Read urhobo Iguẹdjọ 9 Bible Online

Iguẹdjọ 9 - urhobo bible

Iguẹdjọ 9

¹Asakiephana Abimẹlẹk ọmọ ri Jerubbaal da yanran kpo Shikẹm bru orua rẹ oni rọye ra ọ da ta kẹ ayen ejobi rẹ orua rẹ oni rọye na nẹ,

²Ta phihọ erhọ rẹ emọ rẹ orho ri Shikẹm na ejobi nẹ, Ọvo ri je ovwan, rere emọ ujorha gbe ihwe ri Jerubbaal rẹ eshare sun ovwan, gbenẹ ọvo ri sun ovwan? Karohọ nẹ mẹvwẹ ubeku kugbe uvwo rẹ ovwan.

³Imoni rẹ oni rọye da ra nẹ iyẹnrẹn rẹ eta rọye nana ejobi kẹ eshare ri Shikẹm; ayen da vwẹ ẹnwẹn kpahe Abimẹlẹk rere ayen vwo nene, kidie ayen tare nẹ, Oniọvo rẹ avwanre o ruẹ.

⁴Ayen da reyọ ibi rẹ idọnọ efuanfon ujorha gbe ihwe nẹ evun rẹ uwevwi ri Baalberit vwọ kẹ Abimẹlẹk, ọ da vwẹ igho na vwo durhie ihwo re epha Zighizighi ri gbosoghoro, ayen da yan nene.

⁵O de kpo uwevwi rẹ ọsẹ rọye vwẹ obi Ọfra, o de re hwe emesẹ rọye emọ ri Jerubbaal, eshare ujorha gbe ihwe, phihọ enu rẹ oragha ọvo; ẹkẹvuọvo Jotam rẹ ubrevwiẹ ri Jerubbaal kọye ọvo ri chekọ kidie o si oma nu jovwo

⁶Emọ rẹ orho ri Shikẹm ejobi de sioma koko, kugbe ihwo ri Bẹtmillo, ayen da ra vwẹ Abimẹlẹk mu ovie vwẹ asan ọhahe rọ kẹrẹ osusu vwẹ obi Shikẹm.

⁷Ọke ra vwọ ta kẹ Jotam nu, ọ da yanran re mudia enu rẹ Ugbenu ri Gerizim, o de kperi ta kẹ ayen nẹ, ovwan kerhọn mẹ, ovwan eshare ri Shikẹm, rere Ọghẹnẹ je kerhọ rẹ ovwan

⁸Irhe na da ra vwẹ ovie mu kẹ oma rayen vwẹ ọke ọvo; ayen da ta kẹ urhe rẹ oliv nẹ, Re ovie vwẹ enu rẹ avwanre

⁹Ẹkẹvuọvo urhe rẹ oliv da ta kẹ ayen nẹ, Mi se siobọ nẹ evwiri mẹ, re me vwọ vwẹ ọghọ kẹ eghẹnẹ vẹ ihwo rẹ akpọ re mi re sun irhe?

¹⁰Irhe na da ta kẹ urhe ri fig na nẹ, Mọ rhe re ovie vwẹ enu rẹ avwanre,

¹¹Ẹkẹvuọvo urhe ri fig na da ta kẹ ayen nẹ, Me sa yan jẹn avwerhe mẹ vẹ emamọ mẹ ri yoyovwi vwo ra, rere mi re sun irhe?

¹²Irhe na da ta kẹ vain na nẹ, Mọ rhe rẹ ovie vwẹ enu rẹ avwanre.

¹³Ẹkẹvuọvo vain na da ta kẹ ayen nẹ, Mi se siobọ nẹ wain mẹ re me vwọ vwẹ oma evwerhọ kẹ Ọghẹnẹ vẹ ihwo rẹ akpọ, ra re ovie kẹ irhe?

¹⁴Etiyin irhe na da ta kẹ ekpakpakpa na nẹ, Mọ, rhe re ovie vwẹ enu rẹ avwanre.

