Read urhobo Ẹvwọphia 17 Bible Online

Ẹvwọphia 17 - urhobo bible

Ẹvwọphia 17

¹Amakashe ọvo vwẹ usun rẹ emakashe ighwrẹ na ri mu idjokpo ighwrẹ na da rhe ọ da ta kẹ vwẹ, Yanrhe, re me vwẹ orhiẹn re bruhwe igberadja ro tidia enu rẹ ame buebu na nẹ wẹ,

²rẹ ivie rẹ akpọ na ejobi vẹ ọye gbe mroma, ọ da vwẹ udi rẹ igberadja rọye mu ihwo re vẹ ọye gbe ruemu ejobi.

³O de rhi mu uvwe yanran vwẹ evun rẹ Erhi na vwo kpo evun rẹ aghwa, me da mrẹ aye ọvo ro tidia vwẹ enu rẹ eranvwe ọvwavware ọvo rọ vọnre vẹ edẹ rẹ ophọphọvwe, o de vwo iyovwi ighwrẹ kugbe ighoro ihwe.

⁴Aye na da vwẹ efenudu ọvwavware rhuo, ọ da vwẹ iro vẹ omamọ rẹ evwarha vwọ rhuẹrẹ oma, ọ da vwẹ uko rẹ oro rọ vọnre vẹ omaetuo kugbe inuhu rẹ igberadja vwọ yọnre obọ;

⁵e de si odẹ rẹ igbunu tamuo arhare; Babilọn rode na, oni rẹ igberadja kugbe omaetuo rẹ akpọ na.

⁶Me da mrẹ aye na, rẹ ọbara rẹ ihwo efuanfon muẹ kerẹ udi kugbe ọbara rẹ ihwo re hweri fiki ri Jesu. Ọke re me vwọ mrẹ o de gbe vwe unu gangan.

⁷Ẹkẹvuọvo amakashe na da ta kẹ vwẹ, Die sorọ ro vwo gbe we unu? Mi che gbe ikun rẹ igbunu rẹ aye na kẹ wẹ, kugbe eranvwe vẹ iyovwi ighwrẹ na kugbe ighoro ihwe na ro mu yan na.

⁸Eranvwe ru wọ mrẹre jovwo na, rọ gbe herọ na-a, o che yeri nẹ obo orho rẹ igbẹphẹre na rhe kpo oja ri bẹdẹ na; ihwo re dia akpọ na re ji si edẹ rẹ ayen phihọ ọbe rẹ arhọ na nẹ ẹtuọhọ rẹ akpọ na rhe-e, ko gbe ayen unu rẹ ayen da mrẹ eranvwe na, fikiridie ọ herọ jovwo yọ gbe herọ-ọ yọ je cha rhe.

⁹Kẹ ọna e vwo vughe ohwo ro vwo aghwanre; iyovwi ighwrẹ na hẹ igbenu ighwrẹ rẹ aye na tidia phihọ;

¹⁰ayen je hẹ ivie ighwrẹ, iyori rẹ ayen she nure, ọvo je herọ, ọ ro chekọ je rhe-e, yẹ ọke rọ da rhe kọ dia emerha.

¹¹Vwọ kẹ eranvwe rọ herọ jovwo yọ gbe herọ na-a, ọye hẹ ọ rẹ ẹrenre ẹkẹvuọvo ọ righwrẹ na ọ ghwẹ oma phihọ, ko yanran kpo oja ri bẹdẹ na.

¹²Ighoro ihwe ru wọ mrẹre na eye hẹ ivie ihwe, ra je vwẹ ogangan rẹ ovie kẹ-ẹ, ẹkẹvuọvo a vwẹ ogangan rẹ ivie kẹ ayen unọke ọvo, ji kugbe eranvwe na.

¹³Ayen ejobi na kẹ evun ọvo ayen da vwẹ ogangan kugbe ọrho rayen kẹ eranvwe na;

¹⁴ayen ke cha vwẹ ofovwi so Omogodẹ na, Omogodẹ na ko phi ayen kua, kidie ọye hẹ Ọrovwohwo ro vwo ihwo ejobi kugbe Ovie ro vwo ivie ejobi, ayen otu re vẹ ọye gba herọ ayen o seri rọ jẹreyọ ri segbuyota.

¹⁵Ọ da ta kẹ vwẹ, Ame na re wọ mrẹre na, vwẹ asan rẹ igberadja na tidia na, ayen hẹ ihwo kugbe urogho kugbe ẹgborho kugbe ephẹrẹ.

¹⁶Ighoro ihwe ru wọ mrẹre na, ayen vẹ aye na ki che tuoma rẹ igberadja na; ayen ke kua fiotọ a me ban phihọ, ayen me re uvwo rọye ayen me vwẹ erhanre torhẹ

¹⁷kidie Ọghẹnẹ phiro phihọ udu rayen rere ayen vwo ru iroro rọye kọye ayen vwọ dia iroro ọvo rẹ ayen vwọ vwẹ ogangan rẹ ovie rayen vwọ kẹ eranvwe na, bẹsiẹ rẹ ota rẹ Ọghẹnẹ vwọ gba.

¹⁸Aye na ru wọ mrẹre na ọye hẹ orere rode na ro vwo isuesun vwẹ enu rẹ ivie rẹ akpọ na.