Read urhobo Iguẹdjọ 13 Bible Online

Iguẹdjọ 13 - urhobo bible

Iguẹdjọ 13

¹Ihwo rẹ Izrẹl na da rhoma ru emu omiomiovwi vwẹ obaro rẹ Ọrovwohwo; Ọrovwohwo de phi ayen phihọ obọ rẹ Philistia ikpe ujuvẹ.

²Ọshare ọvo da herọ vwi Zọra, ohwo rẹ orua ri Dan, ode rọye Manọa; aye rọye ẹgan o vwo ọmọ-o.

³Amakashe rẹ Ọrovwohwo da vwẹ oma phia kẹ aye na ọ da ta kẹ nẹ, Nighe, ẹgan wo ruẹ wo vwo ọmọ-ọ; ẹkẹvuọvo wọ cha mrevun wo che vwiẹ ọmọshare.

⁴Eriyin na gba kẹnoma, wọ da waini-i eyẹrẹ udi ọganga-an, wọ ria emu ro jẹfuọ-ọn,

⁵kidie karophihọ nẹ, wọ cha mrevun wo che vwiẹ ọmọshare. Wọ vwẹ anrẹn te uyovwi rọye-e, fikiridie ọmọ na Ojigbo rẹ Ọghẹnẹ nẹ evun rhe; kọye cha rhoma sivwi Izrẹl nẹ obọ rẹ Philistia.

⁶Etiyin aye na da rhe ta kẹ ọshare rọye nẹ, Ohwo rẹ Ọghẹnẹ ọvo bru vwe rhe, oma rọye da họhọ oma rẹ amakashe rẹ Ọghẹnẹ, o mu oshọ gangan; me nọrọn asan rọ nurhe-e, o ji se odẹ rọye kẹ vwẹ-ẹ;

⁷ẹkẹvuọvo ọ da ta kẹ vwẹ nẹ, Nighe, wọ cha mrevun wo che vwiẹ ọmọshare; eriyin na wọ da waini-i eyẹrẹ udi ọganga-an, emu ro jẹfuọn wọ riọ-ọ, fikiridie ọmọ na Ojigbo rẹ Ọghẹnẹ nẹ evun rhe re te ẹdẹ rẹ ughwu rọye.

⁸Etiyin Manọa da rẹ Ọrovwohwo tanẹ, E, Ọrovwohwo, Bikọ, rhoma ji ohwo rẹ Ọghẹnẹ ri wo ji rhe ye, rere ọ rhoma bru avwanre rhe, rere o yono avwanre emu rẹ avwanre ru kẹ ọmọ re che vwiẹ na.

⁹Ọghẹnẹ de nyo urhuru rẹ Manoa, etiyin amakashe rẹ Ọghẹnẹ na da rhoma bru aye na rhe, kirobo ro vwo tidia evun rẹ aghwa na; ẹkẹvuọvo Manoa ọshare rọye vọye etiyi-in.

¹⁰Aye na de bru okpakpa ra vuẹ ọshare rọye nẹ, Nighere, ọshare na ro bru uvwe rhe dẹvo ye rha rhoma vwẹ oma phia kẹ vwẹ re

¹¹Manoa vẹ aye rọye de vrẹn bru ọshare na, ọ da ta kẹ nẹ, Wẹ ọye ọshare rọ ta ota kẹ aye nana? Ọ da tanẹ, Mẹvwẹ.

¹²Manoa da ta kẹ nẹ, Ọke rẹ eta wẹn na da rhe dia uyota nu, ke mavọ akpọ rọ ọmọ na cha dia, didi iruo o che ru?

¹³Amakashe rẹ Ọrovwohwo na da ta kẹ Manoa nẹ, Me ta emu ejobi kẹ aye na nure, nẹ ọ kẹnoma

¹⁴Aye na re kemu kemu ro nẹ oma ri vain rhe-e, eyẹrẹ ọ da waini-i eyẹrẹ udi ọganga-an, eyẹrẹ ọ re emu ro jẹfuọ-ọn, aye na sẹrọ rẹ urhi ri mi ji kẹ na ejobi.

¹⁵Manoa da ta kẹ amakashe rẹ Ọrovwohwo na nẹ, Biko, jẹ avwanre da wẹ ji, rere avwanre reyọ ẹmẹvwe vwo ru emu kẹ wẹ.

¹⁶Amakashe rẹ Ọrovwohwo na da ta kẹ Manoa nẹ, Ovwan da da vwẹ ji, Me cha re vwẹ emu rẹ ovwan na-a; ẹkẹvuọvo ovwan da choma rẹ izobo ra torhẹre nure, ovwan gba reyọ vwo ze kẹ Ọrovwohwo. (Fikiridie Manoa riẹnre nẹ amakashe rẹ Ọrovwohwo o ruẹ-ẹ)

¹⁷Manoa da ta kẹ amkashe rẹ Ọrovwohwo na nẹ, Odẹ wẹn rhọ, rere ọke rẹ eta wẹn nana da dia uyota, rere avwanre vwo mu ọghọ kẹ wẹ?

¹⁸Amakashe rẹ Ọrovwohwo na da ta kẹ nẹ, Die sorọ wọ vwọ nọ ekpẹn rẹ odẹ mẹ, yo wẹ mrẹ nẹ igbunu?

¹⁹Ọtiọye na Manoa da reyọ ọmọ rẹ ẹvwe kugbe izobo rẹ emu, o de vwo ze kẹ Ọrovwohwo na vwẹ enu rẹ oragha, o vwo ru iruo rẹ igbenu.

²⁰Ọke rẹ erhanre rẹ agbada na vwọ la kpenu, etiyin amakashe rẹ Ọrovwohwo na de nene erhanre rẹ agbada na kpo odjuvwu yi Manoa vẹ aye rọye re no, etiyin ayen de she bọvwọ epharo rhuotọ.

²¹Amakashe rẹ Ọrovwohwo gbe vwẹ oma phia kẹ Manoa vẹ aye rọye ọfa-a. Kẹsiẹye Manoa ke riẹn nẹ amakashe rẹ Ọrovwohwo na o ruẹ

²²Manoa da ta kẹ aye rọye nẹ, Avwanre ghine che ghwu, kidie avwanre mrẹ Ọghẹnẹ nure

²³Ẹkẹvuọvo aye rọye da ta kẹ nẹ, Ọ dianẹ Ọrovwohwo na guọnọ avwanre hwe nọ, yẹ ọ gbe sa reyọ izobo rẹ ẹtorhẹ kugbe izobo rẹ emu na mie avwanre-e, eyẹrẹ ọ sa vwẹ imu nana phia kẹ avwanre-e.

²⁴Aye na de vwiẹ ọmọshare, o de se odẹ rọye Samsin; ọmọ na da rhe rho, Ọrovwohwo de bruba kẹ.

²⁵Erhi rẹ Ọrovwohwo na ko mu Samsin vwo ru iruo vwẹ evun rẹ Mahanehdan, vwẹ uvwragba ri Zora vẹ Ẹshtaol.