¹⁵Ekpakpakpa na da ta kẹ irhe na nẹ Ọ da ghene dia uyota nẹ ovwan vwe evwri te vwe ne Me dia ovie re ovwan, Wa gba rhe dia otọ rẹ ọphie mẹ; ẹkẹvuọvo ọ gbe dia eriyi-in gbe jẹ erhanre nẹ evun rẹ ekpakpakpa na rhe, rere ọ torhẹ lgedu ejobi ri Lẹbanọn.

¹⁶Asakiephana, ọ da dianẹ emu rẹ uyota vẹ ọghọ kọye ovwan ruru rẹ ovwan vwọ vwẹ Abimẹlẹk re ovie, ọ da dianẹ omamọ rẹ uruemu ovwan ru kẹ Jerubbaal vẹ uwevwi rọye, ro fo osa rẹ iruo buebu ro ru kẹ ovwan nure na —

¹⁷kidie ọsẹ mẹ họnre kẹ ovwan, ọ vwe akpọ rọye re osọnọ, vwo sivwi ovwan nẹ obọ ri Midian;

¹⁸ovwan de rhi mu kpahe uwevwi rẹ ọsẹ mẹ vwẹ ẹdẹ ri nonẹ na, ovwan de hwe emọ rọye rẹ eshare ujorha gbe ihwe phihọ enu rẹ oragha ọvo, ovwan da vwẹ Abimẹlẹk rẹ ọmọ rẹ ọsen, vwo mu ovie kẹ ihwo ri Shikẹm, fikiridie omoni rẹ ovwan o ruẹ —

¹⁹ọ da dianẹ emu rẹ uyota vẹ ọghọ ovwan ruru kpahe Jerubbaal kugbe uwevwi rọye vwẹ ẹdẹ ri nonẹ na, ovwan vẹ Abimẹlẹk gba ghọghọ, e gbe jẹ ọ vẹ ovwan ghọghọ dede,

²⁰ẹkẹvuọvo ọ gbe dia eriyi-in, e gbe jẹn erhanre nẹ oma rẹ Abimẹlẹk rhe torhẹ ihwo rẹ Shikẹm, kugbe Bẹtmillo; gbe jẹn erhanre la phia vwẹ oma rẹ ihwo ri Shikẹm, kugbe Bẹtmillo, rere ọ torhẹ Abimẹlẹk.

²¹Jotam da djẹ onẹ ọ da djẹ yanran, o de kpo obi Bẹẹr ọ da dia oboyi, fiki rẹ oshọ rẹ Abimẹlẹk rẹ omoni rọye.

²²Abimẹlẹk de sun Izrẹl ikpe erha

²³Ọghẹnẹ de ji erhi rẹ idẹbono phihọ uherevie rẹ Abimẹlẹk;

²⁴rere umwemwu ro ru kpahe emeshare ujorha gbe ihwe ri Jerubbaal kugbe rere a reihri rẹ ọbara rọye vwẹ uyovwi rẹ Abimẹlẹk rẹ ọmọsẹ rayen, ro hwe ayen, kugbe uyovwi rẹ ihwo ri Shikẹm, ri phi ogangan phihọ abọ rọye ro vwo hwe emesẹ rọye.

²⁵Eshare ri Shikẹm de je igbunegbu ra vwọ hẹrhẹ vwẹ enu rẹ igbenu na, ayen de gborho ihwo re wan idjerhe yena; a da ta kẹ Abimẹlẹk.

²⁶Gaal ọmọ rẹ Ebẹd vẹ ekru rọye da kua kpo obi Shikẹm; eshare ri Shikẹm da vwẹ ẹnwẹ vwọ kpahọ.

²⁷Ayen da yanran kpo aghwa, ayen da ra kọrọ grep vwẹ ogba ri vain rayen koko, ayen de chiyi ayen, ayen da re orẹ, ayen da yanran kpo uwevwi rẹ ẹdjọ rayen, ayen da re, ayen da da idi, ayen de duvwu iyori kẹ Abimẹlẹk.

