Read urhobo Iguẹdjọ 20 Bible Online

Iguẹdjọ 20 - urhobo bible

Iguẹdjọ 20

¹Etiyin ihwo rẹ Izrẹl ejobi de vrẹn nẹ obi Dan rhe Bẹẹrshẹba, kugbe otọ ri Giliad, ogbotu na de rhi koko kerẹ ohwo ọvo ayen de bru Ọrovwohwo rhe vwi Mizpa.

²Ehọnvwọre ride rẹ Orua rẹ Izrẹl, eshare re vwẹ owọ yan re vwẹ ọlọkọ họnra, uriori uriuvẹ da rhe vwẹ oma phia vwẹ ukoko rẹ ihwo rẹ Ọghẹnẹ

³(Emọ ri Bẹnjamin de nyo nẹ ihwo rẹ Izrẹl yanran kpo Mizpa). Etiyin ihwo rẹ Izrẹl da ta nẹ, Ta kẹ avwanre, mavọ uvumwemwu nana wan rhe?

⁴Etiyin ihwo ri Livae na, ọshare re hwe aye rọye na, da kpahe tanẹ, Me rhe obi Gibeah vwẹ otọ ri Bẹnjamin, Me vẹ ọnse mẹ de re shevwerhẹ etiyin ason yena.

⁵Etiyin eshare ri Gibeah da kpare ohọnre bru uvwe rhe, ayen da gba riariẹ uwevwi re me epha phihọ vwẹ ason na; rere ayen rhi vwo hwe vwe, ayen de mu ọnse mẹ yanran re hwe.

⁶Etiyin mi de mu ọnse mẹ ra va ibribro me da gharọ phihọ ubrotọ rẹ Izrẹl na ejobi, kidie ayen gbe ẹgua ayen vwo ọnko vwẹ Izrẹl.

⁷Nighe, ovwan ihwo rẹ Izrẹl ovwan ihwo ejobi, ovwan jẹ iroro rhe vwẹ etinẹ na.

⁸Etiyin ihwo na ejobi de vrẹn kerẹ ohwo ọvo, tanẹ, Avwanre ohwo ọvuọvo che kpo utughẹ rọye-e, avwanre ohwo ọvuọvo che rhivwi kpo uwevwi rọye-e.

⁹Ẹkẹvuọvo ọtiọna avwanre che ru kpahe Gibeah: avwanre brotu kpo ofovwi na,

¹⁰avwanre ra reyọ eshare rẹ orua rẹ Izrẹl na ejobi, a reyọ eshare ihwe nẹ orua ujori, rhe, a reyọ eshare ujori nẹ orua uriori, a reyọ eshare uriori nẹ orua uriori ihwe, rere ihwo nana ghwa emu nene ihwo na, rere ọke rẹ ihwo nana da rhe rere ayen ra reihri vwẹ obọ ri Gibeah ri Bẹnjamin, fiki rẹ uruemu o omiomiovwi rẹ ayen ruru vwẹ Izrẹl.

¹¹Ọtiọye na eshare rẹ Izrẹl na ejobi de rhi koko vwọ so orere na, ayen de kuomagbe kerẹ ohwo ọvo.

¹²Etiyin orua rẹ Izrẹl na ejobi de ji eshare bru orua ri Bẹnjamin, tanẹ, Ọna didi ogbiru re phia vwẹ oma rẹ ovwan na?

¹³Asakiephana ovwan reyọ ihwo ri gbe ozighi vwi Gibeah rhe avwanre, rere avwanre hwe ayen kufia, rere a mrasan si ogbiru nẹ Izrẹl. Ẹkẹvuọvo ihwo ri Bẹnjamin kerhọ rẹ urhuru rẹ ihwo rẹ Izrẹl rẹ imoni rayen na-a.

¹⁴Etiyin ihwo ri Bẹnjamin de nẹ irere rẹ Gibeah rhe, ayen da kpare ofovwi vwọ so ihwo rẹ Izrẹl na!

¹⁵vwẹ ẹdẹ yena ihwo ri Bẹnjamin de koko ihwo rẹ irere rẹ ayen ejobi eshare uriori uje gbe esan re sa vwẹ ọlọkọ họnra, kugbe ihwo ri Gibeah re sanọ eshare ujori ighwrẹm

¹⁶Eshare ujori ighwrẹn na ehwẹrobọ ayen ruẹ; ọvuọvo ayen sa vwẹ ubioragha phi ogẹto reyọ, ọvuọvo phiẹ chọ-ọ

¹⁷Etiyin eshare rẹ Izrẹl re vwẹ oma ba Bẹnjamini-i, de ji koko eshare uriori ujori ẹne re vwẹ ọlọkọ họnra; eshare nana ejobi na egba rẹ ofovwi iruẹ.

