Read urhobo 2 Jon 1 Bible Online

2 Jon 1 - urhobo bible

2 Jon 1

¹Ọkpako na ri si ọbe na rhe ọmọtẹ ra sanọreyọ na vẹ emọ rọye, re me guọnọre vwẹ uyota, ọ dia omẹvwẹ ọvo-o ẹkẹvuọvo ji te ihwo ejobi re riẹn uyota na,

²fiki rẹ uyota rọ herọ vwẹ evun rẹ avwanre ko ji nene avwanre dia bẹdẹ:

³Ẹserọphẹ, arodọvwẹ, kugbe ufuoma ki nene avwanre dia, vwo nẹ obọ rẹ Ọghẹnẹ Ọsẹ na kugbe ọ ro nẹ obọ ri Jesu Kristi rhe Ọmọ rẹ Ọsẹ na, vwẹ evun rẹ uyota kugbe ẹguọnọ.

⁴Me ghọghọre gangan re me vwọ mrẹ emọ wẹn ẹvo re yan vwẹ evun rẹ uyota na, kirobo rẹ Ọsẹ na ji urhi kẹ avwanre.

⁵Asakiephana me rẹ we, ọmọtẹ, ọ dianẹ kẹ urhi ọkpokpọ mi siẹ rhe we-e, ẹkẹvuọvo ọvuọvo na rẹ avwanre vwori notọrhe na, nẹ avwanre guọnọ ohwohwo na.

⁶Ọnana hẹ ẹguọnọ na, nẹ avwanre nene urhi rọye; Ọnana kọye hẹ urhi na, kirobo ru wo nyori notọrhe na, nẹ wo nene ẹguọnọ.

⁷Kidie otu re phiẹn ihwo buebu ro evun rẹ akpọ na re, otu re sian nẹ Jesu Kristi rhere vwẹ ugboma-a; ohwo ọtiọye na hẹ ọphiẹn ohwo kugbe Kristi rẹ ofian na.

⁸We ni oma rẹ ovwan so, rere obo rẹ ovwan wian phihọ na vwo je ghwro, ẹkẹvuọvo rere ovwan vwo se vwo osa na gba.

⁹Kohwo kohwo rọ yan hẹ obaro yọ rha dia vwẹ evun rẹ uyono ri Kristi na-a yo ji vwo Ọghẹnẹ-ẹ; ohwo rọ diarọ vwẹ evun rẹ uyono ri Kristi na yo vwo ayen ivẹ na Ọsẹ na kugbe Ọmọ na.

¹⁰Ọ da dianẹ ohwo ọvo bru uwe rhe rọ ghwa uyono nana rhe-e, wọ reyọ phihọ uwevwi-i eyẹ wo yere-e;

¹¹kidie ohwo ro yeire yọ vẹ ọye obọ vwẹ iruo rẹ uvumwemwu rọye.

¹²Dede nẹ mi vwo emu buebu ri mi che si rhe we, ye me sa vwẹ ọbe vẹ amu vwo sio-o, ẹkẹvuọvo mi phiẹrohọ rẹ me cha mrẹ wẹ ke me vẹ owẹ hirhe aro ku ohwohwo da ta ota, rere aghọghọ rẹ avwanre vwọ gba.

¹³Emọ rẹ oniọvo wẹn rẹ ọmọtẹ nẹ eyere uwe.