²⁸Gaal ọmọ rẹ Ebẹd da tanẹ. Ono Abimẹlẹk, re avwanre ihwo ri Shikẹm ghene ga? Ọ dia ọmọ ri Jerubbaal kugbe Zebul rẹ onotu rọye re ga eshare ri Hamọr ọsẹ ri Shikẹm? Die sọrọ rẹ avwanre vwọ ga?

²⁹Mane ke se phi ihwo nana phihọ obọ mẹ! yi mi si Abimẹlẹk nẹ ẹdia rọye. Mane me ta kẹ Abimẹlẹk nẹ, Ru otu ofovwi wẹn bu phihọ, rere wọ vwẹ oma phia.

³⁰Ọke ri Zebul ro sun orho na vwo nyo eta ri Gaal ọmọ rẹ Ebẹd na, ophu rọye da rhe gan.

³¹O de ji ikọn bru Ahimẹlẹk vwo obi Aruma, tanẹ, Nighe, Gaal ọmọ rẹ Ebẹd vẹ ekru rọye yanrhe Shikẹm, ayen ke kpare ẹnwen rẹ orho na vwo so owẹ.

³²Asakie-phana, gba yanran vwẹ ason, wẹ kugbe ihwo re vẹ owẹ gba herọ, rere ovwan ra hwa phihọ vwẹ aghwa na hẹrhẹ.

³³Rere vwẹ urhiọke rẹ ọnre da ghwa vacha, wọ vẹ ihwo wẹn gba fobọ vrẹn họrhọ ra ro orere na, wọ da mrẹ nẹ ọ vẹ ihwo rọye cha họnre ovwan, we gbe ru ayen emu kirobo rẹ ọke na guọnọre.

³⁴Abimẹlẹk kugbe ihwo re vẹ ọye gba herọ de vrẹn yanran vwẹ ason, ayen da ghare unu ofovwi ẹne yariẹ Shikẹm phihọ.

³⁵Gaal ọmọ rẹ Ebẹd da yanran re mudia phihọ ughere rẹ anurhoro rẹ orere na, Etiyin Abimẹlẹk vẹ ihwo re vẹ ọye gba herọ na de vrẹn nẹ asan rẹ ayen ghare oma phihọ vwẹ aghwa na

³⁶Ọke ri Gaal vwọ mrẹ eshare na, ọ da ra kẹ Zebul, Nighe, ihwo ra yan nẹ enu rẹ ugbenu na cha! Zebul da ta kẹ nẹ, Uhoho rẹ igbenu na wo vwo roro ihwo na.

³⁷Gaal da rhoma tanẹ, Nighe, eshare yan nene uherevie rẹ otọ na cha, otu rẹ ihwo na ẹvo yan nene idjerhe rẹ Ẹdjọ rọ asan ọhahe na cha

³⁸Etiyin Zebul da ta kẹ nẹ, Tivọ ugbunu wẹn epha, wẹ rọ tanẹ, Ono Abimẹlẹk, rẹ avwanre cha ga? Enana die eshare re wọ jẹfia na? Gba vwo oma phia rere wo re nene ayen họnre

³⁹Gaal da yanran ka obaro kẹ eshare ri Shikẹm, re nene Abimẹlẹk họnre

⁴⁰Abimẹlẹk da vwọ tua, ọ da djẹ re te anurhọrọ rẹ orho na; ihwo na buebu de she woma

⁴¹Abimẹlẹk da ra dia o bi Aruma; Etiyin Zebul da djẹ Gaal vẹ ekru rọye nẹ ayen gbe dia Shikẹmu-u.

⁴²Vwẹ ẹdẹ rivẹ eshare na da yanran kpo obo aghwa. A da ta kẹ Abimẹlẹk.

⁴³Ọ da reyọ ihwo rọye ọ da ghare ayen phihọ unu ofovwi erha, ra vwọ hẹrhẹ vwẹ evun rẹ aghwa na, rọ vwọ kpare opharo ọ da mrẹ eshare na re yan ne evun rẹ orere na cha, ọ da họnre ayen ọ de hwe ayen.

