Read urhobo Jud 1 Bible Online

Jud 1 - urhobo bible

Jud 1

¹Jud, odibo ri Jesu Kristi, kugbe oniọvo ri Jems ri si ọbe nana rhe ayen otu re seri, re ghare vwẹ obọ Ọghẹnẹ Ọsẹ na ra sẹro hẹrhẹ Jesu Kristi:

²E gbe jẹn arodọvwẹ, ufuoma, kugbe ẹguọnọ buphihọ kẹ ovwan.

³Imoni re ghare, rẹ urhuru vwo si vwe vwo siẹ ọbe nana rhe ovwan kpahe esivwo rẹ avwanre ọvuọvo na, emu ọvo da gba phihọ ovwẹ udu ni mi si rhe ovwan vwo bru ovwan uche, rere ovwan vwọ họnre chochọ rẹ esegbuyota ra vwọ kẹ ihwo efuanfon na.

⁴Kidie otu rẹ ihwo ẹvo bẹbẹ rhẹrẹ ro usun rẹ avwanre na, enana otu rẹ ihwo re bru orhiẹn rẹ ughwu hwe rhabae rhe, ihwo ebrabra re rhẹriẹ ẹserọphẹ rẹ Ọghẹnẹ phihọ umwemwu, re sen Onini na kugbe Ọrovwohwo, Jesu Kristi.

⁵Asakiephana Me guọnọ karohọ ovwan, dede na a nabọ yono ovwan vẹrhe, nẹ ohwo ro sivwi ihwo nẹ otọ rẹ Ijipt rhe, ukuko rọye ọ da rhoma ghwọrọ ayen otu ri je segbuyota.

⁶Emekashe re rha sa yọnre ẹdia raye-en ẹkẹvuọvo re yan jẹ ẹdia rayen vwo ọ da vwẹ ọjọnrọn ri bẹdẹ na kanre ayen mu ebri ri bẹdẹ na bẹsiẹ rẹ ẹdẹ rode rẹ ẹdjọeguo na vwo te;

⁷kirobo ri Sodọm vi Gomora kugbe irere re riariẹ ayen phihọ na, re vwẹ oma rayen kẹ ọfanrhiẹ egbe rẹ urhuru sivwe rẹ ugboma si ghwru na, ra da vwẹ ayen ru oka vwọ reoja rẹ ehwe rẹ erhanre ri bẹdẹ na.

⁸Uruemu nana ihwo nana vwẹ evun re vwerhẹ evwerhẹ rayen de gbe ugboma na ẹgua, ayen da sen ogangan rẹ isuesun na, ayen da ghwọ ku ihwo rẹ urinrin na.

⁹Ẹkẹvuọvo ọke ri Maikẹl onotu rẹ emakashe na, vẹ idẹbono vwọ phra aphro, rẹ ayen vwo sivwi orivwi ri Mosis, o ghwe se brorhiẹ hwe rọ da harhọ-ọ, ẹkẹvuọvo ọ da tanẹ, Ọrovwohwo duvwu uwe iyori.

¹⁰Ye ihwo nana di muẹ ekan harha kpahe emu rẹ ayen riẹn otọ rọye-e, kerẹ eranvwe re riẹn emuọvo-o, kẹ eriyin ayen di muẹ ruẹ, ọ da nẹrhẹ a ghwọrọ ayen.

¹¹Ekan kẹ ayen! Kidie idjerhe ri Ken ayen nene na, ubiupho rẹ erere re nẹrhẹ ayen nene oruchọ ri Bẹlam, ọ da nẹrhẹ ayen ghwu phihọ omẹriọ ri Kora.

¹²Enana da rhe dia ekan vwẹ orẹ rẹ ẹguọnọ rẹ ovwan, vwẹ ọke rẹ ayen da vwẹ aroeyivwo gbe iknn rẹ ozighi kuẹgbe, rẹ ayen de nẹ oma rayen ọvo, enu ro biri yẹ osio rhọ re-e, rẹ odju muẹ yanran, irhe ri jẹ ẹmọ vwẹ ọke ororo, ri ghwuru asiava, re ghwie nẹ otọ;

¹³omimi rẹ abadi rọ họnra, ro gbe iphughe puọpuọ kẹ omaẹvuọ rayen; isio ro beghe ra vwọ hẹrhẹ ebri hwi bẹdẹ.

¹⁴Ihwo nana kọye Inọk ohwo righwrẹ nẹ uvwiẹ rẹ Adam rhe mraro kpahe, tanẹ Nighe, Ọrovwohwo cha rhe vẹ usun rẹ ihwo efuanfon rọye uri vware uri,

¹⁵kọ cha vwẹ ihwo na ejobi guẹdjọ, ko bruhwe ihwo umwemwu na ejobi fiki rẹ uruemu umwemwu rayen rẹ ayen vwẹ idjerhe umwemwu vwo ru, kugbe eta ebrabra rẹ ihwo umwemwu na ta kpahọ.

¹⁶Enana hẹ ihwo ri guẹ huhuhu, rẹ evun rẹ umwemwu jẹvọn, ri nene urhuru sivwe rẹ ugboma, ri rhie enu phihọ yan eyan, ri brugun hẹ ihwo oma fiki rẹ erere.

¹⁷Ẹkẹvuọvo ovwan karohọ, imoni re ghare, aroẹmrẹ rẹ iyinkọn rẹ Ọrovwavwanre Jesu Kristi;

¹⁸ayen ta kẹ ovwan nẹ, Ukuko rẹ akpọ na vwobọ otu rẹ jehwẹ buebu cha, ri che nene urhuru sivwe rẹ ugboma rayen.

¹⁹Enana hẹ ihwo re vwẹ ohẹriẹ cha, ihwo rẹ akpọ ghevweghe, ri vwọ Erhi na-a.

²⁰Ẹkẹvuọvo ovwan, imoni re ghare, wa nabọ tọn oma rẹ ovwan phihọ evun rẹ esegbuyota ọfuanfon rẹ ovwan; nẹ ẹrhovwo vwẹ evun rẹ Erhi Ọfuanfon na;

²¹sẹro rẹ oma rẹ ovwan vwẹ evun rẹ ẹguọnọ rẹ Ọghẹnẹ; hẹrhẹ arodọvwẹ rẹ Ọrovwavwanre Jesu Kristi kugbe arhọ rọye ri bẹdẹ na.

²²Ta, rere o mu ihwo ri vwo iroro ivivẹ ẹro;

²³sivwi ẹvo, re we fru ayen nẹ evun rẹ erhanre; djẹ oshọ ni arodọvwẹ kẹ ẹvo, ovwan kẹnẹ oma kẹ evun ro kere ipe.

²⁴Asakiephana vwọ kẹ ohwo ro se si ovwan nẹ eshe rọ da vwẹ ovwan phia vwẹ obaro rọye o vwo upe-e vẹ aghọghọ,

²⁵vwọ kẹ Ọghẹnẹ ọvuọvo na, Osivwi rẹ avwanre vwẹ oma ri Jesu Kristi Ọrovwavwanre ọye a vwẹ urinrin, ọrho, isuesun, kugbe ogangan kẹ, vwẹ ọke ejobi kugbe asakiephana bẹdẹ bẹdẹ. Isẹ.