Read urhobo Iguẹdjọ 6 Bible Online

Iguẹdjọ 6 - urhobo bible

Iguẹdjọ 6

¹Ihwo rẹ Izrẹl de ru obo re chọre vwẹ obaro rẹ Ọrovwohwo na; Ọrovwohwo de phi ayen phihọ obọ ri Midian ikpe ighwrẹn.

²Midian de phi Izrẹl kparobọ, ifiki ri Midian na ihwo rẹ Izrẹl da ra tọn inu phihọ evun rẹ igbenu ride na kugbe evun rẹ emwa kugbe asan egangan kokoroko vwọ kẹ oma rẹ ayen ọvo.

³Kidie ọke rẹ ihwo rẹ Izrẹl da kọn ekankọn phihọ otọ nu ihwo ri Midian kugbe ihwo rẹ Amalẹk vẹ ihwo re dia obaro rẹ ọnre na Me kpare ohọnre bru ayen rhe;

⁴ayen Me gba yariẹ ayen phihọ ayen Me guọghọ emu rẹ otọ na, shesheri re te ubrotọ ri Gaza, ayen gbi je emu vwọ kẹ Izrẹli-i, igegede eyẹ irhuẹn kugbe ekẹtẹkẹtẹ ọvuọvo gbi chekọ-ọ

⁵Fikiridie ayen vẹ uchuru rẹ ayen kugbe itughẹ rẹ ayen, Me ghwiẹ rhe kerẹ otu rẹ ebaka re se keri-i ayen kugbe iyesi buebu re se keri-i, ayen Me rhe guọghọ otọ na fiotọ.

⁶Ihwo ri Midian da nẹrhẹ akpọ bẹn Izrẹl gangan, ihwo rẹ Izrẹl na de kperi se Ọrovwohwo rere ọ rhe cho ayen uko.

⁷Ọke rẹ ihwo rẹ Izrẹl vwo kperi se Ọrovwohwo na fiki rẹ ihwo ri Midian na,

⁸Etiyin Ọrovwohwo na de ji ọmraro ọvo rhe ihwo rẹ Izrẹl, kọye re ta kẹ ayen nẹ, Enẹ Ọrovwohwo Ọghẹnẹ rẹ Izrẹl na tare! Mẹvwẹ re reyọ ovwan nẹ evun rẹ Ijipt rhe nẹ uwevwi rẹ ọviẹn rhe;

⁹mi de sivwi ovwan ne obọ re ihwo re Ijipt nẹ obọ rẹ ihwo ri shenyẹ ovwan, Me da djẹ ayen nẹ obaro rẹ ovwan; Me da vwẹ otọ rayen kẹ ovwan,

¹⁰Me da ta kẹ ovwan, nẹ, Mẹvwẹ Ọrovwohwo Ọghẹnẹ rẹ ovwan, ovwan gbe vwẹ ọghọ kẹ edjọ rẹ ihwo rẹ Amọr na-a, ri otọ rẹ ovwan dia na. Ẹkẹvuọvo ovwan nyo urhuru mẹ-ẹ.

¹¹Etiyin amakashe rẹ Ọrovwohwo ọvo da rhe o de tidia obotọ rẹ ọhahe vwi Ọfra, ri Joash ọmọ rẹ Abiẹza, vi Gidiọn rẹ ọmọ rọye re wonro eka vwẹ asan re de miẹ udi, rere o ovwo si ayen nu fiki rẹ ihwo ri Midian.

¹²Amakashe rẹ Ọrovwohwo na da vwẹ oma phia kẹ ọ da ta kẹ nẹ, Ọrovwohwo na vẹ owẹ herọ, wọwẹ ọgba na ọshare vẹ udu

¹³Gidiọn da ta kẹ nẹ, Biko ọrovwovwe, ọ da dianẹ Ọrovwohwo vẹ avwanre herọ kidie nẹrhẹ emu nana ejobi vwo she kpahe avwanre? Tivọ iruo rẹ igbunu ejobi rẹ esẹ rẹ avwanre keri kẹ avwanre na epha, tanẹ, ọ dianẹ Ọrovwohwo na re reyọ avwanre nẹ Ijipt rhe? Ẹkẹvuọvo Asakiephana Ọrovwohwo djẹ avwanre kufia, o de phi avwanre phihọ obọ ri Midian.

