Read urhobo Iguẹdjọ 4 Bible Online

Iguẹdjọ 4 - urhobo bible

Iguẹdjọ 4

¹Ihwo rẹ Izrẹl na da rhoma ru uruemu miomiovwi vwẹ obaro rẹ Ọrovwohwo na, rẹ Ehud vwo ghwu nu.

²Ọrovwohwo da shẹ ayen phihọ obọ ri Jabin rẹ ovie ri Kenan, rẹ re uvie vwi Hazọr; onotu rẹ ofovwi rọye ki Sisira, rọ dia evun rẹ Haroshẹtagoiim.

³Etiyin ihwo rẹ Izrẹl de kperi se Ọrovwohwo nẹ ọ cha ayen ukọ; kidie o vwo idjighere rẹ ofovwi rẹ utehru uriọne gbe ujori, ọ da vwẹ omẹdja shenyẹ ihwo rẹ Izrẹl ikpe uje.

⁴Ọke nana Dẹbora, re ọmraro rẹ aye, aye ri Lapidọt, ko guẹdjọ rẹ Izrẹl vwẹ ọke yena.

⁵Ko tidia otọ rẹ oriẹ ri Dẹbora vwẹ uvwre ri Rama vi Bẹtẹl rẹ orho rẹ ugbenu rẹ Ifrem; ihwo rẹ Izrẹl de bro rhe ẹdjeguo.

⁶O de ji ikọn re se Barak ọmọ rẹ Abinoam nẹ Kedẹsh ri Naftali rhe, ọ da ta kẹ nẹ, Ọ dianẹ Ọrovwohwo na, Ọghẹnẹ rẹ Izrẹl na, ji urhi kẹ wẹ nẹ, Yanran, koko ihwo wẹn rẹ ugbenu rode ri Tabọr, rere wọ reyọ eshare uriori ihwe nẹ uvwiẹ ri Naftali rhe kugbe emọ ri Zẹbulọn.

⁷Ki mi si Sisira rọ uphẹphẹ, ọgba rẹ ofovwi ri Jabin, kọ cha vwa wẹ vwẹ oma rẹ urhie ri Kishọn vẹ idjighere rẹ ofovwi rọye kugbe otu rẹ ofovwi rọye; ki Mi phio phihọ obọ wẹn.

⁸Barak da ta kẹ nẹ, Wo de nene uvwe ra, ke Me ra; ẹkẹvuọvo wo rhe nene uvwe ra-a, Me rha ra-a.

⁹Ọ da ta kẹ nẹ, mi nene uwe ra, ẹkẹvuọvo urinrin rẹ oyan ri idjerhe na cha dia ọwẹ-ẹn, kidie Ọrovwohwo na shẹ Sisira phihọ obọ rẹ aye nure. Etiyin Dẹbora de vrẹn o de nene Barak kpo obi Kadẹsh.

¹⁰Barak de se Zẹbulọn kugbe Naftali kpọ Kedẹsh, eshare uriori ihwe de nene ichichiyi, Dẹbora vẹ ọye da yanran.

¹¹Ọke nana Heber ohwo ri Ken da hẹriẹ oma nẹ ihwo ri Ken ri chekọ; rẹ uvwiẹ ri Hobab rẹ ọgọ ri Mosis, ọ da bọn utughẹ rọye phihọ asan ro tephe rọ kẹrẹ ọhahe rọ hẹ evun ri Zaanannim, rọ kerẹ Kedẹsh.

¹²Ọke ra vwọ ta kẹ Sisira nẹ Barak ọmọ ri Abinoam yanran kpo Ugbenu rode ri Tabor,

¹³Sisira de se otu ofovwi ri idjighere rọye ejobi phia, idjighere rẹ utehru ujori irhiri, kugbe eshare re vẹ ọye gba herọ, nẹ Haroshẹtagoiim rhe urhie ri Kishọn.

¹⁴Dẹbora da ta kẹ Barak, Vrẹn kidie nonẹ ẹdẹ re Ọrovwohwo na vwo phi Sisira phihọ obọ wẹn. Ọ dianẹ Ọrovwohwo na re ka obaro kẹ wẹ Ọtiọye na Barak da yanran nẹ Ugbenu rode ri Tabọr na vẹ eshare uriori ihwe re yan nene.

¹⁵Ọrovwohwo na da vwẹ ọlọkọ vẹn Sisira kugbe idjighere rọye ejobi vẹ otu ofovwi rọye ejobi vwẹ obaro ri Barak; Sisira de wotọ nẹ idjighere rọye ọ da vwe owọ djẹ yanran.

¹⁶Barak da vwọ tua otu ri idjighere na vẹ otu ofovwi rọye re te Harọshẹtagoiim, a da vwẹ ọlọkọ hwe otu ofovwi ri Sisira ejobi; ọshare ọvuọvo gbi chekọ-ọ.

¹⁷Ẹkẹvuọvo Sisira da vwẹ owọ djẹ ra ro utughẹ ri Jael, aye ri Hebẹr ohwo ri Ken, fikiridie ufuoma herọ vwẹ uvwre ri Jabin ovie ri Hazọr vẹ uwevwi ri Heber ohwo ri Ken.

¹⁸Jael de rhi dede Sisira, ọ da ta kẹ nẹ, Vwẹriẹ rhe, Ọrovwohwo, vwẹriẹ bru vwe rhe, Wọ djẹ oshọ-ọ. Ọtiọye na ọ da vwẹriẹ bru aye na rhe evun rẹ utughẹ, ọ da vwẹ ukpon rhurho.

¹⁹Ọ da ta kẹ aye na nẹ, Biko, kẹ vwẹ amame Me da; kidie urhuru rẹ ame hwe vwe. Aye na de rhie ophiẹn rẹ ame rẹ iviẹn ọ da vwọ kẹ da, ọ da vwẹ ukpon rhurho.

²⁰Ọ da ta kẹ aye na nẹ, Mudia vwẹ anurhoro rẹ utughẹ na, kọshare kọshare da rhe nọ wẹ nẹ, ohwo ọvo etinẹ? Wọ Me tanẹ, Ẹjo.

²¹Ẹkẹvuọvo Jael aye ri Heber da reyọ ubibẹ rẹ utughẹ na, kugbe ubrogba vwẹ obọ, ọ da bẹbẹ yanran bro o de hwe ubibẹ na phihọ afọnrhe rọye, ọ da ruọ fiotọ, vwọ ọke rẹ oma vwọ ghwọrọ rẹ ovwerhe vwo muo kokodo. Etiyin o de ghwu.

²²Nighere, ri Barak vwọ tua Sisira cha, Jael de rhi dede, ọ da ta kẹ nẹ, Yanrhe, rere mi dje ọshare ru wọ guọnọ na kẹ wẹ. Ọ vwọ ro uwevwi, ọ da mrẹ orivwi ri Sisira rọ riẹn gbere otọ, a kanre ubibẹ muo afọnrhe.

²³Ọtiọna Ọghẹnẹ ghota phihọ unu rẹ Jabin ovie ri Kenan vwẹ obaro rẹ emọ rẹ Izrẹl vwẹ ẹdẹ yena.

²⁴Ihwo rẹ Izrẹl de phi Jabin ovie ri Kenan na kparobọ, ayen da guọghọ Jabin rẹ ovie ri Kenan na.