Read urhobo Ẹvwọphia 21 Bible Online

Ẹvwọphia 21 - urhobo bible

Ẹvwọphia 21

¹Etiyin me da rhe mrẹ odjuvwu ọkpokpọ kugbe akpọ ọkpokpọ; kidie odjuvwu rẹsosuọ kugbe akpọ rẹsosuọ wanvrẹn nure, abadi dede gbe herọ-ọ.

²Me da mrẹ orere ọfuanfon na, Jerusalẹm ọkpokpọ na, ro wotọ nẹ obọ rẹ Ọghẹnẹ cha vwẹ obo odjuvwu, rọ rhuẹrẹ oma kerẹ ọpha re che vwo kpo orọvwe;

³mi de nyo urhuru rode ọvo ro nẹ obo ekete na rhe tanẹ, Nighe, Ọghẹnẹ rhe bọn uwevwi rọye kugbe ihwo rẹ akpọ. Kọ nene ayen dia, ayen ke dia ihwo rọye, okpuyovwi rẹ Ọghẹnẹ ko bru ayen rhe dia;

⁴ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a, kidie emu rẹ awanre na wanvrẹn nure.

⁵Ọ ro tidia vwẹ enu rẹ ekete na da ta, Nighe, mi ru emu na ejobi ọkpokpọ. Ọ da je ta rhe, Si ọnana, kidie eta nana omamọ ota.

⁶Ọ da ta kẹ vwẹ, Ọ rere! Mẹvwẹ Ẹsosuọ kugbe Oba, ẹtuọhọ kugbe ure. Ke me vwẹ ame rẹ ọphẹ ri mi vo nẹ ogbugbu rẹ arhọ na kẹ ohwo kohwo rẹ urhuru rẹ ame hwe.

⁷Ọ ro phi kparobọ kọ reuku nana, ke me dia Ọghẹnẹ rọye kọ dia ọmọ mẹ.

⁸Ẹkẹvuọvo vwọ kẹ ọvwoshọ, ọ ro jẹ esegbuyota evwo, ọ ro gbe ẹgua, vwọ kẹ ozighẹ, ovwofanrhiẹ, ọmraro, ọgọedjọ, kugbe ọvwọrọn ofian, ughwẹ rayen kẹ ẹtẹrhe rẹ erhanre da tua vẹ ibiosio rẹ erhanre na, kọye hẹ ughwu rivẹ.

⁹Etiyin ọvo vwẹ usun rẹ emakashe ighwrẹ na, ro vwo idjokpo ighwrẹ rọ vọnre vẹ etiekọ ighwrẹ re ka uko na, da ta ota kẹ vwẹ, nẹ, Yanrhe, me vwẹ Ọpha na nẹ wẹ, aye rẹ Omogodẹ na.

¹⁰Vwẹ obo Erhi na o de mu uvwe yanran kpo obo ugbenu rode ro kpenu, ọ da vwẹ Jerusalẹm orere ọfuanfon na nẹ vwẹ ro wotọ nẹ obọ rẹ Ọghẹnẹ cha vwẹ obo odjuvwu,

¹¹o vwo urinrin rẹ Ọghẹnẹ, elo rọye da họhọ irhu rọ ma ghare, kerẹ ubioragha ro lo wrawra.

¹²Ọ vẹ igbẹhẹ rode, ro kpenu, vẹ anurhoro ihwivẹ, emakashe ihwivẹ da hẹ anurhoro ihwivẹ na, e de si edẹ rẹ orua ihwivẹ rẹ emọ rẹ Izrẹl na tamuo;

¹³vwẹ obaro ọnre anurhoro erha, vwẹ obọrhe ọnre anurhoro erha, vwẹ obọhwẹre ọnre anurhoro erha, vwẹ obuko ọnre anurhoro erha.

¹⁴Igbẹhẹ rẹ orere na de vwo ichivwo ihwivẹ, e de si odẹ rẹ iyinkọn ihwivẹ rẹ Omogodẹ na tamuo.

¹⁵Ọ rọ vẹ ovwẹ gba ta ota na da yọnre ubiurhe rẹ oro vwẹ obọ rọ vwọ vwavwa orere na igbẹhẹ rọye kugbe inurhoro na.

¹⁶Orere na de vwo igogo ẹne abavo, ugrogro rọye vẹ ohẹhẹre rọye abavo; ọ da vwẹ ubiurhe rọye na vwavwe orere na, ọ da dia ichiyi uriori ihwivẹ kugbe ujori ujosan; ugrogro rọye kugbe ohẹhẹre rọye kugbe enuẹra rọye abavo.

¹⁷Ọ da je vwavwe igbẹhẹ rọye, esabọ ujughwrẹ gbẹ ẹne, kọye hẹ esabọ rẹ amakashe.

¹⁸Ibieragha ri lo wrowro a vwọ bọn igbẹhẹ na, yẹ evun rẹ orere na kẹ omamọ rẹ oro, wrowro kerẹ ughegbe.

¹⁹A da vwẹ evwarha rhuẹrẹ ichivwo rẹ igbẹhẹ rẹ orere na; ọ rẹsosuọ jaspa, ọrivẹ safira, ọrerha agate, ọ rẹne emarald,

²⁰ọ riyori ọnix, ọ resan kanelia, ọ righwrẹ krisolait, ọ rẹrenre bẹril, o rirhiri topaz, ọ rihwe krisopas, ọ ruhwọvo jasint, ọ rihwivẹ ametist.

²¹Inurhoro ihwivẹ na Pẹl ihwivẹ e vwo ru ayen, anurhoro ọvuọvo na vwo Pẹl ọvuọvo, urhuvwu rẹ orere na oro a vwọ vọnrhọ, o lo wrowro kerẹ ughegbe.

²²Me mrẹ uwevwi rẹ ẹga vwẹ evun rẹ orere na-a, kidie uwevwi rẹ ẹga rọ herọ ọye hẹ Ọrovwohwo Ọghẹnẹ Ọrovwoẹgba kugbe Omogodẹ na.

²³Orere na rha guọnọ ọnre eyẹ emeranvwe ro lo vwọ-ọ, kidie urinrin rẹ Ọghẹnẹ ọvo ọye hẹ urhukpẹ rọye, urhukpẹ rọye kọye hẹ Omogodẹ na.

²⁴Vwẹ urhukpẹ rọye ọye ẹgborho na cha vwọ yan; ivie rẹ akpọ na ke cha ghwẹ urinrin rayen ruọ,

²⁵e gbi huhu ẹchẹ rọye vwẹ oghẹruvo bẹdẹ-ẹ — ason rha cha dia etiyi-in;

²⁶ayen ke cha ghwa urinrin kugbe ọghọ rẹ ẹgborho na ruọ.

²⁷Ẹkẹvuọvo obo ri jẹfuọn cha sa vwẹriẹ-ẹ, eyẹ ohwo kohwo ro gbe ẹgua eyẹ ofian, ẹkẹvuọvo jokpa rẹ ayen otu re si phihọ ọbe rẹ arhọ rẹ Omogodẹ na.