¹⁴Ọrovwohwo da rhẹriẹ opharo kuo ọ da ta kẹ nẹ, Yanran vwẹ evun rẹ ogangan wẹn na rere wo re sivwi Izrẹl nẹ obọ ri Midian; ọ dianẹ Mẹvwẹ ri ji we?

¹⁵Ọ da ta kẹ nẹ, Biko, Ọrovwohwo, mavọ mi se vwọ sivwi Izrẹl? Nighe, orua mẹ re Me dia ọvwiẹrẹ vwi Manasse na, mẹvwẹ re je ka obuko vwẹ uvwiẹ mẹ.

¹⁶Ọrovwohwo na da ta kẹ nẹ, Ẹkẹvuọvo Mi nene uwe dia, ku wo hwe ihwo ri Midian na kerẹ ohwo ọvo.

¹⁷Ọ da ta kẹ nẹ, Ọ da dianẹ Me sa mrẹ aruesiri wẹn gba vwẹ oka rẹ ota nana ru wo nene uvwe ta na phia kẹ vwẹ.

¹⁸Wo vrẹn nẹ etinẹ-ẹ, Me rẹ wẹ, bẹsiẹ mi vwo rhivwi bru we rhe, rere mi ru we ẹse, rere mi muo phihọ obaro wẹn. Ọ da tanẹ, Me hẹrhẹ bẹsiẹ wo vwo rhivwi rhe.

¹⁹Etiyin Gidiọn da yanran kpo uwevwi rọye, ọ da vwẹ ọmọ rẹ ẹvwe vwọ chere emu, ọ da reyọ iputusẹ rẹ ọka ra nọre vwo ru ikara ro jephuo, ọ da ghwẹ ivwo rẹ eranvwe na phihọ evun rẹ obere, o de ku oghwo rẹ eranvwe na phihọ evun rẹ ẹvwẹrẹ, o de mu ayen phihọ obotọ rẹ ọhahe na vwẹ obaro rọye

²⁰Amakashe rẹ Ọghẹnẹ da ta kẹ nẹ, Reyọ ivwo rẹ eranvwe na vẹ ikara ri jephuo na, rere wo phi ayen phihọ enu rẹ oragha nana, rere wo ku oghwo rẹ eranvwe na phihọ enu rayen. O de ru ọtiọye

²¹Etiyin amakashe rẹ Ọrovwohwo na da riẹn ẹroro rẹ ọkpọ rọ obọ rọye, o de vwo te ivwo rẹ eranvwe na kugbe ikara ri jephuo na, erhanre da la nẹ ẹvun rẹ oragha na rhe ọ da torhẹ ivwo rẹ eranvwe na vẹ ikara ri jephuo na; amakashe rẹ Ọrovwohwo na de hrẹn nẹ obaro rọye.

²²Etiyin Gidiọn ke riẹn nẹ amakashe rẹ Ọrovwohwo o ruẹ; Gidiọn da ta nẹ, Ghwo, E Ọrovwohwo Ọghẹnẹ! Kidie Me vwẹ ẹro mrẹ opharo rẹ amakashe rẹ Ọrovwohwo na nure.

²³Ẹkẹvuọvo Ọrovwohwo na da ta kẹ nẹ, Ufuoma vẹ owẹ herọ, wọ djẹ oshọ-ọ, wo che ghwu-u.

²⁴Etiyin Gidiọn da bọn agbada ọvo kẹ Ọrovwohwo na, o de muo odẹ kẹ nẹ, Ọrovwohwo Ufuoma. Asan na je herọ vwi Ọfra, rẹ ihwo rẹ Abiẹza rhi te ẹdẹ ri nonẹ.

²⁵Ason yena Ọrovwohwo da ta kẹ nẹ, Reyọ erhuẹn rẹ ọshare rẹ ọsẹ wẹn, erhuẹn rivẹ rẹ ikpe ighwrẹn, rere wo gere agbada ri Baal rẹ ọsẹ wẹn vwori na she, rere wo she Ashera rọ akakọ rọye na teye otọ,

²⁶rere wọ so agbada ọvo kẹ Ọrovwohwo rẹ Ọghẹnẹ wẹn na vwẹ enu rẹ asan ọgangan na vwẹ etinẹ, rere wo mu ibieragha na kpahe ohwohwo; vwẹ asan rẹ agbada na epha jovwo na, re wọ reyọ erhuẹn rivẹ na vẹ urhe rẹ Ashera ru wo she ghwiotọ na vwo ze izobo ru torhẹre.

