Read urhobo Ẹvwọphia 20 Bible Online

Ẹvwọphia 20 - urhobo bible

Ẹvwọphia 20

¹Etiyin me da mrẹ amakashe ọvo ro wotọ nẹ odjuvwu cha, o yọnre usiaphrẹ rẹ orho rẹ igbephẹre vwẹ obọ rọye kugbe ọjọrọ rode.

²O de shabọ họ okpodje na, ọrọdekọ rẹ awanre na, kọye hẹ Idẹbono kugbe Ukọn na, ọ da gba ikpe uriori,

³ọ da kparọ phihọ orho rẹ igbẹphẹre na, a da kare ẹchẹ gbe a da rharọ mu kokoroko, rere o vwo jẹ ẹgborho rẹ akpọ na ẹphiẹn ọfa, bẹsiẹ ikpe uriori na vwọ gba. Ọyena da wan nu ka rhan emerha.

⁴Etiyin me da mrẹ ekete buebu, ayen de tidia ekete na, kẹ etiyin ayen otu ra vwẹ ẹdjọeguo kẹ na de guẹ. Me da mrẹ irhi rẹ ihwo buebu re bru ohọre fiki rẹ iseri rayen kpahe Jesu kugbe ota rẹ Ọghẹnẹ, kugbe ihwo ri jẹ eranvwe na kugbe oma rọye ẹga, re ka oka rọye phihọ arhare-e eyẹ obọ raye-en. Ayen da va rhe, ayen vi Kristi da re ikpe uriori.

⁵Otu ri ghwuru ri chekọ gbe va rhe-e bẹsiẹ rẹ ikpe uriori na vwọ gba. Ọnana hẹ evrẹnushi rẹsosuọ.

⁶Ebruba kugbe ẹfuọn kẹ ohwo ro vwo obọ vwẹ evrẹnushi rẹsosuọ na! Ughwu rivẹ na rhe vwo ogangan vwẹ enu rẹ ohwo ọtiọye-e, ẹkẹvuọvo ayen ke cha dia irherẹn rẹ Ọghẹnẹ kugbe ọ ri Kristi, ayen vẹ ọye ke re ikpe uriori.

⁷Ọke rẹ ikpe uriori na da gba nu, ka rhan ukọn na nẹ uwodi rọye

⁸kọ cha rhe rhe phiẹn ẹgborho na re hẹ igogo ẹne rẹ akpọ na, kọye hẹ, Gọg kugbe Magọg, ka ghwẹ ayen koko kpo ofovwi; unu rayen kọ họhọ ehavwo rẹ abadi na.

⁹Ayen da yan ro akpọ ọhẹhẹre na ayen de ki erhọn rẹ ihwo efuanfon na yariẹ kugbe orere esiri na; ẹkẹvuọvo erhanre de nẹ odjuvwu rhe torhẹ ayen,

¹⁰idẹbono rọ phiẹn ayen na a da kparọ phi phihọ ẹtẹrhe rẹ erhanre kugbe ibiosio rẹ erhanre asan rẹ eranvwe na kugbe ọmraro rẹ ofian na epha, kẹ etiyin ayen da mrẹ odjadja te ason te uvo bẹdẹ bẹdẹ.

¹¹Etiyin me da mrẹ ekete ọfuanfon rode ọvo kugbe ohwo ro tidia enu rọye; opharo rẹ ohwo ro tidia na da nẹrhẹ akpọ vẹ odjuvwu va djẹ, a gbe mrẹ asan vwọ kẹ aye-en.

¹²Me da mrẹ irivwi, te emọ te ekpako, ri mudia vwẹ obaro rẹ ekete na, e de rhie ẹbe phihọ. E de ji rhie ọbe ọfa, kọye hẹ ọbe rẹ arhọ na. Obo re si phihọ ẹbe na kọye e ni guẹdjọ rẹ irivwi na, kirobo rẹ ayen ruru.

¹³Abadi da vwẹ irivwi ri ghwu phihọ kpahe otọ, Ughwu kugbe Erivwi da vwẹ irivwi re hẹ evun rẹ ayen kpahe otọ, e de guẹdjọ rẹ ayen kirobo rẹ ayen ruru.

¹⁴Etiyin a da kpare Ughwu kugbe Erivwi phihọ ẹtẹrhe rẹ erhanre na. Ọnana hẹ ughwu rivẹ, ẹtẹrhe rẹ erhanre na;

¹⁵a rha mrẹ odẹ rẹ ohwo re siri phihọ ọbe rẹ arhọ na-a, ka kparọ phihọ ẹtẹrhe rẹ erhanre na.