Read urhobo Iguẹdjọ 3 Bible Online

Iguẹdjọ 3 - urhobo bible

Iguẹdjọ 3

¹Enana eye ẹgborho rẹ Ọrovwohwo na jovwo, rere a vwẹ ayen davwe Izrẹl ni, kọye ihwo rẹ Izrẹl ejobi re riẹn obo re phi ofovwi ri Kenan na-a,

²rere uvwiẹ ejobi rẹ ihwo rẹ Izrẹl sa vwọ riẹn obo re phi ofovwi, rere ọ mrẹ vwọ yono ihwo re riẹn obo re phi ofovwi-i.

³Enana ẹgborho na: ehọnvwọnre iyori rẹ ihwo ri Filistia, kugbe ihwo ri Kenan na ejobi, kugbe ihwo ri Sidọn, kugbe ihwo ri Hiv re dia ugbenu rode ri Lẹbanọn, nẹ obo ugbenu rode ri Baal-hermọn re te asan ra wan ruọ Hamat.

⁴A da vwẹ ayen davwe Izrẹl ni, rere e vwo vughe sẹ ayen ghine mu ọghọ kẹ irhi rẹ Ọrovwohwo na, ro ji kẹ Mosis no vwọ kẹ esẹ rayen.

⁵Ọtiọye na ihwo rẹ Izrẹl da dia kugbe ihwo ri Kenan, ihwo rẹ Het, ihwo rẹ Amọr, ihwo ri Periz, ihwo rẹ Hiv, kugbe ihwo ri Jebu;

⁶ayen da reyọ emetẹ rayen vwọ rọvwọ, ayen da vwẹ emetẹ rayen vwọ kẹ emeshare rayen; ayen da ga edjọ rayen.

⁷Ihwo rẹ Izrẹl de ru obo ro miovwiri vwẹ obaro rẹ Ọrovwohwo, Ọrovwohwo rẹ Ọghẹnẹ na da chọrọ ayen ẹro, ayen da ra ga Baal kugbe Ashera.

⁸Eriyin na ophu rẹ Ọrovwohwo na da rhe gan phihọ kpahe Izrẹl, ọ da shẹ ayen phihọ obọ ri Kushanrishataim ovie ri Mẹsopotemia; ihwo re Izrẹl da ga Kushanrishataim ikpe erẹnrẹn.

⁹Ẹkẹvuọvo ọke rẹ ihwo rẹ Izrẹl vwo kperi se Ọrovwohwo, Ọrovwohwo da vwẹ osivwi ọvo vwo mu kẹ ihwo rẹ Izrẹl ro sivwi ayen, Otniẹl ọmọ ri Kenaz, oniọvo re vwiẹ kpahe Kalẹb.

¹⁰Erhi rẹ Ọrovwohwo na da rhe ruọ oma, o de guẹdjọ rẹ Izrẹl, o de re phi ofovwi, Ọrovwohwo de phi Kushanrishataim ovie ri Mẹsopotemia phihọ obọ rọye, o de phi Kushanrishataim kparobọ.

¹¹Ọtiọye na otọ na de rovwoma ikpe ujuvẹ. Etiyin Otniẹl ọmọ rẹ Kenaz na de ghwu.

¹²Ihwo rẹ Izrẹl na da rhoma ru obo ri miovwiri vwẹ obaro rẹ Ọrovwohwo; Ọrovwohwo de ru Ẹglọn ovie ri Moab na ga oma vwo mu kpahe Izrẹl, fikiridie ayen ru obo ro miovwiri vwe obaro re Ọrovwohwo na.

¹³O de koko ihwo rẹ Ammọn kugbe ihwo rẹ Amalẹk, kẹ oma rọye ayen da ra họnre Izrẹl kua, ayen da reyọ orere rode rẹ iriẹ na.

¹⁴Ihwo rẹ Izrẹl da ga Ẹglọn ovie ri Moab na ikpe ihwe gbe ẹrenren.

¹⁵Ẹkẹvuọvo ọke rẹ ihwo rẹ Izrẹl na vwo kperi se Ọrovwohwo na, Ọrovwohwo da vwẹ osivwi ọvo, Ehud, ọmọ rẹ Gera, ohwo ri Bẹnjamin, ọhwẹrobọ rẹ ọshare vwo mu kẹ ayen. Ihwo rẹ Izrẹl de toro arhọghọ vwọ kẹ vwo rhe Ẹglọn ovie ri Moab na.