¹⁸Ihwo rẹ Izrẹl na de vrẹn yanran kpo Bẹtẹl, ra nọ Ọghẹnẹ nẹ, Kono vwẹ usun rẹ avwanre na re cha ka yanran ra họnre ihwo ri Bẹnjamin na? Etiyin Ọrovwohwo da tanẹ, Juda re cha ka yanran.

¹⁹Etiyin ihwo rẹ Izrẹl de vrẹn vwẹ irhiọke, ra vwẹ ofovwi so Gibeah.

²⁰Eshare rẹ Izrẹl na da ra vwẹ ofovwi so Bẹnjamin, eshare rẹ Izrẹl na da tẹrẹ urhiẹ rẹ ofovwi vwọ họnre ayen vwẹ obi Gibeah.

²¹Ihwo ri Bẹnjamin de nẹ Gibeah rhe, ayen da vwẹ eshare rẹ Izrẹl uriori uje gbe ivẹ vwo gbere otọ vwẹ ẹdẹ yena.

²²Ẹkẹvuọvo ihwo na eshare rẹ Izrẹl na da gan udu, ayen da rhoma ra tẹrẹ urhiẹ rẹ ofovwi vwẹ asan rẹ ayen de ke phi ofovwi vwẹ edẹ rẹ ẹsosuọ na.

²³Etiyin ihwo rẹ Izrẹl na da ra viẹ vwẹ obaro rẹ Ọrovwohwo na re te ọke rẹ ovwọnvwọn; ayen da ra nọ Ọrovwohwo nẹ, kẹ avwanre rhoma kpo ofovwi ra họnre imoni rẹ avwanre ihwo ri Bẹnjamin na? Ọrovwohwo da tanẹ, Ovwan ra họnre ayen.

²⁴Ọtiọye na ihwo rẹ Izrẹl da rhe họnre ihwo ri Bẹnjamin vwe ẹdẹ rivẹ na

²⁵Bẹnjamin da ra họnre ayen nẹ obi Gibeah vwẹ ẹdẹ rivẹ na ayen da vwẹ eshare rẹ Izrẹl uriori ihwe gbe ẹrenren vwo gberotọ; eshare nana ejobi na ihwo re vwẹ ọlọkọ họnra.

²⁶Etiyin otu rẹ ofovwi, rẹ ihwo rẹ Izrẹl ejobi na, da yanran ra viẹ vwẹ obi Bẹtẹl; ayen de tidia chiri owẹvwe vwẹ obaro rẹ Ọrovwohwo re te ọke rẹ ovwọnvwọn vwẹ ẹdẹ yena, ayen de ze izobo ra torhẹre kugbe izobo rẹ ufuoma vwẹ obaro rẹ Ọrovwohwo.

²⁷Etiyin ihwo rẹ Izrẹl na da ra nọ Ọrovwohwo (kidie ekpeti rẹ ọphọ rẹ Ọghẹnẹ na oboyi vwẹ ọke yena,

²⁸Etiyin Finihas rẹ ọmọ rẹ Eleaza, ọmọ rẹ Erọn ri gbe odibo vwẹ obaro rọye vwẹ ọke yena), ọ da tanẹ, kẹ avwanre rhoma ra họnre ihwo ri Bẹnjamin imoni rẹ avwanre na, gbenẹ avwanre jovwo? Etiyin Ọrovwohwo da tanẹ, Ovwan yanran; kidie Mi phi ayen pliihọ obọ rẹ ovwan vwẹ odẹ rọ cha na.

²⁹Ọtiọye na Izrẹl da ra ghare eshare rẹ ofovwi riariẹ Gibeah phihọ.

³⁰Etiyin ihwo rẹ Izrẹl da ra họnre ihwo ri Bẹnjamin vwẹ ẹdẹ rerha, ayen da ra họnre Gibeah, kirobo rẹ ayen ruru vẹrhe.

³¹Etiyin ihwo ri Bẹnjamin da ra họnre Izrẹl, e de si ayen nẹ orere na; ke hwe ayen kirobo re hwe ayen jovwo, vwẹ ẹdẹ erha na, ẹdẹ ọvo kpo obi Bẹtẹl, ẹdẹ rivẹ kpo obi Gibeah, vwẹ uphephẹ rẹ ubrotọ na, eshare rẹ Izrẹl kerẹ ọgban e hweri.

³²Etiyin ihwo ri Bẹnjamin da tanẹ, a van ayen nẹ otọ vwẹ obaro rẹ avwanre nure, kirobo re ru ayen vwẹ ọke rẹ ẹsosuọ. Ẹkẹvuọvo eshare rẹ Izrẹl na da tanẹ, E gbe jẹn avwanre djẹ, rere e si ayen yanran nẹ orere na vwo kpo ada erha rode na.

