Read urhobo Rutu 2 Bible Online

Rutu 2 - urhobo bible

Rutu 2

¹Asakiephana Naomi de vwo ohwo ọvo rọ dia omoni rẹ ọshare rọye, ọshare na kẹ ọdafe, ohwo rẹ orua rẹ Elimẹlẹk; odẹ rọye Boaz.

²Etiyin Rutu rẹ ohwo ri Moab na da ta kẹ Naomi, Jẹn uvwe yanran kpo udju ọke nana, rere mi re gbugbo rẹ ọka rẹ ọghwẹrẹ re me cha mrẹ ẹroesiri vwẹ obọ rọye. Etiyin ọ da ta kẹ, Yanran, ọmọtẹ mẹ.

³Etiyin ọ da yanran, ọ da ra tọrọ eka nene otu re kọrọ eka na vwẹ obo udju; ọ da rhe tọrọ ro ẹbẹrotọ ri Boaz, ohwo rẹ orua rẹ Elimẹlẹk.

⁴Nighe, Boaz de nẹ Bẹtlẹhẹm rhe, ọ da ta kẹ otu re kọrọ eka na, Ọrovwohwo nene ovwan dia! Ayen da kpahe kẹ, Ọrovwohwo bruphiho kẹ wẹ

⁵Etiyin Boaz da ta kẹ odibo rọye rẹ olori rẹ otu re kọrọ eka na, Ono vwo ọmọtẹ nana?

⁶Odibo na rẹ olori rẹ otu re kọrọ eka na da kpahe kẹ, Ọmọtẹ rẹ ihwo ri Moab, rọ vẹ Naomi gbe nẹ orho ri Moab rhe;

⁷Ọ da ta, Biko, jẹn uvwe tọrọ re me ghwẹ koko nene otu re kọrọ na. Kọye ọ da rhe, rhe tọrọ nẹ irhiọke ride rhe ri te ọke nana, o ji rhovwoma krẹn siẹvo-o.

⁸Etiyin Boaz da ta kẹ Rutu, Asakiephana kerhọ, ọmọtẹ mẹ wo kpo udju ọfa ra tọrọ-ọ, yẹrẹ wọ yan jẹ ọnana vwo-o, ẹkẹvuọvo si kẹrẹ emetẹ mẹ na kpẹkpẹ.

⁹Jẹn ẹro wẹn dia udju rẹ ayen de vuẹn na, siẹnẹ wo nene ayen. Ọ dia omẹvwẹ re ta kẹ imighele na nẹ ayen kpokpo uwe-e? Ọke rẹ urhuru rẹ ame de si we, wọ me ra da ame rẹ imighele na vo rhe na.

¹⁰Etiyin ọ da bọvwọ opharo rọye rhuotọ, o de shiguẹ te otọ, ọ da ta kẹ, die me ghwa vwọ mrẹ ẹroesiri vwẹ obaro wẹn, ru wo vwo ni vwe so, je ọrharha mi ruẹ?

¹¹Ẹkẹvuọvo Boaz da kpahe kẹ, Obo wo ru kẹ oniorọvwe wẹn ejobi rhanwen ọke rẹ ọshare wẹn vwo ghwu na, ọ nabọ gbe ayen kẹ vwẹ, obo ru wọ yan jẹ ọsẹ vẹ oni wẹn vwo vẹ otọ re de vwiẹ we ru wo de bru ihwo ru wo ji vughe dẹvo-o rhe obonẹ.

¹²Ọrovwobwo hwa osa kẹ wẹ kirobo ri wo ruru, osa rọ vọnre ọye Ọrovwohwo hwa kẹ wẹ, Ọghẹnẹ rẹ Izrẹl, ohwo ri wo rhi sioma nu vwe obotọ rẹ ibekpe rọye.

¹³Etiyin ọ da ta, Wo nẹ arodọrvwe kẹ vwẹ gangan, Ọrovwovwe, kidie wo bru vwe uche wọ da ta ota rẹ aruẹdọ kẹ ọmọtẹ wẹn, je me dia ọvo vwẹ usun rẹ idibo wẹn rẹ emetẹ-ẹ.

¹⁴Ọke ra vwọ ria emu vwo te, Boaz da ta kẹ, sikẹrẹ obonẹ, ru wọ ra re emu, ru wo duvwu obọegun wẹn phihọ wain. Etiyin o de tidia kẹrẹ otu ri vuẹn na, ọ da reyọ ọkuọka rọ ọyaya vwọ kẹ; ọ da re bẹsiẹ rẹ evun vwọ vọn, ọ da je mrẹ re chekọ.

¹⁵Ọke ro vwo vrẹn nẹ ọye cha che gbugbo Boaz da ta kẹ imighele rọye, nẹ we jo gbugbo vwẹ evun rẹ eka na, wa ghwọ kuo-o.

¹⁶Ji yoro ẹvo nẹ ekru na kẹ, rọ mrẹ gbo, wa harhọ-ọ.

¹⁷Etiyin o de gbugbo vwẹ evun rẹ udju na re te ovwọnvwọn, etiyin o de duvwu ọka ro gbori na: o de dino te iputusẹ ri bali.

¹⁸O de muo, o de kpo obo orere na; ọ da vwọ nẹ oniorọvwe rọye obo ro gbori, etiyin o de mu emuọre rọ re chekọ rẹ evun vwọ vọn nu vwọ kẹ.

¹⁹Oniorọvwe rọye da ta kẹ Tivọ wo de gbugbo nonẹ? Tivọ wo de ru iruo? Ebruphihọ kẹ ohwo ro ni we so. Etiyin o de dje ohwo ro nene ru iruo kẹ oniorọvwe rọye na, ọ da ta, odẹ rẹ ọshare ri mi nene ru iruo nonẹ na e se Boaz.

²⁰Etiyin Naomi da ta kẹ aye rẹ ọmọ rọye Ebruphihọ rẹ Ọrovwohwo dia kẹ ohwo na, ro gbobọ nyẹ ẹse ro ruẹ vwọ kẹ ihwo ekpokpọ eyẹ ighweghwu-u. Naomi da je ta kẹ, Ọshare na omoni rẹ avwanre, omoni kpẹkpẹkpẹ.

²¹Rutu ohwo ri Moab na da ta, Vwọ ba, ọ je ta kẹ vwẹ, Wo mi sikẹrẹ idibo mẹ na kpẹkpẹkpẹ, bẹsiẹ rẹ ayen vwo vu ivuevun mẹ renu.

²²Etiyin Naomi da ta kẹ Rutu, aye rẹ ọmọ rọye na, Oyoma, ọmọtẹ mẹ, ru wo vwo nene emetẹ rọye, ọ da dia odju rẹ ohwo ọfa ayen da rha mrẹ wẹn ayen ke laghe owẹ.

²³Etiyin o de sikẹrẹ emetẹ ri Boaz na de gbugbo bẹsiẹ re te oba rẹ orhọ ri bali kugbe ọ rẹ eka, o de nene oniorọvwe rọye dia.