Read urhobo Iguẹdjọ 1 Bible Online

Iguẹdjọ 1 - urhobo bible

Iguẹdjọ 1

¹Ukuko rọye ri Joshua vwo ghwu nu, ihwo re Izrẹl na da ra nọ Ọrovwohwo na ne, kono ri ke bru ihwo ri Kenan na ra họnre ayen ke avwanre?

²Ọrovwohwo da ta ne, Juda re cha ra, nighe, Mi phi otọ na phihọ obo rọye nure.

³Juda da ta ke Simiọn rẹ oniọvo rọye nẹ, Mọ rhi nene uvwe kpo obo otọ ra ghare kẹ vwe na, rere avwanre ra họnre ihwo ri Kenan na; rere Mi ji nene uwe kpo obo otọ ra ghare kẹ wẹ na. Ọtiọye na Simiọn de nene yanran.

⁴Etiyin Juda da yanran, Ọrovwohwo de phi ihwo ri Kenan na kugbe ihwo ri Pẹriz na phihọ obọ rayen, ayen de phi ihwo uriori ihwe kparobọ vwi Bẹzẹk.

⁵Ayen de bru Adonibẹzẹk rhe vwẹ obi Bẹzẹk, rhi nene họnre, ayen de phi ihwo ri Kenan kugbe ihwo ri Pẹriz na kparobọ.

⁶Adonibẹzẹk da djẹ, ẹkẹvuọvo ayen da vwọ tua, ayen de muo, ayen da nyavwe irhiabọ ride kugbe irhiawọ ride rọye kufia.

⁷Etiyin Adonibẹzẹk da ta nẹ Me nyavwe irhiabọ ride kugbe irhiawọ ride rẹ ivie ujorha gbe ihwe kufia dẹvure re rhọrọ ivwuvwu rẹ emu ria vwẹ obotọ rẹ imẹjẹ mẹ, kirobo ri mi ru ihwo, ọye Ọghẹnẹ hwosa rọye ke vwẹ na. Ayen de muo rhe obi Jerusalẹm, o de ghwu phihọ oboyi.

⁸Eshare ri Juda da họnre Jerusalẹm, ayen da reyọ, ayen da vwẹ ọlọkọ guọghọ, ayen da vwẹ erhanre torhẹ orere na.

⁹Ukuko rọye eshare ri Juda da ra họnre ihwo ri Kenan re dia orere rẹ ugbenu na, vwẹ evun ri Nẹgẹb, kugbe orere rọ obotọ rọye na.

¹⁰Juda da ra họnre ihwo ri Kenan re dia evun rẹ Hebrọn (odẹ ri Hebrọn rẹ ẹsosuọ e se nẹ Kiriatarba); ayen de phi Sheshai kugbe Ahiman kugbe Talmai kparobọ otniẹl phi Dẹba kua ọ da reyọ Aksa (Joshua 15.15-19)

¹¹Ayen de vrẹn nẹ Etiyin ra họnre ihwo ri Dẹba. Kiriatsefa ọye odẹ re ke mu kẹ Dẹba.

¹²Kalẹb da tanẹ, Ọshare rọ sa họnre Kiriatsefa kparobọ, ke Me vwẹ Aksa re ọmọtẹ mẹ vwọ kẹ vwọ rọvwọ.

¹³Otniẹl rẹ ọmọ ri Kenaz, oniọvo rẹ Kalẹb re otete, da họnrọ kua, ọ da vwẹ Aksa rẹ ọmẹtẹ rọye vwọ kẹ vwọ rọvwọ.

¹⁴Ọke rẹ aye na vwo bro rhe nu, ọ da kpakpọ nẹ ọ ra yare aghwa ọvo vwẹ obọ rẹ ọsẹ rọye, ọke rẹ aye na vwo wo nẹ enu rẹ ekẹtẹkẹtẹ na rhe, Kalẹb da ta kẹ nẹ. Die wọ guọnọre?

¹⁵Aye na da ta kẹ nẹ, Ru ẹse ọvo kẹ vwẹ, wọ vwọ reyọ ovwẹ kpo otọ ri Nẹgẹb nure na, ko wọ je kẹ vwẹ otọ rẹ igbugbu rẹ ame epha. Kalẹb da vwẹ igbugbu rẹ obenu kugbe igbugbu re obotọ vwọ kẹ.

¹⁶Etiyin uvwiẹ ri Ken, ọgọ ri Mosis de nene ihwo ri Juda nẹ orere rẹ ugbo-iriẹ na kpo evun re aghwa ri Juda rọ hẹ Nẹgẹb rọ kẹrẹ Arad; ayen vẹ ihwo na da ra dia kugbe.

¹⁷Juda vẹ Simiọn rẹ oniọvo rọye da yanran, ayen de re phi ihwo ri Kenan re dia Zefat kua, ayen da guọghọ fiotọ. Fiki rẹ ọtiọye na e de se odẹ re orere na Họrmah.

¹⁸Juda da je reyọ Gaza kugbe otọ rọye ejobi, kugbe Ashkẹlọn kugbe otọ rọye, kugbe Ekrọn vẹ otọ rọye.

