Read urhobo Iguẹdjọ 10 Bible Online

Iguẹdjọ 10 - urhobo bible

Iguẹdjọ 10

¹Ọke rẹ Abimẹlẹk vwo no nu, osivwi ọvo de rhi mu vwẹ Izrẹl, Tola ọmọ ri Pua, ọmọ ri Dodo, ohwo rẹ Issaka ọ da dia evun ri Shama vwẹ ugbenu rẹ Ifrem.

²O de guẹdjọ rẹ Izrẹl ikpe uje gbe erha, o vwo ghwu nu, e de sho phihọ evun ri Shama.

³Okuko rọye Jair ohwo ri Giliad de rhi mudia guẹdjọ rẹ Izrẹl ikpe uje gbe ivẹ.

⁴O de vwo emọ eshare ọgban ri vwo ekẹtẹkẹtẹ ọgban rẹ ayen vwọ gua; ayen ji vwo irere ride ọgban, re se nẹ Havvotjair rhi te ẹdẹ ri nonẹ na, rẹ otọ ri Giliad.

⁵Jair de ghwu, e de sho vwi Kamọn.

⁶Ihwo rẹ Izrẹl da rhoma ru emu omiomiovwi vwẹ obaro rẹ Ọrovwohwo na, ayen da gọ Baal kugbe Ashera, te edjọ ri Syria, edjọ ri Sidọn, edjọ ri Mọab, edjọ rẹ ihwo rẹ Ammọn, kugbe edjọ ri Philitia na; ayen da sen Ọrovwohwo na, ayen gbe ga-a.

⁷Ophu rẹ Ọrovwohwo na da gan kpahe Izrẹl, ọ da shẹ ayen phihọ obọ ri Philitia kugbe obọ rẹ ihwo rẹ Ammọn.

⁸ukpe yena ayen de shenyẹ emọ rẹ Izrẹl je ghworọ fiotọ. Ikpe ihwe gbe ẹrenren ọye emọ rẹ Izrẹl dia obotọ rẹ ayen vwẹ otọ rẹ ihwo rẹ Amọr vwẹ abọ oboyi ri Jọdan rọ evun ri Giliad.

⁹Ihwo rẹ Ammọn na da gua wanvrẹn Jọdan ra họnre Juda kugbe Bẹnjamin kugbe uwevwi rẹ Ifrem; ọtiọye na Izrẹl da mrẹ ọdjarhọ gangan.

¹⁰Ihwo rẹ Izrẹl de kperi se Ọrovwohwo na, tanẹ, Avwanre ru umwemwu kpahe owẹ, avwanre da je sen wẹ rẹ Ọghẹnẹ rẹ avwanre, avwanre da ra ga Baal.

¹¹Ọrovwohwo na da ta kẹ ihwo rẹ Izrẹl nẹ, Ọ dianẹ Mẹvwẹ ri sivwi ovwan mie ihwo rẹ Ijipt kugbe ihwo rẹ Amọr, kugbe ihwo rẹ Ammọn kugbe ihwo ri Philistia?

¹²Mi ji sivwi ovwan mie ihwo ri Sidọn, kugbe ihwo rẹ Amalẹk, kugbe ihwo ri Maon, ri shenyẹ ovwan muotọ; ovwan de kperi se vwe, Mi de sivwi ovwan nẹ obọ rayen.

¹³Ovwan da sen vwẹ ra ga edjọ efa, eriyin na Mi gbi sivwi ovwan ọfa-a.

¹⁴Ovwan yanran re kperi kẹ edjọ rẹ ovwan jẹ reyọ na; gbe jẹn ayen sivwi ovwan vwẹ ọke rẹ ukpokpogho rẹ ovwan na.

¹⁵Ihwo rẹ Izrẹl da ta kẹ Ọrovwohwo na nẹ Avwanre ru umwemwu nure; ru avwanre obo ri je we, gbe di sivwi avwanre, avwanre rẹ wẹ, vwẹ ẹdẹ ri nonẹ.

¹⁶Ọtiọye na ayen da kua edjọ erhorha na nẹ oma rayen kufia ayen da ga Ọrovwohwo na; ophu de muo fiki rẹ omẹnaghọ rẹ Izrẹl

¹⁷Etiyin ihwo rẹ Ammọn de se otu ofovwi rọye koko, ayen de re mu erhọn phihọ Giliad; ihwo rẹ Izrẹl na de soma koko, ayen de mu erhọn phihọ Mizpah.

¹⁸Ihwo na, ri sun Giliad na, da ta kẹ ohwohwo nẹ, Kono ohwo rọ ka so ohọnre na kpahe ihwo rẹ Ammọn na? Kọye ọshare ro che sun ihwo ejobl vwi Giliad