¹⁰Marho kẹ ayen otu ri keke oma phihọ urhuru si vwe rẹ ugboma ri gbe ẹgua vẹ ọmeme kugbe otu re jẹ ogangan rẹ isuesun fia. Ihwo vẹ udu re vwẹ ẹro koko ruẹ imwemwu, oshọ muẹ aye-en ri di muẹ ihwo yoyovwi harha.

¹¹Emakashe dede re rho nọ ayen vwẹ ẹgba vẹ ogangan, se yivwẹ harha eyẹ guẹdjọ kpahe ayen vwẹ obaro rẹ Ọrovwohwo-o.

¹²Ẹkẹvuọvo ihwo nana, kerẹ eranvwe ri jẹ ọhọ evwo na, emama ri di muẹ bo, re di vwiẹ re muẹ ra teyọ hwe, di muẹ ekan harha vwẹ oma rẹ ota rẹ ayen riẹn emuọvo kpahe-e, ka cha ghwọrọ ayen kugbe vwẹ evun rẹ ẹghwọrọ ọvuọvo na.

¹³Kẹ ayen cha reoja vwi fiki rẹ oruchọ rẹ ayen. Omavwerha ayen siẹ rẹ ayen de di muẹ do vwẹ ogheruvo. Ayen họhọ apa vẹ upe, ri muẹ van vwẹ ọke re da ghwọ, ye vwẹ aghẹghẹ nene ovwan ha eha.

¹⁴Ẹro rẹ ayen vọnre vẹ igberadja, evun rẹ umwemwu vọn aye-en. Ayen riẹriẹ ihwo ri mudia ga-an. Ayen yono udu rayen phihọ urhuru evwo. Emọ ra harhere!

¹⁵Ihwo re siẹn omamọ rẹ idjerhe re da yan ghwru; ayen nene idjerhe ri Balaam, ọmọ ri Biọ, rọ guọnọ erere nẹ evun rẹ umwemwu rhe,

¹⁶ẹkẹvuọvo a da harhọ fiki rẹ ogbeku rọye; ekẹtẹkẹtẹ ro diunu da vwẹ urhuru rẹ ohwo rẹ akpọ ta ota rọ da da orhuẹ rẹ ọmraro na ji.

¹⁷Enana hẹ ito re kpọ yamu kugbe evwru rẹ ogiribo muẹ; kidie a rhanre okuku hwi na hẹrhẹ ayen.

¹⁸Kidie, ọke rẹ ayen da vwẹ ugbeghẹ yan eyan, yẹ ayen vwẹ ọfanrhiẹ vẹ urhuru si vwe riẹriẹ ihwo re je sa vabọ rẹ oruchọ rẹ aye-en.

¹⁹Ayen vwẹ egbemọphẹ kẹ ayen, ẹkẹvuọvo yẹ ayen eviẹn rẹ emu ogbegbe; kidie kemu kemu ro se phi ohwo kparobọ, ọye ohwo vwẹ oma ru ọviẹn kẹ.

²⁰Kidie ọ da dianẹ ọke rẹ ayen vwọ vabọ rẹ ẹgua rẹ akpọ na vwẹ oma rẹ erianriẹn rẹ Ọrovwohwo kugbe Osivwi rẹ avwanre Jesu Kristi, ayen da rhoma she phihọ ufi rẹ ayen rọ da pẹtiẹ ayen, eyenre rẹ ayen vwẹ ukuko na kọ rhoma miovwi nọ ọ rẹsosuọ.

²¹Kidie mane o yovwi kẹ ayen o dianẹ kẹ ayen je riẹn idjerhe rẹ ọvwata-a nọ ra da riẹn nu re de rhe chuko ku urhi ọfuaufon na re ji kẹ ayen na.

²²Ọ rhe phia kẹ ayen kirobo rẹ itẹ rẹ uyota na epha, Eranko rọ kpa nu rhoma mu egerẹn rọye re, esi rọ họ nu rhoma vwẹ oma ghworo ibehre.