¹⁶Ehud de duvwu agbogu ọvo, ro gro te uwurho rẹ obọ kẹ oma rọye, ọ da gba mu ekpoghowọ rẹ obọrhe o de ku ewun rhurho.

¹⁷Ọ da reyọ ọko rẹ arhọghọ na vwo rhe Ẹglọn ovie ri Moab Ẹglọn na pha rhuarho tuma.

¹⁸Ọke rẹ Ehud vwọ ghwa ọko rẹ arhọghọ na kẹ nu, ọ de ji ihwo re ghwa ọko rẹ arhọghọ na rhe na kpo.

¹⁹Ẹkẹvuọvo ekpuyovwi rọye ọvo de rhivwi nẹ asan ra da vwẹ oragha kare oma rọ kẹrẹ Gilgal na rhe, ọ da ta nẹ, Ovie, mi vwo ota rẹ odjahọ ọvo ri mi che nene uwe ta. O de ji urhi nẹ, Afọ, ihwo ri mudia kẹrẹ ejobi de vrẹn nẹ Etiyin.

²⁰Ehud de bro rhe, vwẹ asan rẹ ọye ọvo tidia na vwẹ evun rẹ ọguan rọ da reyọ odju. Ehud da tanẹ, Mi vwo ovuẹ ọvo nẹ obọ rẹ Ọghẹnẹ bru we rhe O de vrẹn nẹ asan ro tidia na rhe.

²¹Ehud da riẹn obọhwẹre rọye, ọ da reyọ agbogu na nẹ ekpoghowọ rẹ obọrhe rọye rhe, ọ de vwo duvwo evun;

²²o de duvwu ruọ re te udjẹ rọye, ivwri rẹ oma rọye da tan rhurho, fikiridie ọ yoro agbogu na nẹ evun rọye-e, o de duvwo fi obuko.

²³Etiyin Ehud da yanran kpo ọmọguan rẹ unurhoro na, o de huhu ẹchẹ rẹ ọguan na ejobi, ọ da kanrọ gbe.

²⁴Rọ vwọ yanran nu, idibo rọye na da rhe; ọke rẹ ayen vwọ mrẹ ẹchẹ ejobi rẹ ọguan na ra kanre, ayen de roro nẹ, O di rovwoma vwẹ evun rẹ uvun rẹ ọguan rọ da reyọ odju na.

²⁵Ayen da hẹrhẹ krekri bẹsiẹ rọ vwọ bẹn ayen; ẹkẹvuọvo ọke ro gbe rhe rhie ẹchẹ rẹ ọguan na-a na, ayen da reyọ usiaphrẹ vwọ rhie ẹchẹ na; Etiyin ayen da ra mrẹ orivwi rẹ ọrovwo ayen ro she gheri utuwevwi.

²⁶Ọke rẹ ayen vwọ je hẹrhẹ na, Ehud da djẹ wan obọ ra da vwẹ eragha kare oma, ọ da djẹ yanran kpo obi Seirah.

²⁷Ọke ro te uwevwi nu, ọ de hworo owanre vwẹ evun rẹ ugbenu rẹ orho rẹ Ifrem; ihwo rẹ Izrẹl de bro rhe orho rẹ ugbenu na ọ da ka obaro kẹ ayen.

²⁸Ọ da ta kẹ ayen, nẹ, Nene uvwe, kidie Ọrovwohwo na phi ihwo ri Moab rẹ ivwighrẹn rẹ ovwan na phihọ obọ rẹ ovwan nure. Ọtiọye na ayen de nene ayen de re gborho ushuame ri Jọdan ro hirhe aro ku Moab, ayen gbe rhọvwe nẹ ohwo ọvuọvo wanvrẹ-ẹn.

²⁹Ọke yena ayen de hwe eshare re goma ejobi, re ihwo ri Moab, kerẹ ihwo uriori ihwe; o vwo ọshare ọvuọvo rọ vabọ-ọ.

³⁰Ọtiọye na e de phi Moab kparobọ vwẹ ẹdẹ yena vwọ kẹ Izrẹl. Otọ na de vwo omaerovwo vwẹ ikpe ujonẹ.

³¹Ọke yena vwọ wan nu Shamga ọmọ re Anat, o da vwẹ ugbọphogho hwe ihwo ri Filistia ujori esan okpuyovwi rọye de ji sivwi Izrẹl.