Read urhobo 1 Jọn 2 Bible Online

1 Jọn 2 - urhobo bible

1 Jọn 2

¹Emọ mẹ, mi si eta nana rhe ovwan rere ovwan vwo jẹ umwemwu eruo; ẹkẹvuọvo ohwo de ru umwemwu, avwanre vwo obruche ọvo vwẹ obọ rẹ Ọsẹ, Jesu Kristi rẹ ọvwata na;

²ọye hẹ ofuophu rẹ imwemwu rẹ avwanre, ọ dia ọ rẹ avwanre ọvo-o ẹkẹvuọvo ji te ọ rẹ akpọ na ejobi.

³Kọna o vwo mu avwanre ẹro nẹ avwanre riẹnrẹ, ọ da dianẹ avwanre yọnrọn urhi rọye.

⁴Ohwo rọ tare nẹ, me riẹnrẹ, rọ gbe rha yọnre irhi rọye-e kẹ ọvwọrọn ofian, yẹ uyota na rhere-e;

⁵ẹkẹvuọvo kohwo kohwo rọ reyọ ota rọye, uyota yẹ ẹguọnọ rẹ Ọghẹnẹ ghare vwẹ evun rọye. Kẹ etiyin o vwo mu avwanre ẹro nẹ avwanre hẹ evun rọye.

⁶ohwo rọ tare nẹ ọye hẹ evun rọye kọ yan kirobo rẹ ekpuyovwi rọye yanre.

⁷Imoni mẹ, ọ dia urhi ọkpokpọ mi siẹ rhe ovwa-an, ẹkẹvuọvo urhi rẹ awanre na rẹ ovwan nyori notọrhe na; urhi rẹ awanre na ọye hẹ ota na rẹ ovwan nyori na.

⁸Yẹ urhi ọkpokpọ mi siẹ rhe ovwan na, rọ hẹ uyota vwẹ oma rọye kugbe evun rẹ ovwan, fikiridie ebri na ra wanvrẹn re yẹ urhukpẹ rẹ uyota na hiro lo re.

⁹Ohwo rọ tare nẹ ọye evun rẹ urhukpẹ nu o de rhe tuoma rẹ oniọvo rọye yọ je hẹ evun rẹ ebri rhi te ọke na.

¹⁰Ohwo rọ guọnọ oniọvo rọye yọ hẹ evun rẹ urhukpẹ na, yẹ emu ọvuọvo rọ so eshe rhere-e.

¹¹Ẹkẹvuọvo ohwo ro tuoma rẹ oniọvo rọye yọ hẹ evun rẹ ebri, evun rẹ ebri kọye o de muẹ yan, yọ riẹn asan rọ ra-a, fikiridie ebri na rhuro ẹro.

¹²Emọ mẹ, mi siẹ ọbe nana rhe ovwan, fikiridie a vwẹ imwemwu rẹ ovwan ghovwo ovwan vwi fiki rọye.

¹³Esẹ, mi siẹ ọbe nana rhe ovwan, fikiridie ovwan riẹnrẹ rọ herọ notọrhe na. Mi siẹ ọbe nana rhe ovwan, imighene, fikiridie ovwan phi ohwo umwemwu na kparobọ nure. Mi si rhe ovwan, emọ na, fikiridie ovwan riẹn Ọsẹ na.

¹⁴Mi si rhe ovwan, esẹ na, fikiridie ovwan riẹnrẹ rọ herọ notọrhe. Mi si rhe ovwan, imighene na, fikiridie ovwan ganre, ota rẹ Ọghẹnẹ ke rha hẹ evun rẹ ovwan, ovwan ki rhe phi ohwo umwemwu na kparobọ.

¹⁵Ovwan guọnọ akpọ na-a, eyẹ obo re hẹ evun rẹ akpọ na. Ọ da dianẹ ohwo guọnọ akpọ na, yẹ ẹguọnọ rẹ Ọsẹ na gbi rhe-e.

