Read urhobo Iguẹdjọ 19 Bible Online

Iguẹdjọ 19 - urhobo bible

Iguẹdjọ 19

¹Vwẹ ọke yena, rẹ Izrẹl rhe vwo ovie-e na, Etiyin ohwo ri Livae ọvo da kua kpo ẹbẹre rẹ orere rẹ ugbenu rẹ Ifrem ọ da jẹn ọnse ọvo vwi Bẹtlẹhẹm ri Juda.

²Ọke rẹ ọnse rọye na vẹ ọye vwọ ghwọ, etiyin aye na da yan jovwo kpo uwevwi rẹ ọsẹ rọye vwi Bẹtlẹhẹm ri Juda, ọ da dia oboyi emeranvwe ẹne.

³Etiyin ọshare rọye na de bro ra rere o rhivwi bro rhe uwevwi. Ọ da reyọ idibo rọye kugbe ekẹtẹkẹtẹ ivẹ nene oma yanran. Ọ da rhe uwevwi rẹ ọsẹ rẹ aye na; ọke rẹ ọsẹ rẹ ọmọtẹ na vwọ mrẹ, ọ da rhe vwa vẹ aghọghọ.

⁴Ọgọ rọye, rẹ ọsẹ rẹ ọmọtẹ na da da ọshare na ji, ọ vẹ ọye da dia ẹdẹ erha; ọtiọye na ayen da re ayen da da, ayen de won phihọ etiyin.

⁵Vwẹ ẹdẹ rẹne vwi irhiọke ride ayen vwọ rhọvwọ nu, ọ da choma rere ọ yanran kpo; ẹkẹvuọvo ọsẹ rẹ ọmọtẹ na da ta kẹ ọgọ rọye nẹ, Vwẹ emu te evun rere udu wẹn ga, rere wo ki kpu

⁶Ọtiọye na ayen eshare ivẹ na de tidia ayen da re ayen da da, ọsẹ rẹ ọmọtẹ na da ta kẹ ọshare na nẹ, Joma vwerhe owẹ rere wọ dia etinẹ ason na, jẹn evun vwẹrhe owẹ.

⁷Ọke rẹ ọshare na vwo vrẹn rere ọ yanran kpo, etiyin ọgọ rọye na da vwẹ eta daji, kẹsiẹye ọ ke rhoma vwerhẹ Etiyin.

⁸Vwẹ ẹdẹ rẹ iyori o de vrẹn vwẹ urhiọke ride rere ọ yanran kpo; etiyin ọsẹ rẹ ọmọtẹ na da ta kẹ nẹ, Ru ẹnwẹn wẹn gan rere wọ hẹrhẹ bẹsiẹ rẹ ọke vwọ lọhọ oma. Ọtiọye na ayen ihwo na ivẹ da re emu kugbe.

⁹Ọke rẹ ọshare na kugbe ọnse rọye kugbe odibo rọye vwo vrẹn rere ayen yanran kpo, etiyin ọgọ rọye, ọsẹ rẹ ọmọtẹ na da ta kẹ nẹ, Nighe, ọke na kpo ovwọnvwọn re; biko da oma ji vwẹ ason nana. Nighe, ọke na kpo re, vwerhẹ etinẹ rere wo jẹn oma vwerhẹ owẹ; rere irhiọke ride rẹ odẹ rọ cha, wọ ke yanran kpo.

¹⁰Ẹkẹvuọvo, ọshare na rhọvwere-e. O de vrẹn, o de rhi te asan ro hirhe aro ku Jebu (kọye Jerusalẹm). Ọ vẹ ekẹtẹkẹtẹ ivẹ rọ vwọ gua, kugbe ọnse rọye na.

¹¹Ọke rẹ ayen vwo si kẹrẹ Jebus, rẹ ọke vwo kpo yanran, etiyin odibo na da ta kẹ ọrovworo na nẹ, Yanrhe rere avwanre ra vwẹriẹ orere rẹ ihwo rẹ Jebus, rere avwanre vwerhẹ etiyin ason na.

¹²Etiyin ọrovworo na da ta kẹ nẹ, Avwanre sa vwẹriẹ orere rẹ ihwo ọfa-a, re dia ihwo rẹ Izrẹl na-a; ẹkẹvuọvo avwanre wanvrẹn kpo Gibeah

¹³Ọ da ta kẹ odibo na nẹ, Yanrhe rere avwanre si kẹrẹ ẹbẹre ọvo rẹ asan nana, rere avwanre vwerhe vwi Gibeah eyẹ Ramah vwẹ ason na.

¹⁴Ọtiọye na ayen da wanvrẹn yanran; ọke de she ayen vwi Gibeah, ri Bẹnjamin.

¹⁵Ayen da vwẹriẹ etiyin, rere ayen vwerhe vwi Gibeah vwẹ ason yena. Ọke rọ vwọ ro evun rọye nu o de tidia vwẹ uphẹphẹ rẹ orere na; kidie ayen mrẹ ohwo ro phi ayen phihọ uwevwi vwerhẹ vwẹ ason yena-a.

