Read urhobo 1 Jọn 5 Bible Online

1 Jọn 5 - urhobo bible

1 Jọn 5

¹Kohwo kohwo ro sere gbuyota nẹ Jesu ghine hẹ Kristi yẹ ọmọ rẹ Ọghẹnẹ o ruẹ, kohwo kohwo rọ guọnọ ọsẹ kugbe oni kọ je guọnọ ọmọ rẹ ayen vwiẹri.

²Vwẹ oma rẹ Ọnana avwanre vwọ riẹn nẹ avwanre guọnọ emọ rẹ Ọghẹnẹ, vwẹ ọke rẹ avwanre da guọnọ rẹ avwanre de mu ọghọ kẹ urhi rọye.

³Kidie Ọnana hẹ ẹguọnọ rẹ Ọghẹnẹ na nẹ, avwanre yọnrọn irhi rọye. Yẹ irhi rọye na ghwa họhọ-ọ.

⁴Kidie kohwo kohwo rẹ Ọghẹnẹ vwiẹri se phiẹ akpọ na kua; Ọnana kọye obọẹkparọ ro phi akpọ na kua na, kọye hẹ esegbuyota rẹ avwanre.

⁵Kono hẹ ohwo ro phi akpọ na kparobọ na, ọ rha dia ohwo ro se Jesu Ọmọ rẹ Ọghẹnẹ na, gbuyota?

⁶Ọnana hẹ ohwo re vwiẹri vwẹ ame vẹ ọbara, ọye hẹ Jesu Kristi, ọ dianẹ ọ rẹ ame ọvo-o ẹkẹvuọvo ọ rẹ ame kugbe ọbara.

⁷Erhi na ri se oseri, fikiridie Erhi na hẹ uyota na.

⁸Iseri erha re herọ, Erhi na, ame na, kugbe ọbara na; iseri rẹ ayen erha ọvuọvo.

⁹Avwanre da reyọ iseri rẹ ohwo rẹ akpọ, iseri rẹ Ọghẹnẹ kọye re marho vwo; kidie iseri rẹ Ọghẹnẹ na kẹ ọna nẹ ọye ri se oseri rẹ kẹ Ọmọ rọye na.

¹⁰Ohwo ro se Ọmọ rẹ Ọghẹnẹ na gbuyota yọ reyọ iseri na phihọ oma rọye nure. Ohwo ro rhe se Ọghẹnẹ gbuyota-a yo sere ọvwọrọn ofian, fikiridie o rhe se oseri rẹ Ọghẹnẹ se kpahe Ọmọ rọye na gbuyota-a.

¹¹Iseri na kẹ ọna, nẹ Ọghẹnẹ vwẹ arhọ ri bẹdẹ na kẹ avwanre, arhọ na kẹ evun rẹ Ọmọ rọye na ọ epha.

¹²Ohwo rọ reyọ Ọmọ na ko vwo arhọ na; ohwo rọ rha reyọ Ọmọ na-a o rhe vwo arhọ na-a.

¹³Mi si ọnana rhe ovwan ri se odẹ rẹ Ọmọ rẹ Ọghẹnẹ na gbuyota, rere ovwan vwọ riẹn nẹ ovwan vwo arhọ ri bẹdẹ na.

¹⁴Ọnana kọye ẹroẹvwọsuọ rẹ avwanre vwori vwẹ evun rọye, nẹ avwanre da nọ ekpẹn rẹ emu ro shephihọ ọhọre rọye ko nyo kẹ avwanre.

¹⁵Avwanre da riẹn nẹ kemu kemu rẹ avwanre nọrọ o nyo, yẹ avwanre riẹnre nẹ kemu kemu rẹ avwanre nọrọ avwanre ke mrẹ reyọ.

¹⁶Ohwo da mrẹ oniọvo rọye ro ruẹ umwemwu ro fo ughwu-u, kọ nọ, Ọghẹnẹ kọ vwẹ arhọ rẹ ayen otu ri ru umwemwu ro fo ughwu-u vwọ kẹ ayen.

¹⁷Oruchọ ejobi ọye hẹ umwemwu, yẹ umwemwu ọvo herọ rọ dia o re ughwu-u.

¹⁸Avwanre riẹnre nẹ kohwo kohwo rẹ Ọghẹnẹ vwiẹri se ruẹ umwemwu-u, ẹkẹvuọvo ohwo rẹ Ọghẹnẹ vwiẹri na ọ nabọ yọnrọn, ohwo umwemwu gbe sa vwẹ obọ te-e.

¹⁹Avwanre riẹnre nẹ avwanre kẹ ihwo rẹ Ọghẹnẹ, yẹ akpọ na ejobi hẹ obọ rẹ ogangan rẹ ohwo umwemwu na.

²⁰Yẹ avwanre riẹnre nẹ Ọmọ rẹ Ọghẹnẹ na rhe nure ọ da kẹ avwanre ẹruọ, ra vwọ riẹn ohwo rẹ uyota; evun rẹ ohwo rẹ uyota na kọye avwanre epha, evun rẹ Ọmọ rọye na Jesu Kristi. Ọnana hẹ Ọghẹnẹ rẹ uyota kugbe arhọ ri bẹdẹ na.

²¹Emọ na, we si oma rẹ ovwan nẹ ẹdjọ.