³³Eshare rẹ Izrẹl na de vrẹn nẹ asan rẹ ayen epha rhe, ayen da ghare ofovwi phihọ Baatamar; eshare rẹ Izrẹl re ghare phihọ aghwa na da họrhọ nẹ obuko ri Geba rhe.

³⁴Etiyin eshare uriori ihwe rẹ Izrẹl sanọre na da rhe họnre Gibeah, ofovwi na da rhe gan; ẹkẹvuọvo ihwo ri Bẹnjamin riẹnre nẹ ughwu si kẹrẹ ayen nure-e.

³⁵Ọrovwohwo de phi Bẹnjamin kua kẹ Izrẹl; etiyin eshare rẹ Izrẹl na de hwe eshare ri Bẹnjamin uriori uje gbe iyori vwẹ ẹdẹ yena; eshare nana ejobi na ihwo re vwẹ ọlọkọ phi ofovwi.

³⁶Etiyin na ihwo ri Bẹnjamin da mrẹ nẹ e phi ayen kparobọ. Eshare rẹ Izrẹl de phi oma phihọ otọ ki Bẹnjamin, fikiridie ayen vwẹ ẹro so eshare rẹ ayen ghare phihọ aghwa ri Gibeah,

³⁷Eshare ra ghare phihọ aghwa na da rhe họrhọ ro Gibeah; eshare ra ghwa na da vwẹ ọlọkọ guọghọ orere na ejobi.

³⁸Ọke nana eshare rẹ Izrẹl na da vwẹ oka phihọ otọ kẹ eshare rẹ ayen ghare phihọ aghwa na nẹ ọke rẹ ighorigho rode rẹ erhanre de guvwie kpenu vwẹ orere na

³⁹eshare rẹ Izrẹl na gba rhẹriẹ oma rhe evun rẹ ofovwi na. Asakiephana Bẹnjamin mu ihwo phihọ ehwe rẹ ayen de hwe kerẹ eshare ọgban rẹ Izrẹl ayen da tanẹ, E ghinẹ hwe ayen tototo vwẹ obaro rẹ avwanre, kerẹ ọke rẹ ofovwi rẹ ẹsosuọ na

⁴⁰Ẹkẹvuọvo ọke rẹ oka rẹ ighorigho na vwo guvwie kpenu, vwẹ evun rẹ orere na, etiyin ihwo ri Bẹnjamin na de ni obuko rayen; nighe, orere na ejobi ko bru ighorigho kpenu.

⁴¹Etiyin eshare rẹ Izrẹl na de rhoma rhe, oshọ de mu ihwo ri Bẹnjamin, kidie ayen mrẹre nẹ ughwu si kẹre ayen nure.

⁴²Eriyin na ayen de chuko ku eshare rẹ Izrẹl na vwẹ idjerhe rẹ aton na, ẹkẹvuọvo ofovwi na de vwrẹ ayen ẹro phihọ, e de hwe ihwo ri nẹ irere na rhe vwẹ uherevie rayen.

⁴³A da nyavwe ihwo ri Bẹnjamin na kuotọ ayen da vwọ tua ihwo na vwẹ ichiyi chiyi ayen muotọ nẹ obi Nohah shesheri re te obaro rẹ ọnre vwi Gibeah.

⁴⁴Eshare ri Bẹnjamin uriori ihwe gbe ẹrenren de ghwu, eshare nana ejobi na egba rẹ ofovwi iruẹ

⁴⁵Etiyin ayen da djẹ rhi-vwi kpo aghwa rẹ oragha ri Rimmọn; a da nyavwe eshare uriori iyori vwẹ usun rayen na kuotọ vwẹ idjerhe rode na, a da vwọ tua ayen gangan kpo obi Gidọm, kugbe eshare uriori ivẹ rayen re hweri.

⁴⁶Ọtiọye na eshare ri Bẹnjamin re vwẹ ọlọkọ họnra ri ghwuru vwẹ edẹ yena da dia eshare uriori uje gbe iyori, eshare nana ejobi na egba rẹ ofovwi i ruẹ.

⁴⁷Ẹkẹvuọvo eshare uriorha de rhivwi djẹ kpo aghwa rẹ oragha ri Rimmọn, ayen da dia obo oragha ri Rimmọn emeranvwe ẹne.

⁴⁸Etiyin eshare rẹ Izrẹl na da rhẹriẹ oma ra họnre ihwo ri Bẹnjamin na, a da vwẹ ọlọkọ hwe ayen, te eshare te eranvwe ejobi re ayen mrẹre. Ayen da vwẹ erhanre torhẹ irere na ejobi rẹ ayen mrẹre.