Read urhobo Iguẹdjọ 2 Bible Online

Iguẹdjọ 2 - urhobo bible

Iguẹdjọ 2

¹Asakiephana amakashe rẹ Ọrovwohwo da yanran nẹ Gilgal kpo obi Bokim. Ọ da tanẹ, Me reyọ ovwan nẹ Ijipt rhe, mi de phi ovwan phihọ evun rẹ otọ ri Mi ve phihọ kẹ esẹ rẹ ovwan. Me da tanẹ, Me gbe sa guọghọ ọphọ rẹ Me vẹ ovwan rere na-a,

²nẹ ovwan vẹ ihwo rẹ otọ nana re ọphọ-ọ, ovwan ke cha guọghọ egbada rayen. Ẹkẹvuọvo ovwan mu ọghọ kẹ urhi mẹ-ẹ. Ọnana ki didi emu ovwan ruru na?

³Fiki rẹ ọtiọye na Me vwọ tanẹ, Me gbe cha djẹ ayen nẹ obaro rẹ ovwa-an, ẹkẹvuọvo ayen ki che hirhe phihọ ukon kẹ ovwan, edjọ rayen ke cha dia owọ ẹkprọ kẹ ovwan.

⁴Ọke rẹ amakashe rẹ Ọrovwohwo na vwo ta eta nana kẹ ihwo rẹ Izrẹl ejobi nu, ihwo na ejobi da kpare urhuru rayen kpenu, ayen da viẹ.

⁵Ayen de mu odẹ kẹ asan na nẹ Bokim, ayen de ze izobo kẹ Ọrovwohwo na vwẹ Etiyin.

⁶Ọke ri Joshua vwo siobọ nẹ ihwo na yanran nu, ihwo rẹ Izrẹl dohwo du uku rọye da ra reyọ vwẹ otọ na.

⁷Ihwo na da ga Ọrovwohwo vwẹ ẹdẹ ri Joshua ejobi, kugbe ẹdẹ rẹ ekpako na ejobi ri Joshua ghwu jovwo na, re mrẹ iruo ride ejobi rẹ Ọrovwohwo na ru kẹ Izrẹl.

⁸Joshua rẹ ọmọ ri Nun, rẹ odibo rẹ Ọrovwohwo na, da dia akpọ ikpe ujori gbe ihwe ro ki ghwu.

⁹Ayen de sho phihọ ughwru rẹ otọ rọye vwi Timnateres, vwẹ evun rẹ orho rẹ ugbenu rẹ Ifrem, vwẹ obọhwẹre rẹ ugbenu rode ri Gaash.

¹⁰Uvwiẹ yena ejobi de ghwu bru esẹ rayen; Etiyin uvwiẹ ọfa de rhi mu kpahe ayen, re riẹn Ọrovwohwo na-a kugbe iruo ro ruru kẹ Izrẹl na-a.

¹¹Ihwo rẹ Izrẹl de ru emu umwemwu vwẹ obaro rẹ Ọrovwohwo ayen da ga Baal,

¹²ayen da sen Ọrovwohwo Ọghẹnẹ rẹ esẹ rayen, ohwo rọ reyọ ayen nẹ otọ rẹ Ijipt rhe, ayen de nene edjọ efa, edjọ rẹ ihwo re dia yariẹ ayen phihọ na, ayen da vwẹ uyovwi te otọ kẹ ayen; ayen da kpare ophu rẹ Ọrovwohwo na.

¹³Ayen da sen Ọrovwohwo na, ayen da ga Baal kugbe Ashera.

¹⁴Fiki rẹ ọtiọye na Ọrovwohwo de mu ophu ọgangan kpahe Izrẹl, o de phi ayen phihọ abọ re igbunegbu ri gborhe emu rayen; ọ da shẹ ayen vwọ kẹ ogangan rẹ ivwighrẹn re yariẹ ayen phihọ, ọtiọye na ayen rhe vwo ogangan vwẹ oma rẹ ivwighrẹn rẹ aye-en.

¹⁵Ọke rẹ ayen de kpo ofovwi obọ rẹ Ọrovwohwo kọ tua kpahe ayen vwi Kasan kasan rẹ ayen teri fiki rẹ imwemwu rayen, kirobo rẹ Ọrovwohwo ta kẹ ayen vẹrhe, kirobo rẹ Ọrovwohwo duvwu iyori kẹ ayen vẹrhe; ayen da mrẹ ọdjarhe buebu.

¹⁶Etiyin Ọrovwohwo da vwe iguẹdjọ vwo mu, ri rhi sivwi ayen nẹ obo ogangan rẹ ihwo ri gborho ayen.

¹⁷Dede na ayen kerhọ ri iguẹdjọ na-a; kidie ayen gbe igberadja nene edjọ efa ayen da vwẹ uyovwi te otọ kẹ ayen; siẹvuọvo na ayen de kudẹriẹ ni idjerhe rẹ esẹ rẹ ayen neneri, ihwo ri mu ọghọ kẹ irhi re Ọrovwohwo na, ayen gbi rhe ru ọtiọye-e.

¹⁸Kọke kọke rẹ Ọrovwohwo na vwọ vwẹ iguẹdjọ vwo mu kẹ ayen, yẹ Ọrovwohwo na vẹ Oguẹdjọ na herọ, o de sivwi ayen nẹ obọ rẹ ivwighrẹn rayen, vwẹ ọke rẹ oguẹdjọ na ejobi; kidie Ọrovwohwo na nẹ arodọvwẹ rayen fiki rẹ enuebro rẹ oja vẹ oshenyẹ rẹ ihwo ri mu kpahe ayen.

¹⁹Ẹkẹvuọvo ọke re oguẹdjọ na de ghwu nure, ayen Me rhoma re ru uruemu rọ branọ uruemu rẹ esẹ rayen, edjọ efa keye ayen nene, keye ayen ga vwẹ uyovwi te otọ kẹ, ayen rhọvwe siobọ nẹ uruemu rẹ udu ọgangan rẹ ayen na-a.

²⁰Ọtiọye na ophu rẹ Ọrovwohwo da rhe tua phihọ kpahe Izrẹl, ọ da ta, Fikiridie ihwo nana ru umwemwu kpahe ọphọ mẹ ri mi ji urhi rọye kẹ esẹ rayen, ayen mu ọghọ kẹ urhuru mẹ-ẹ,

²¹kẹ ọke nana yanran Me gbe cha djẹ ihwo na nẹ ẹgborho ri Joshua ghwu jovwo kẹ ayen na no-o,

²²rere Me vwẹ ayen davwe Izrẹl ni, sẹ ayen sa karohọ nene idjerhe rẹ Ọrovwohwo na kirobo rẹ esẹ rẹ ayen ruru, eyẹrẹ ayen se ruo-o.

²³Ọtiọye na o de jẹn ẹgborho yena vwo, ọ gbe djẹ ayen no ofuọvo-o, o gbi phi ayen phihọ ogangan rẹ obọ ri Joshua-a.