Read urhobo Ẹvwọphia 5 Bible Online

Ẹvwọphia 5 - urhobo bible

Ẹvwọphia 5

¹Vwẹ obọrhe rẹ ohwo ro tidia vwẹ enu rẹ ekete na, me da mrẹ ọbe ọvo e siro vọn te obuko te obaro, a vwẹ usiaphrẹ ighwrẹ kanrọ;

²Me da mrẹ amakashe ọgangan ọvo rọ yan ghwoghwo nẹ, Ono ri fori ro rhie ọbe na rọ je sa kpare isiaphrẹ na?

³A mrẹ ohwo ọvuọvo vwẹ obo odjuvwu eyẹ akpọ na eyẹ evun rẹ otọ rẹ akpọ na rọ se rhie ọbe na eyẹ se no-o,

⁴Me da viẹ gangan nẹ a sa mrẹ ohwo ro fori ro se rhie ọbe na-a siẹvo ke se-e.

⁵Etiyin ọvo vwẹ ekpako na da ta kẹ vwẹ, Wọ viẹ-ẹ; nighe, Okpohrokpo rẹ orua ri Juda na, Owọ ri Devid, o phi kparobọ nure, kọye ri se rhie ọbe na kugbe isiaphrẹ ighwrẹ na.

⁶Vwẹ uvwre rẹ ekete na kugbe eranvwe ekpokpọ ẹne na kugbe ohri rẹ ekpako na, me da mrẹ Omogodẹ ro mudia, kerẹ ọ re hweri na, vẹ ighoro ighwrẹ kugbe ẹro ighwrẹ, kọye hẹ erhi ighwrẹ rẹ Ọghẹnẹ ro ji ro akpọ na ejobi;

⁷ọ da yanran ra reyọ ọbe na nẹ obọrhe rẹ ohwo ro tidia vwẹ enu rẹ ekete na.

⁸Ọke rọ vwọ reyọ ọbe na nu eranvwe ekpokpọ ẹne na kugbe ekpako uje gbe ẹne na de she diguẹ vwẹ obaro rẹ Omogodẹ na, ọvuọvo yọnrọn isorogu, kugbe udjokpo rẹ oro rọ vọnre vẹ ugboduma, keye hẹ ẹrhovwo rẹ ihwo efuanfon na;

⁹ayen da so une ọkpokpọ, tanẹ, Wọwẹ hẹ ohwo ro fori rọ sa reyọ ọbe na ro de se rhie isiaphrẹ rọye, kidie e hwe we jovwo ọbara wẹn kọye wọ vwọ tan ihwo hirhe kẹ Ọghẹnẹ nẹ orua korua kugbe ephẹrẹ kugbe ihwo kugbe ẹgborho,

¹⁰ọ da vwẹ ayen ru uvie kugbe irherẹn kẹ Ọghẹnẹ rẹ avwanre, kẹ ayen cha re vwẹ akpọ na.

¹¹Mi vwo ni, mi de nyo urhuru rẹ emakashe buebu re riariẹ ekete na phihọ kugbe eranvwe na kugbe ekpako na, unu rayen oduduru vware oduduru kugbe uriori vware uriori,

¹²re ta vẹ urhuru ọgangan nẹ, Omogodẹ re hweri na ọye fori, rọ reyọ ogangan kugbe efe kugbe aghwanre kugbe ẹgba kugbe ọghọ kugbe urinrin kugbe ebruba!

¹³Mi de nyo eranvwe keranvwe vwẹ evun rẹ odjuvwu kugbe akpọ na kugbe evun rẹ otọ rẹ akpọ na kugbe abadi na, kugbe obo re hẹ evun rẹ ayen ejobi, tanẹ, Ebruba kugbe ọghọ kugbe urinrin kugbe ẹgba kẹ ohwo ro tidia vwẹ enu rẹ ekete na kugbe Omogodẹ na bẹdẹ bẹdẹ!

¹⁴Eranvwe ekpokpọ ẹne na da ta, Isẹ! ekpako na de she diguẹ ayen da gọ.