Read urhobo Iguẹdjọ 11 Bible Online

Iguẹdjọ 11 - urhobo bible

Iguẹdjọ 11

¹Jẹfta ohwo ri Giliad ọgba rẹ ofovwi, ẹkẹvuọvo ọmọ rẹ igberadja vwiẹri, Giliad kọye ọsẹ ri Jẹfta.

²Aye rẹ Giliad de vwiẹ emeshare buebu kẹ; emọ na vwọ ghwanre rhe, ayen da djẹ Jẹfta phihọ ada, ayen da ta kẹ nẹ, Wọ sa re vwẹ uku rẹ uwevwi rẹ ọsẹ rẹ avwanre-e; kidie ọmọ re aye ọfa wo ruẹ.

³Etiyin Jẹfta da djẹ yan jẹ emesẹ rọye vwo, ọ da ra dia otọ ri Tọb; Jẹfta de se ihwo buebu ri gbe ozighi boma, ọ vẹ ayen kọye ri koko kpare ofovwi.

⁴Ọke ọvo vwọ wan nu ihwo rẹ Ammọn da rhe vwẹ ofovwi so Izrẹl.

⁵Ọke rẹ ihwo rẹ Ammọn na vwọ vwẹ ofovwi so Izrẹl re, ekpako ri Giliad na da ra reyọ Jẹfta nẹ otọ ri Tọb rhe;

⁶ayen da ta kẹ Jẹfta nẹ, Yanrhe wọ rhe dia osun kẹ avwanre, rere avwanre nene ihwo rẹ Ammọn na họnre.

⁷Ẹkẹvuọvo Jẹfta da ta kẹ ekpako ri Giliad na nẹ, Ọ dianẹ oma mẹ tuo ovwan, ovwan da djẹ vwẹ nẹ uwevwi rẹ ọsẹ mẹ? Die nẹrhẹ ovwan bru vwe rhe vwọ ọke rẹ ovwan vwo ukpokpogho na?

⁸Ekpako ri Giliad na da ta kẹ Jẹfta nẹ, Kọye nẹrhẹ avwanre vwọ rhoma bru we rhe vwọ ọke nana, rere wọ nene avwanre họnre ihwo rẹ Ammọn na, kugbe rere wọ dia osun rẹ avwanre ihwo ri Giliad na ejobi.

⁹Jẹfta da ta kẹ ekpako ri Giliad na nẹ, Ọ da dianẹ ovwan rhoma reyọ ovwẹ kpo uwevwi rerẹ me ra họnre ihwo ri Ammọn na, Ọrovwohwo na de phi ayen phihọ obọ mẹ, kẹ me cha dia osun rẹ ovwan.

¹⁰Ekpako ri Giliad na da ta kẹ Jẹfta nẹ, Ọrovwohwo na kọye re cha dia oseri kẹ avwanre vẹ owẹ; nẹ avwanre se ru kerẹ obo wọ ta kẹ avwanre na.

¹¹Ọtiọye na Jẹfta vẹ ekpako rẹ Giliad na da yanran kpo, ihwo na da vwọ ma onotu kugbe osun rayen; Jẹfta da ra ta eta rọye ejobi vwẹ obaro rẹ Ọrovwohwo vwi Mizpah.

¹²Etiyin Jẹfta de ji ikọn bru ovie rẹ ihwo rẹ Ammọn tanẹ, Die mi ru we wọ cha vwọ họnre ovwẹ vwẹ evun rẹ otọ mẹ?

¹³Oviẹ rẹ ihwo rẹ Ammọn na da kpahe kẹ ikọn ri Jẹfta na nẹ, Fikiridie ọke rẹ Izrẹl vwo nẹ obi Ijipt cha o de mie vwe otọ rẹ Arnọn vi Jabbọk kugbe Jọdan; Asakiephana me guọnọre nẹ o siobọ nẹ otọ na kẹ vwẹ dẹndẹn.

