Read urhobo Ẹvwọphia 4 Bible Online

Ẹvwọphia 4 - urhobo bible

Ẹvwọphia 4

¹Rẹ Ọnana vwọ nu, mi vwo ni, nighe me da mrẹ ẹchẹ rẹ odjuvwu ro rhie phihọ! Urhuru rẹsosuọ ri mi ke nyo rọ ta ota kẹ vwẹ da họhọ owanre, ro se vwe nẹ, Yanrhe obonẹ, re me vwẹ obo re cha phia nanana vwọ nẹ wẹ.

²Siẹvuọvo na me da hẹ evun rẹ Erhi na, mi vwo ni, ekete ọvo de mudia vwẹ obo odjuvwu, ohwo ọvo de tidia vwẹ enu rẹ ekete na!

³Ohwo ro tidia na da họhọ ubioragha ro lo wrowro, aphoro de mu riariẹ ekete na phihọ ro vwara rhururhuru kerẹ efenudu.

⁴Ekete uje gbẹ ẹne da riariẹ ekete na phihọ. Me da mrẹ ekpako uje gbẹ ẹne ri tidia enu rẹ ekete na, ri ku iwun efuanfon phihọ, aye vwẹ erhu rẹ oro tughẹ.

⁵Enu kọ nyavwaro nẹ obo ekete na cha, kugbe urhuru vẹ edo rẹ agbrara, irhukpẹ ighwrẹ re la da hẹ obaro rẹ ekete na, kẹ eye hẹ erhi ighwrẹ rẹ Ọghẹnẹ na;

⁶abadi ọvo ro do ghroghro da hẹ obaro rẹ ekete na kerẹ abadi rẹ ughegbe rọ ro aro. Vwẹ abọ ọvuọvo rẹ ekete na, re riariẹ ekete na phihọ, eranvwe ekpokpọ ẹne herọ, re vọnre vẹ ibiẹro vwẹ obaro vẹ obuko.

⁷eranvwe ọkpokpọ rẹsosuọ da họhọ okpohrokpo, eranvwe ọkpokpọ rivẹ da họhọ erhuẹn, eranvwe ọkpokpọ rerha de vwo opharo rẹ ohwo, eranvwe ọkpokpọ rẹne da họhọ ugo rọ rhan.

⁸Ọvuọvo vwẹ eranvwe ekpokpọ ẹne na, de vwo ibekpe esan, e da vọn vẹ ibiẹro riariẹ ji kugbe obo evun, ayen vwo omaerovwo rẹ une ẹsuọ vwẹ ason kugbe uvo-o, tanẹ. Ẹfuọn, ẹfuọn, ẹfuọn, ọye hẹ Ọrovwohwo Ọghẹnẹ Ọrovwoẹgba, ohwo rọ herọ rhabae rọ je herọ vwẹ asakiephana rọ je cha dia bẹdẹ.

⁹Kọke kọke rẹ eranvwe ekpokpọ na da vwẹ urinrin kugbe ọghọ kugbe ẹkpẹvwẹ vwọ kẹ ohwo ro tidia vwẹ enu rẹ ekete na, rọ rhọre bẹdẹ na,

¹⁰ekpako uje gbẹ ẹne na ki she diguẹ vwẹ obaro rẹ ohwo ro tidia vwẹ enu rẹ ekete na kẹ ayen gọ ohwo rọ rhọre bẹdẹ bẹdẹ na; ayen ke kpare erhu rayen phihọ obaro rẹ ekete na, ke so une tanẹ,

¹¹Wọwẹ hẹ ohwo ro fori, Ọrovwavwanre kugbe Ọghẹnẹ, rọ reyọ urinrin kugbe ọghọ kugbe ogangan, kidie wọwẹ re mama emu ejobi, ọhọre wẹn ayen vwọ herọ kọye a vwọ mama ayen.