⁴⁴Abimẹlẹk vẹ otu re vẹ ọye gba herọ na da họrhọ ro obaro ayen de mudia phihọ anurhoro rẹ orere na, vwẹ ọke yena unu ofovwi ivẹ na da họrhọ ro ihwo re evun rẹ aghwa na re hwe ayen.

⁴⁵Abimẹlẹk da họnre orere na vwẹ ọsoso rẹ ẹdẹ yena; o de phi orere na kua, o de hwe ihwo rẹ orere na, o da guọghọ orere na fiotọ o de tue ughwe-raka phihọ

⁴⁶Ọke rẹ ihwo na ejobi re hẹ ọguan rẹ enu ri Shekẹm vwo nyo ọyena nu, ayen da ra ro ọgba ọgangan rẹ Ẹlbẹrit na.

⁴⁷A da ta kẹ Abimẹlẹk nẹ ihwo na ejobi koko phihọ ọguan re enu ri Shikẹm na.

⁴⁸Abimẹlẹk da yanran kpo ugbenu ri Zalmọn, te ọye vẹ ihwo re vẹ ọye gba herọ na, Abimẹlẹk da reyọ ushurhe phihọ obọ rọye, o de she ekru rẹ oghọ rẹ urhe na, o de muo phihọ igabọ rọye ọ da ta kẹ ihwo re vẹ ọye gba herọ nẹ, Emu rẹ ovwan mrẹre ri mi ruẹ, ovwan broma ruo, kirobo mi ruro

⁴⁹Ọtiọye na dohwo de ekru rẹ irhe rọye de she, ayen de mu irhe na nene Abimẹlẹk ayen de mu ayen phihọ uwevwi na, ayen de koko erhanre phihọ irhe rẹ uwevwi na, ọtiọye na ihwo ejobi kẹre uriori rẹ ọguan re enu ri Shikẹm de ghwu re, te eshare vẹ eya.

⁵⁰Etiyin Abimẹlẹk da yanran kpo obi Tebẹz, ọ da reyọ.

⁵¹Ẹkẹvuọvo ọguan rẹ enu ogangan ọvo da hẹ evun rẹ orere na, ihwo rẹ orere ejobi da ra djẹ ruọ, te eya vẹ eshare ejobi, ayen de huhu ẹchẹ gboma; ayen da yanran kpo obo okpo rẹ ọguan rẹ enu na.

⁵²Abimẹlẹk da rhe asan ọguan rẹ enu na, rhe họnre, o de sikẹrẹ anurhoro rẹ ọguan rẹ enu na rere ọ vwẹ erhanre torhẹ.

⁵³Eya ẹvo de mu olalọ vwo phi ekpehre uyovwi rẹ Abimẹlẹk guọghọ.

⁵⁴Etiyin o de bru okpakpa se emeghene rẹ ọshare rọ ghwa ewun rẹ ofovwi rọye, ọ da ta kẹ nẹ. Yoro ọlọkọ wẹn rere wo hwe vwe, rere ihwo vwo jẹ ta kpahe ovwẹ nẹ, Aye ri hwe re. Emeghene na da vwẹ egba nyẹ, o de ghwu

⁵⁵Ọke rẹ ihwo rẹ Izrẹl vwọ mrẹ nẹ Abimẹlẹk ghwu nure, ayen dọhwo de uwevwi rọye da ra.

⁵⁶Enẹ kọye Ọghẹnẹ vwọ hwosa rẹ umwemwu rẹ Abimẹlẹk ruru vwọ kpahe ọsẹ rọye kugbe emesẹ rọye ujorha gbe ihwe ro hwe kufia;

⁵⁷je ọtiọye na Ọghẹnẹ vwọ hwosa re umwemwu rẹ ihwo ri Shikẹm ejobi ruru vwọ kẹ ayen kugbe iyori ri Jotam ọmọ ri Jerubbaal duvwuru da sẹ vwẹ uyovwi rayen.