²⁷Eriyin Gidiọn da reyọ idibo rọye rẹ eshare ihwe, ọ de ru kirobo rẹ Ọrovwohwo na ta kẹ; ẹkẹvuọvo fiki rẹ oshọ rẹ orua rọye kugbe ihwo rẹ orho rọye vwẹ ọke rẹ oghẹruvo, kọye ọ da vwẹ ason vwo ruo.

²⁸Ọke rẹ ihwo rẹ orho na vwọ rhọvwọ vwi urhiọke ride na, nighe, a guọghọ agbada ri Baal te otọ, Ashera rọ kẹrẹ eshere teye otọ, a da reyọ erhuẹn rivẹ rẹ ọshare vwo ze izobo phihọ enu rẹ agbada ra so phihọ na.

²⁹Ayen da ta kẹ omoma rayen nẹ, Kono ru emu nana? Ọke rẹ ayen rhe vwọ guọnọ ọto rọye mrẹ nu, ayen da ta, Gidiọn ọmọ ri Joash ri ru emu nana.

³⁰Etiyin eshare rẹ orho na da ta kẹ Joash nẹ, Reyọ ọmọ wẹn phihọ uphephẹ, rere o ghwu, kidie o gere agbada ri Baal she o de she Ashera rọ akakọ rọye teye otọ.

³¹Ẹkẹvuọvo Joash da ta kẹ ayen ejobi re vwọ suọ na nẹ, Ovwan rha họnre ki Baal? Gbenẹ ovwan rhe sivwi kẹ? Ohwo rọ họnre kẹ kọye che ghwu bẹsiẹ rẹ ọke vwo rhie. Ọ da dia Ọghẹnẹ o ruẹ, e gbe jẹn ọye ọvo họnre kẹ oma rọye, fikiridie ohwo ọvo gere agbada rọye she.

³²Fiki rẹ ọtiọye na o de mu odẹ kẹ vwẹ ẹdẹ yena nẹ Jerubbaal, otọ rọye, E jẹn Baal ọvo họnre kẹ oma rọye, vwọ kpahe ọshare na ro gere agbada rọye she.

³³Ọke yena ihwo rẹ Midian ejobi kugbe ihwo rẹ Amalẹk, kugbe re obaro rẹ ọnre de sioma koko, ayen da wan vrẹn Jọdan, re mu erhọn phihọ iyara ri Jẹzreel

³⁴Ẹkẹvuọvo Erhi rẹ Ọrovwohwo na da kua ro oma ri Gidiọn; o de hworo owanre, ihwo rẹ Abiẹza de sioma koko ayen de nene.

³⁵O de ji ikọn re se ihwo ri Manasse ejobi; ayen de nene O de ji ikọn bru Asher, Zẹbulọn kugbe Naftali, ayen de bru ayen rhe.

³⁶Etiyin Gidiọn da ta kẹ Ọghẹnẹ nẹ, Ọ da dianẹ obọ mẹ wọ wan sivwi Izrẹl rhọ, kirobo wọ tare,

³⁷nighe, mi che phi ophiẹn rẹ ẹton rẹ ogegede phihọ utuwevwi re de wonro eka na, ọ da dianẹ irho rho phihọ ophiẹn rẹ ẹton na ọvo, yẹ utuwevwi, na gbe kpọrhọ-ọ, kẹsiẹye Me ke riẹn nẹ wọ ghine wan obọ mẹ sivwi Izrẹl rhọ, kirobo wọ tare na.

³⁸Ọtiọye oghinẹ ru. Ọke rọ vwọ rhọvwọ vwẹ urhiọke ride vwẹ ẹdẹ rivẹ na o de mu ophiẹn vẹ ẹton rẹ ogegede na koko, ro vwo mi ame rẹ irho ro tue kuo na ọ da vọn udjọkpọ rẹ ame.

³⁹Gidiọn da ta kẹ Ọghẹnẹ nẹ, Biko, wọ jẹn ophu wẹn ga kpahe ovwẹ-ẹ, echekọ obọ nana ọvo Me ta ota; rere Me je davwọ ni obọ nana ọvo; gbe jẹn ophiẹn rẹ ẹton rẹ ogegede na yamu, rere ame rẹ irho na kpọrhọ utuwevwi na ọvo.

⁴⁰Ọghẹnẹ de ru otọ na ọtiọye vwẹ ason yena; ẹton rẹ ophiẹn rẹ ogegede na ọvo kọye re yamu, ẹkẹvuọvo ame rẹ irho na da kpọrhọ utuwevwi na ejobi.