Read urhobo Ẹvwọphia 9 Bible Online

Ẹvwọphia 9 - urhobo bible

Ẹvwọphia 9

¹Amakashe riyori de hworo owanre rọye, me da mrẹ isio ọvo ro she nẹ obo odjuvwu cha akpọ na, a da vwẹ usiaphrẹ rẹ orho rẹ igbephẹre vwọ kẹ;

²o de rhie ẹchẹ re orho rẹ igbẹphẹre na, ivwirhi de bru nẹ evun rọye rhe kerẹ ivwirhi rẹ ẹkuerhanre rode, te ọnre te enu ejobi de rhi bi hwi vẹ ivwirhi na.

³Ebaka buebu de nẹ evun rẹ ivwirhi na rhe evun rẹ akpọ na; a da vwẹ ogangan kẹ ayen kerẹ ogangan rẹ ekpakpasimagha rẹ akpọ na;

⁴a da ta kẹ ayen nẹ ayen ria odi rẹ akpọ na-a eyẹ egẹ eyẹ irhe-e, jokpa rẹ ihwo ri jẹ oka rẹ Ọghẹnẹ na evwo vwẹ arhare rayen;

⁵a da ta kẹ ayen nẹ ayen hwe ihwo na-a ẹkẹvuọvo e jẹ ayen mrẹ odjadja emeranvwe iyori, odjadja rẹ ayen mrẹ na kọ họhọ obi rẹ akpakpasimagha, vwẹ ọke rọ da sa ohwo.

⁶Vwẹ ọke yena ihwo ke guọnọ ughwu yẹ ayen sa mrẹ-ẹ; urhuru rẹ ughwo kọ si ayen ughwu kọ mrẹ ayen djẹ.

⁷Ebaka na ke họhọ esi ra rhuẹrẹ oma ri che kpo ofovwi; a da vwẹ erhu rọ họhọ oro vwo tughẹ ayen; epharo rayen da họhọ opharo rẹ ihwo,

⁸ẹto rayen da họhọ ẹto rẹ eya, ako rayen da họhọ ako rẹ okpohrokpo;

⁹ayen da gba ogba rọ họhọ utehru, edo rẹ ibekpe rayen da họhọ usun rẹ idjighere buebu vẹ esi re vwo kpo ofovwi;

¹⁰ayen vwo urhurhuvwu kerẹ akpakpasimagha, e sa, urhurhuvwu na kọye odjadja rẹ ayen rẹ ayen vwọ kẹ ihwo emeranvwe iyori na epha.

¹¹Ovie rẹ ayen vwori kọye hẹ amakashe rẹ orho rẹ igbẹphẹre; odẹ rọye vwẹ ephẹrẹ ri Hibru kẹ Abadọn, e rhe se vwi Grik nẹ Apolọn.

¹²Ukpokpogho rẹsosuọ wan nure; nighe, ukpokpogho ivẹ ọfa je cha.

¹³Etiyin amakashe resan de hworo owanre rọye, mi de nyo urhuru ro nẹ ighoro ẹne re hẹ agbada rẹ oro na rọ hẹ obaro rẹ Ọghẹnẹ,

¹⁴rọ ta kẹ amakashe resan na ro vwo owanre na nẹ, Rhan emakashe ẹne na ra ghare vwẹ obo urhie rode ri Yufretis.

¹⁵A da ghene rhan emakashe ẹne na, ra gbare hẹrhẹ ọke nana rhabae na, ẹdẹ na, emeranvwe na, kugbe ukpe na, no hwe akarha rẹ ihwo rẹ akpọ.

¹⁶Unu rẹ otuofovwi na rẹ ihwo ri yivwaro da dia uriori ihwe akuava kugbe uriori ihwe akuava; ọye mi nyo unu rẹ ayen.

¹⁷Kẹ enẹ me mrẹ esi na vwẹ emramrẹ mẹ; ihwo re gua na ku ekpoudu re vwara kerẹ erhanre kugbe oghẹre rẹ eragha sansan, iyovwi rẹ esi na da họhọ iyovwi rẹ okpohrokpo, erhanre vẹ ivwirhi kugbe isọn ọnre ki brẹ nẹ unu rayen cha.

¹⁸Vwẹ oma rẹ ọtiekọ nana erha na akarha rẹ ihwo rẹ akpọ na de ghwu re, vwi fiki rẹ erhanre vẹ ivwirhi kugbe isọn ọnre ro brẹ nẹ unu rayen cha na.

¹⁹Kidie ogangan rẹ esi na hẹ unu rayen kugbe urhurhuvwu rayen; irhurhuvwu rayen họhọ eredekọ, vẹ ẹtoegba, keye e vwọ wan ihwo oma.

²⁰Ihwo rẹ akpọ na ri chekọ, rẹ ọtiekọ na hweri-i, ji se kurhẹriẹ nẹ iruo rẹ abọ raye-en eyẹ siobọ nẹ egagọ rẹ idẹbono kugbe ema rẹ oro kugbe idọnọ efuanfon kugbe ẹrovwo kugbe oragha kugbe urhe, re sa mrẹ-ẹ eyẹ nyo eyẹ yan;

²¹ayen ji se siobọ nẹ ozighẹ raye-en eyẹ ephaẹbọ eyẹ ọfanrhiẹ eyẹ uji.