Read urhobo Iguẹdjọ 7 Bible Online

Iguẹdjọ 7 - urhobo bible

Iguẹdjọ 7

¹Etiyin Jerubbaal (kọye, Gidiọn) kugbe ihwo ejobi re vẹ ọye gba herọ de vrẹn vwi irhiọke ride ayen de mu erhọn kẹrẹ ogbugbu rẹ ame ri Harod; erhọn ri Midian da hẹ ẹbẹre rẹ obọhwẹre ọnre, vwẹ evun rẹ iyara, vwẹ akakọ rẹ ugbenu ri Morẹ.

²Ọrovwohwo da ta kẹ Gidiọn nẹ ihwo rẹ vẹ owẹ gba herọ bunọ kẹ vwẹ ri mi vwo phi ihwo ri Midian na phihọ obọ rayen, rẹ Izrẹl da rha yoma kẹ vwẹ nẹ, obọ mẹ ọvo mi vwo sivwi oma mẹ

³Asakiephana gbe re ghwoghwo phihọ erhọn rẹ ihwo na nẹ, kohwo kohwo rẹ oshọ vẹ uguegue muẹ, o jo rhivwi kpo uwevwi rọye: Gidiọn da davwe ayen ni; ihwo uriori uje gbe ivẹ de rhivwi kpo, ihwo uriori ihwe de chekọ.

⁴Ọrovwohwo da ta kẹ Gidiọn nẹ, ihwo na ji bunọ; reyọ ayen rhe asan ame na rere Me davwẹ ayen ni kẹ wẹ vwẹ oboyi; ohwo re me ta kẹ wẹ nẹ, Ọnana ri che nene uwe ra, ohwo yena kọye ri che nene uwe yanran; ohwo re me ta kẹ wẹ nẹ, ohwo nana nene uwe-e; o gbi che nene uwe ra-a.

⁵Etiyin ọ da reyọ ihwo na rhe asan ame na; Ọrovwohwo da ta kẹ Gidiọn nẹ, Kohwo kohwo rọ bọvwọ unu rhu ame vwẹ ẹrẹvwe da ame, kerẹ eranko, wọ mi phi ohwo yena phihọ akakọ; ọtiọye wọ je sanọ kohwo kohwo ro rhuẹ djokoro da ame phihọ akakọ

⁶Uche rẹ ayen otu re vwẹ obọ banọ ame phihọ unu vwẹ emudia, da dia eshare ujori erha; ẹkẹvuọvo ihwo ri chekọ ejobi de rhuẹn djokoro da ame.

⁷Ọrovwohwo da ta kẹ Gidiọn nẹ, Eshare ujori erha nana re vwẹ ẹrẹvwe da ame na, Mi che vwo sivwi uwe rhọ, oma rayen a wan phi ihwo ri Midian na phihọ obọ wẹn; gbe jẹn ihwo ri chekọ na ejobi kpo dohwo duwevwi rọye.

⁸Eriyin ọ da reyọ ọmọtoto rẹ ihwo na nẹ abọ rayen, kugbe ewanre rayen; o de ji eshare rẹ Izrẹl ri chekọ kpo dohwo dutughẹ rọye, ẹkẹvuọvo ọ da da eshare ujọri erha na ji; otu ofovwi ri Midian na da hẹ obotọ rọye vwẹ evun rẹ iyara na.

⁹Vwẹ ason yena Ọrovwohwo da ta kẹ Vrẹn, ra họnre otu ofovwi na; kidie Mi phiro phihọ obọ wẹn nure

¹⁰Ẹkẹvuọvo oshọ gbi ji we ọvo ra-a, wọ vẹ Pura odibọ wẹn gbe koko yanran bru otu ofovwi na;

¹¹ọke wọ de nyo eta rẹ ayen cha ta, kẹsiẹye abọ wẹn ke cha gan vwọ họnre otu ofovwi na. Etiyin ọ vẹ Pura rẹ ọdihọ rọye da yanran kpo asan rẹ ihwo rẹ otu ofovwi na epha.

¹²Ihwo ri Midian kugbe ihwo rẹ Amalẹk kugbe ihwo rẹ obaro ọnre ejobi da tẹrẹ usun nene iyara na kerẹ ebaka kidie ayen pha buebu; iyesi rẹ ayen e se kere-e, otu rẹ ayen da dia buebu kerẹ ehavwo rẹ orhoma rẹ urhie.

