Read urhobo Ẹvwọphia 22 Bible Online

Ẹvwọphia 22 - urhobo bible

Ẹvwọphia 22

¹Etiyin ọ da vwẹ urhie rẹ ame rẹ arhọ na vwọ nẹ vwẹ, ọ pha ghologholo, rọ djẹ nẹ ekete rẹ Ọghẹnẹ na kugbe ọ rẹ Omogodẹ na cha

²wan uherevie rẹ urhuvwu rẹ orere na; vwẹ obọ nana vẹ obọ yena rẹ urhie na, urhe rẹ arhọ na da je djẹ vwọ ọ vẹ oka rẹ ibi ihwivẹ, rọ mọ emamọ rọye kemeranvwe kemeranvwe; ẹbe rẹ urhe na kọye e vwo sivwi ẹgborho na.

³Emu ọvuọvo ra harhere gbe herọ-ọ, ẹkẹvuọvo jokpa rẹ ekete rẹ Ọghẹnẹ kugbe ọ rẹ Omogodẹ na ọvo re hẹ evun rọye, idibo rọye ke cha gọ;

⁴ayen ke cha mrẹ opharo rọye, odẹ rọye kọ cha dia arhare rayen.

⁵Ason gbe cha dia ọfa-a; ayen gbe guọnọ orẹmrẹ rẹ urhukpẹ eyẹ ọnre-e, kidie Ọrovwohwo Ọghẹnẹ na kọ dia urhukpẹ rayen, ayen ke cha re bẹdẹ bẹdẹ.

⁶Ọ da ta kẹ vwẹ, Eta nana emamọ ota kugbe uyota. Ọrovwohwo na, Ọghẹnẹ rẹ irhi rẹ emraro na, ọye ri ji amakashe rọye rhi dje kẹ idibo rọye obo re cha phia nanana.

⁷Nighe, Me cha nanana. Ebruba kẹ ohwo rọ yọnre eta rẹ aroẹmrẹ rẹ ọbe nana.

⁸Mẹvwẹ ri Jọn hẹ ohwo ro nyori rọ je mrẹ imu nana. Ọke ri mi vwo nyo re me vwọ mrẹ ayen, mi de she diguẹ me da gọ vwẹ asan awọ rẹ amakashe rọ vwẹ ayen nẹ vwẹ na;

⁹ẹkẹvuọvo ọ da ta kẹ vwẹ, Wo ruẹ ọyena-a! mẹvwẹ odibo kirobo wọ epha na kugbe imoni wẹn emraro na, kugbe ayen otu re yọnre eta rẹ ọbe nana. Gọ Ọghẹnẹ.

¹⁰Ọ da ta kẹ vwẹ, Wo huhu ọbe rẹ eta rẹ aroẹmrẹ nana-a, kidie ọke na si kẹre re.

¹¹Jẹn ohwo ro ruẹ umwemwu ru bẹsiẹye, ọ ro gbe inuhu e jo gbe bẹsiẹye, e jẹn ọvwata dia ọvwata rọye bẹsiẹye, kugbe ọ rọ fonro ghwa fon bẹsiẹye.

¹²Nighe, me cha nanana, me vẹ osa mẹ, re me cha hwa kẹ ohwo ọvuọvo kirobo ro ruru.

¹³Mẹvwẹ hẹ Ẹsosuọ kugbe Oba, ẹtuọhọ kugbe ure.

¹⁴Ebruba kẹ ayen otu re fọnrhọ rayen fon, rere ayen vwo se si kẹre urhe rẹ arhọ na rere ayen sa wan anurhoro na ro orere na.

¹⁵Otu rẹ eranko na, emraro rẹ ofian, evwofanrhiẹ, izighẹ, egọedjọ, kugbe otu re vwọrọn ofian, ki che mudia otafe.

¹⁶Mẹvwẹ ri Jesu ri ji amakashe mẹ rhe we ro se iseri nana kẹ ishọshi na. Mẹvwẹ hẹ owọ kugbe upene ri Devid, isio rẹ irhiọke ro lo.

¹⁷Erhi na kugbe Ọpha na ta, Yanrhe. E jẹn ohwo ro nyori ta, Yanrhe. E jẹn ohwo rẹ urhuru rẹ ame hwe yanrhe, e jẹn ohwo rọ guọnọre da ame rẹ arhọ na ọphẹ.

¹⁸Ovwan otu ri nyo eta rẹ aroẹmrẹ rẹ ọbe nana jomaotọ: ohwo de bru ba ayen, Ọghẹnẹ ko bru etiekọ re keri vwẹ evun rẹ ọbe nana ba kẹ,

¹⁹ohwo de si nẹ eta rẹ aroẹmrẹ re hẹ evun rẹ ọbe nana, Ọghẹnẹ ko si ẹkẹn rọye ro tere vwẹ urhe rẹ arhọ na no, kugbe orere ọfuanfon na, re dje vwẹ ọbe nana.

²⁰Ohwo ro se oseri kpahe Emu nana tare, O muẹro me cha nanana. Isẹ. Yanrhe, Ọrovwohwo Jesu!

²¹Ẹserọphẹ rẹ Ọrovwavwanre Jesu vẹ ihwo efuanfon na ejobi dia. Isẹ.