¹⁹Ọrovwohwo vi Juda da herọ, ọ da reyọ orere rẹ ugbenu na, ẹkẹvuọvo ọ sa djẹ ihwo re dia otọ rẹ ophẹphẹ na no-o, fikiridie ayen vwo idjighere rẹ utehru rẹ ofovwi buebu.

²⁰Ọ da vwẹ Hebrọn ke Kalẹb, kirobo ri Mosis tare; ọ da djẹ emeshare erha rẹ Anak nẹ otọ na.

²¹Ẹkẹvuọvo ihwo ri Bẹnjamin djẹ ihwo ri Jebu re dia Jerusalẹm no-o, ọtiọye na ihwo ri Jebu ve ihwo ri Bẹnjamin da dia kugbe vwi Jerusalẹm rhi te edẹ ri nonẹ.

²²Uwevwi ri Josẹf da ra họnre Bẹtẹl; Ọrovwohwo vẹ ayen da herọ.

²³Uwevwi ri Josẹf de ji orhẹn kpo Bẹtẹl (Luz ọye odẹ re ke mu kẹ orere na vẹrhẹ.)

²⁴Orhẹn na da mrẹ ọshare ọvo ro nẹ orere na cha, ayen da ta kẹ nẹ, Biko, dje idjerhe ra wa ruẹ orere na kẹ avwanre, rere avwanre ni arodọvwẹ kẹ we.

²⁵Etiyin ọshare na de dje idjerhe ra wa ruẹ orere na kẹ ayen, Etiyin ayen da vwẹ ọlọkọ guọghọ orere na, ẹkẹvuọvo ayen de siobọ nẹ ọshare na kugbe orua rọye kpo.

²⁶Ọshare na da yanran kpo otọ rẹ ihwo ri Het ọ da bọn orho ọvo phihọ o de se odẹ rọye Luz; kọye odẹ re mu kẹ rhi te ẹdẹ ri nonẹ na.

²⁷Manasse djẹ ihwo ri Bẹtshean kugbe ẹko rọye no-o, eyẹrẹ Taanak kugbe ẹko rọye, eyẹrẹ ihwo ri Dọr kugbe ẹko rọye, eyẹrẹ ihwo rẹ Ibleam kugbe ẹko rọye, eyẹrẹ ihwo ri Megiddo kugbe ẹko rọye; ẹkẹvuọvo ihwo ri Kenan rhọvwe kua nẹ otọ na-a.

²⁸Ọke re Izrẹl rhe vwọ goma re, ayen da vwẹ ẹgba mu ihwo ri Kenan na vwo ru iruo, ẹkẹvuọvo a gbe djẹ ayen ejobi nẹ otọ na-a.

²⁹Ifrem gbe djẹ ihwo rẹ Kenan re dia Gẹzẹr no-o; ẹkẹvuọvo ihwo ri Kenan da dia Gẹzẹr vwe ohri re ayen.

³⁰Zẹbulọn gbe djẹ ihwo ri Kitrọn na no-o, eyẹrẹ ihwo rẹ Nahalol, ẹkẹvuọvo ihwo rẹ Kenan vẹ ayen da dia kugbe, Etiyin kẹ ayen gba ayen vwo ru iruo.

³¹Asher gbe djẹ ihwo rẹ Akko no-o, eyẹrẹ ihwo ri Sidọn, eyẹrẹ ọ rẹ Ahlab, eyẹrẹ ọ rẹ Akzib, eyẹrẹ ọ rẹ Hẹlba, eyẹrẹ ọ rẹ Afik, eyẹrẹ ọ rẹ Rehob,

³²ẹkẹvuọvo ihwo rẹ Asher da dia kugbe ihwo rẹ Kenan na, ihwo ri vwo otọ na, kidie ihwo na djẹ ayen no-o.

³³Naftali gbe djẹ ihwo re Bẹtshemẹsh no-o, eyẹrẹ ihwo ri Betanat, ẹkẹvuọvo ayen da dia kugbe ihwo ri Kenan ihwo ri vwo otọ na, dede na ihwo ri Bẹtshemẹsh kugbe ihwo ri Betanat de rhi hirhe phihọ ihwo ra gba vwo ru iruo.

³⁴Ihwo re Amọr de keke ihwo rẹ Dan kpo obo orere rẹ ugbenu na, kidie ayen rhọvwe kẹ ihwo na rere ayen dia otọ rẹ ophẹphẹ na-a,

³⁵ihwo rẹ Amọr ji churu mu Harherẹs, vwẹ Aijalọn, kugbe Sha-albim, ẹkẹvuọvo obọ rẹ uwevwi ri Josẹf da tua nọ kẹ ayen, ọtiọye na ayen de rhi hirhe phihọ ihwo ra gba vwo ru iruo.

³⁶Ughwru rẹ otọ rẹ ihwo rẹ Amọr de ne asan ugbenu rẹ Akrabbim, re fi Sela yanran kpo obenu.