¹⁶Nighe, ọmare rẹ ọshare ọvo ro nẹ aghwa rọye cha vwẹ ovwọnvwọn; ọshare rẹ orere rẹ ugbenu rẹ Ifrem o ruẹ, ọrhorha o ruẹ vwi Gibeah, ihwo rẹ asan na emọ rẹ Bẹnjamin ayen ruẹ.

¹⁷Ọshare na vwọ kpare opharo kpenu, ọ da mrẹ ọrhorha rẹ ọshare ọvo vwẹ uphephẹ rẹ orere na; ọmare rẹ ọshare na da ta kẹ nẹ, Tivọ wọ ra? Bovọ wo nurhe?

¹⁸Ọshare na da ta kẹ nẹ, Avwanre wanvrẹn Bẹtlẹhẹm ri Juda kpo ẹbẹre rẹ orere rẹ ugbenu rẹ Ifrem, oboyi mi nurhe, mi kpo Bẹtlẹhẹm ri Juda jovwo, ke me yanran kpo uwevwi rẹ Ọrovwohwo, o rhe vwo ohwo ọvuọvo ro phi vwe phihọ uwevwi-i.

¹⁹Avwanre vwẹ odi kugbe emu rẹ ekẹtẹkẹtẹ ria, emu kugbe wain je herọ kẹ vwẹ vẹ odibo wẹn rẹ aye kugbe ọmọshare rọ vẹ odibọ wẹn gba herọ; emu ọvuọvo kanre avwanre-e.

²⁰Etiyin ọmare rẹ ọshare na da tanẹ, ufuoma nene uwe dia; kemu kemu rọ kanre owẹ ejobi mi ruo kẹ wẹ; jokpa nẹ wọ vwerhẹ uphephẹ rẹ orere na-a.

²¹Ọtiọye na ọ da reyọ ọshare na rhe uwevwi rọye, ọ da kẹ ekẹtẹkẹtẹ na emu re: ayen da hworhẹ awọ rayen, ayen da re ayen da da.

²²Ọke rẹ ayen vwọ re emu vẹ oma vwerhe, nighe, eshare rẹ orere na, otu ri gbozighi da gba riariẹ uwevwi na phihọ, ayen da teye ẹchẹ na; ayen da ta kẹ ọmare rẹ ọshare na, ọ ro vwo uwevwi na nẹ, Reyọ ọshare rọ rhe uwevwi na, phihọ otafe rere avwanre vughe.

²³Etiyin ọshare na, ro vwo uwevwi na, de bro ayen ra ta kẹ nẹ, Ẹjo, imoni mẹ, we ru emu omiomiovwi tiọye-e, ovwan mrẹre nẹ ọshare nana bru uvwe rhe uwevwi, ovwan ruẹ igbiruo-o.

²⁴Nighe, ọmọtobẹ mẹ vẹ ọnse rọye etinẹ; ji me vwẹ ayen rhe uphephẹ. Ovwan ru ayen obo ri je ovwan ejobi, ẹkẹvuọvo we ru ọshare nana igbiruo tiọye-e.

²⁵Ẹkẹvuọvo eshare na davwerhọ rọye-e. Eriyin na ohwo na de mu aye rẹ ọnse rẹ ọshare na phihọ uphephẹ kẹ ayen; ayen vẹ aye na da mrẹ oma, ayen de nene aye na vwerhe vwẹ ason na ejobi re te urhiọke. Ọke vwo muegbe erhie re, ayen de siobọ nẹ aye na kpo

²⁶Rẹ ọke vwo rhie cha, etiyin aye na de rhi she gberi anurhoro rẹ uwevwi rẹ ọshare na asan rẹ ọrovworo epha, bẹsiẹ rẹ ọke vwo rhie.

²⁷Urhiọke na rẹ ọshare rẹ aye na vwo vrẹn, ro vwo rhie ẹchẹ rẹ uwevwi na rere ọ yanran kpo, nighe ọnse rọye na she gberi anurhoro na, ọ da ghwẹ abọ kpahọ.

²⁸Ọ da ta kẹ aye na nẹ, Vrẹn, rere avwanre yanran, Ẹkẹvuọvo ọ kpahe kẹ-ẹ. Etiyin o de mu aye na phihọ enu rẹ ekẹtẹkẹtẹ, ọ da gua kpo uwevwi rọye

²⁹Rọ vwọ rhe uwevwi rọye nu, ọ da reyọ aphia, o de mu ọnse rọye na gbere otọ ọ da va ibribro ẹko ihwivẹ, ọ da ra gharọ nene ubrotọ rẹ Izrẹl na ejobi.

³⁰Ihwo ejobi re mrẹre da ta nẹ, Oghẹre rẹ emu ọtiọna je phia-a eyẹrẹ a je mrẹ emu ọtiọna vwẹ ọke rẹ ihwo rẹ Izrẹl vwọ nẹ otọ rẹ Ijipt rhe, rhi te ẹdẹ nana-a; e phio iroro, a jẹ iroro, rere a ta ota.