¹⁴Jẹfta da rhoma ji ikọn bru ovie rẹ ihwo rẹ Ammọn na

¹⁵ọ da vuẹ nẹ Ọtiọna Jẹfta tare: nẹ Izrẹl reyọ otọ rẹ Moabu-u eyẹ otọ rẹ Ammọni-i,

¹⁶ẹkẹvuọvo ọke rẹ Izrẹl vwo nẹ obi Ijipt cha, ọ da wan evun rẹ aton na re te Urhie Ọvwavware na rhi te Kadẹsh.

¹⁷Etiyin Izrẹl de ji ikọn bru ovie rẹ Edọm tanẹ, Biko, ji avwanre wan otọ wẹn vrẹn; ẹkẹvuọvo ovie rẹ Edọm da davwerhọ raye-en. Ọtiọye na ayen de rhe ji bru ovie ri Moab, ẹkẹvuọvo ọ rhọvwere-e. Fiki rẹ ọtiọye na Izrẹl da da oma ji obi Kadẹsh.

¹⁸Etiyin ayen da yan yariẹ ra ghrẹghrẹ otọ rẹ Edọm kugbe otọ ri Moab ra wan evun rẹ aton, ayen da rhe akakọ rẹ otọ ri Moab, ayen da bọn ọko phihọ ẹbẹre rivẹ rẹ Arnọn; ẹkẹvuọvo ayen yan ro otọ ri Moabu-u, kidie Arnọn ọye ughwru ri Moab.

¹⁹Izrẹl de ji ikọn bru Sihọn ovie rẹ ihwo rẹ Amọr, ovie rẹ Hẹshbọn; Izrẹl da ta kẹ nẹ, Biko, ji avwanre wanvrẹn otọ wẹn kpo orere re avwanre.

²⁰Ẹkẹvuọvo Sihọn rhọvwere nẹ Izrẹl wan otọ rọye vrẹ-ẹn; ọtiọye na Sihọn de se ihwo rọye ejobi koko, ayen da ra ghare ofovwi phihọ vwi Jahaz ayen da họnre Izrẹl.

²¹Ọrovwohwo Ọghẹnẹ rẹ Izrẹl na de phi Sihọn vẹ ihwo rọye ejobi phihọ obọ rẹ Izrẹl, ayen de phi ayen kua; ọtiọye na Izrẹl da reyọ otọ rẹ ihwo rẹ Amọr ejobi re dia orere yena.

²²Ayen da reyọ otọ rẹ ihwo rẹ Amọr ejobi nẹ obo Arnọn re te Jabbọk nẹ obọ aghwa na re te Jọdan.

²³Ọtiọye na Ọrovwohwo Ọghẹnẹ rẹ Izrẹl da djẹ ihwo rẹ Amọr na nẹ obaro rẹ Izrẹl ihwo rọye; nẹ ovwan ke cha reyọ ughwẹ rayen?

²⁴Ovwan gba reyọ emu ri Kemọsh ẹdjọ rẹ ovwan vwọ kẹ ovwan? Ọtiọye na kohwo kohwo rẹ Ọrovwohwo Ọghẹnẹ rẹ avwanre djẹ nẹ obaro rẹ avwanre, avwanre ke cha reyọ otọ rayen.

²⁵Asakiephana wo yovwi nọ Balak ọmọ rẹ Zippọ ovie ri Moab? O nene Izrẹl sivwi oma, gbenẹ ọ họnre ayen?

²⁶Ọke rẹ Izrẹl vwọ dia evun rẹ Hẹshbọn vẹ ọko buebu rọye, kugbe Aroa vẹ ọko buebu rọye, kugbe irere ride na ejobi rẹ orhoma rẹ urhie buebu rẹ Arnọn, ikpe ujori erha, kidie sorọ wọ gbe sa reyọ ayen vwẹ ọke yena-a?

²⁷Fiki rẹ ọtiọnana mi ru umwẹmwu kpahọ wẹ-ẹn, ẹkẹvuọvo wọwẹ ri ru vwe chọ fiki rẹ ofovwi wọ vwọ so vwẹ na; Ọrovwohwo rẹ Oguẹdjọ na, ri che brorhiẹ rẹ ihwo rẹ Izrẹl vẹ ihwo rẹ Ammọn na nonẹ na.