¹³Ọke ri Gidiọn vwọ rhe nu, nighe, ọshare ọvo ko gbe ikun rẹ evwerhẹ rọ vwerhẹre ke ọrivẹ rọye, tanẹ, Nighe, Me da vwerhẹ evwerhẹ ọvo; kọye ukori ri ikara ri bali de rhi she tehe erhọn ri Midian, ọ da rhe utughẹ na, ọ da tehọ she, ọ da gare uyovwi vi otọ, utughẹ na da riẹn nene otọ.

¹⁴Otu rọye na da kpahe kẹ nẹ, Ọnana dia emu ọfa-a ẹkẹvuọvo ọlọkọ ri Gidiọn ọmọ ri Joash, ọshare rẹ Izrẹl na, obọ rọye Ọghẹnẹ phi Midian kugbe otu ofovwi na ejobi phihọ.

¹⁵Ọke ri Gidiọn vwo nyo ikuegbe rẹ evwerhẹ na kugbe otọ rọye nu, ọ da ra gẹga; o de rhivwi bru otu rẹ ofovwi rẹ Izrẹl na, ọ da tanẹ, Evrẹn; kidie Ọrovwohwo na phi otu rẹ ofovwi ri Midian na phihọ obọ rẹ ovwan nure.

¹⁶Ọ da ghare eshare ujori erha na phihọ ẹko ofovwi erha, o de phi ewanre kugbe ọtoto ifefe phihọ abọ rayen, irhukpẹ da evun rẹ ọtoto na.

¹⁷Ọ da ta kẹ ayen nẹ, Ni vwe, vwẹ ẹro kere uvwe ru; ọke me de nẹ evun rẹ erhọn na rhe, we gbe ru kirobo ri mi ruru.

¹⁸Ọke mi de hworo owanre te mẹvwẹ te ihwo ejobi re vẹ ovwẹ gba herọ na, ovwan gbe hworo ewanre vwi kasan kasan vwẹ erhọn na ejobi, rere ovwan kperi tanẹ, Fiki rẹ Ọrovwohwo na kugbe Gidiọn

¹⁹Eriyin Gidiọn kugbe eshare ujori re vẹ ọye herọ na da rhe orhoma rẹ erhọn na, vwẹ ẹtuọhọ rẹ erhẹrẹ rẹ uherevie, rẹ ayen ghwe vwo mu ẹrhẹrẹ na phihọ nu; ayen de hworo ewanre na ayen da teye etoto re abọ rayen na hwe,

²⁰usun erha na de hworo ewanre ayen de hwe ototo na, ayen da vwẹ obọhwẹre yọnrọn irhukpẹ na ayen da vwẹ obọrhe na yọnre ewanre hworo; ayen de kperi nẹ, ọlọkọ rẹ Ọrovwohwo na kugbe ọ ri Gidiọn!

²¹Ayen dohwo dasan rọye de mudia riariẹ erhọn na phihọ, otu ofovwi na ejobi da djẹ; ayen de kperi phia ayen da djẹ.

²²Ọke rẹ ẹko erha rẹ eshare ujori erha na vwo kworo ewanre na nu, Ọrovwohwo na de hirhe aro rẹ ọlọkọ ri kohwo kohwo ku ọrivẹ rọye vwẹ evun rẹ otu ofovwi na ejobi; otu ofovwi na da djẹ shesheri kpo Betshita vwi Zererah, re te ughwru rẹ Abelmehola vwẹ oma ri Tabbat.

²³E de se eshare rẹ Izrẹl ne obi Naftali kugbe Asher kugbe Manasse na ejobi rhe, ayen da vwọ tua Midian.

²⁴Gidiọn de ji ikọn kpo orho rẹ ugbenu rẹ Ifrem na ejobi, tanẹ, Yanrhe ra rhe họnre ihwo ri Midian na rere a gba hẹrhẹ ayen vwẹ asan ame na rhiri re te urhie ri Bẹtbara kugbe urhie ri Jọdan. Ọtiọye na e de se eshare rẹ Ifrem na ejobi rhe, ayen da ra ghare ofovwi phihọ urhie ri Bẹtbara kugbe urhie ri Jọdan.

²⁵Ayen de mu isun rẹ eshare ivẹ rẹ ihwo ri Midian, Orẹb kugbe Zẹẹb; ayen de hwe Orẹb phihọ enu rẹ oragha rẹ Orẹb, ayen de rhe hwe Zẹẹb phihọ asan re de mu udi vwi Zẹẹb, ọke rẹ ayen vwọ tua Midian na; ayen de mu uyovwi rẹ Orẹb vẹ Zẹẹb rhe Gidiọn vwẹ ẹbẹre rivẹ ri Jọdan.