¹⁶Kidie obo re hẹ evun rẹ akpọ na ejobi, urhuru si vwe rẹ ugboma, ojevwe rẹ ẹro kugbe eheri rẹ akpọ na, e dia e rẹ Ọsẹ na-a ẹkẹvuọvo e rẹ akpọ na.

¹⁷Akpọ na cha wanvrẹn, kugbe ojevwe rọye; ẹkẹvuọvo ohwo rọ ru ọhọrc rẹ Ọghẹnẹ kọ dia bẹdẹ.

¹⁸Emọ na, Ọnana hẹ ọke rẹ obo oba na; rẹ ovwan vwo nyo nẹ Kristi rẹ ofian cha na, kọye asakiephana Kristi rẹ efian ghine rhire; kọye avwanre vwọ riẹn nẹ ọke rẹ obo oba na ghine tere.

¹⁹Uherevie rẹ avwanre na ayen nu yanran, ẹkẹvuọvo ayen dia ẹvo vwẹ usun rẹ avwanre-e; ọ dianẹ usun rẹ avwanre ayen epha nọ, manẹ ayen djẹ jẹ avwanre vwo-o; ẹkẹvuọvo ayen yanran re, kọye djere phia nẹ ayen ghine dia ẹvo vwẹ usun rẹ avwanre-e.

²⁰Ẹkẹvuọvo Ọfuanfon Ọvuọvo na vwẹ evwri ghworo ovwan nure, yẹ ovwan ejobi riẹnrẹ.

²¹Mi si rhe ovwan, ọ dianẹ kẹ ovwan jẹ uyota na ẹriẹ-ẹn, ẹkẹvuọvo ovwan riẹnrẹ, ovwan je riẹn nẹ kaka ofian ọvuọvo je hẹ uyota na-a.

²²Kono ọ vwọrọ ofian na ẹkẹvuọvo jokpa rẹ ohwo rọ senre nẹ Jesu dia Kristi na-a? Ọnana hẹ Kristi rẹ ofian na, ohwo rọ sen Ọsẹ na kugbe Ọmọ na.

²³O vwo ohwo ọvuọvo rọ sen Ọmọ na nu rọ de vwo Ọsẹ na-a. Ohwo rọ rhọvwọ Ọmọ na yọ je ghwa rhọvwọ Ọsẹ na rhe.

²⁴E gbe jẹn obo rẹ ovwan nyori notọrhe na dia evun rẹ ovwan. Ọ da dianẹ obo rẹ ovwan nyori notọrhe na da dia evun rẹ ovwan, ovwan ke dia evun rẹ Ọmọ na kugbe evun rẹ Ọsẹ na.

²⁵Ọnana kọye hẹ ive ro ve phihọ otọ kẹ avwanre na, kọye hẹ arhọ ri bẹdẹ na.

²⁶Mi si Ọnana rhe ovwan kpahe otu re cha phiẹn ovwan;

²⁷ẹkẹvuọvo evwoghworo na rẹ ovwan reyọ mie na ọ vẹ ovwan herọ, o rhe fo rere ohwo rhe yono ovwa-an; kirobo rẹ evwoghworo rọye yono ovwan emu kemu na, ọye na hẹ uyota, ọ dia efia-an, ọtiobo ro yono ovwan na, ovwan dia evun rọye ọtiọye.

²⁸Asakiephana, emọ na, ovwan dia evun rọye, rere vwẹ ọke rọ da cha rhe udu rẹ ovwan vwọ gan, rere ovwan vwo jẹ djẹrua vẹ omaẹvuọ vwẹ ẹcha rọye.

²⁹Ọ da dianẹ ovwan riẹnre nẹ ọvwata o ruẹ, gbe jo mu ovwan ẹro nẹ kohwo kohwo rọ dia ọvwata ejobi kẹ ọmọ rọye o ruẹ.