²⁸Ẹkẹvuọvo ovie rẹ ihwo rẹ Ammọn je kerhọ rẹ eta ri Jẹfta vuẹ rhe na-a.

²⁹Etiyin Erhi rẹ Ọrovwohwo na da rhe ro oma ri Jẹfta, ọ da wanvrẹn Giliad vi Manasse, o de vrẹn kpo Mizpa ri Giliad, o de vrẹn nẹ Mizpa ri Giliad kpo asan rẹ ihwo rẹ Ammọn.

³⁰Jẹfta de ve ive kẹ Ọrovwohwo na, tanẹ, Wọ de phi ihwo rẹ Ammọn na phihọ obọ mẹ,

³¹kemu kemu ro nẹ anurhoro rẹ uwevwi mẹ bru vwe rhe vwẹ ọke re me da cha vẹ ogangan re ephio kparobọ rẹ ofovwi rẹ ihwo rẹ Ammọn emu yena ke me vwọ kẹ Ọrovwohwo, ki mi vwo ze izobo rẹ ẹtorhẹ kẹ.

³²Ọtiọye na Jẹfta da gua vrẹn bru ihwo rẹ Ammọn ra họnre ayen; Ọrovwohwo de phi ayen phihọ obọ rọye.

³³O de hwe ayen vwi Aroer re te asan ri Minnit, rẹ irere uje ride na, rhiri re te Abẹlkeramim, o de hwe ayen guọghọ ọtiọye na e de phi ihwo rẹ Ammọn na kparobọ vwẹ obaro rẹ ihwo rẹ Izrẹl na.

³⁴Ọke ri Jẹfta vwo rhivwi rhe uwevwi rọye vwẹ obi Mizpa; nighe, ọmọtẹ rọye da rhe vwa vẹ eha vẹ ihwehworo; ọmọtẹ na ọvo ọye ọmọ ro vwiẹri; o vwo ọmọshare ọfa-a eyẹ ọmọtẹ ọfa-a

³⁵Ọke rọ vwọ mrẹ, ọ da bẹrẹ emwa rọye, ọ da tanẹ, Gwho, ọmọtẹ mẹ! wọ vwọ vwẹ kpotọ gangan, wẹ ọye ohwo ro me kpokpo uvwe; fikiridie mi rhie unu mẹ kẹ Ọrovwohwo na nure, me gbe sa rhẹriẹ ive mẹ-ẹ.

³⁶Ọmọtẹ rọye da ta kẹ nẹ, Ọsẹ mẹ, ọ da dianẹ wo rhie unu wẹn kẹ Ọrovwohwo na nure, gbe ru uvwe kirobo wo vwe unu wẹn ta nure; vwẹ ọke nana rẹ Ọrovwohwo vwo reihri kpahe ihwo rẹ Ammọn ivwighrẹn wẹn na.

³⁷Ọ da ta kẹ ọsẹ rọye nẹ, je ru emu nana kẹ vwẹ; kẹ vwẹ emeranvwe ivẹ, rere mi re ghoro oma vwẹ enu rẹ igbenu na, rere me vẹ otu mẹ ra viẹ ke Ọghọ mẹ

³⁸Ọ da ta kẹ nẹ, Gba yanran, O de jọ yanran emeranvwe ivẹ; ọ da yanran, ọ vẹ otu rọye da ra viẹ kẹ Ọghọ rọye vwẹ enu ri igbenu na

³⁹Oba rẹ emeranvwe ivẹ na vwo te nu, o de rhivwi bru ọsẹ rọye, o de vwo ru kerẹ ive ro veri ọmọtẹ na riẹn ọshare-e. Ọnana da rhe dia ekuruemu vwẹ Izrẹl

⁴⁰ukpe kukpe kọye emetẹ rẹ Izrẹl ejobi vwo kpo enu rẹ igbenu na da ra viẹ ẹdẹ ẹne kẹ ọmọtẹ ri Jẹfta ohwo ri Giliad na.