Read urhobo Rutu 3 Bible Online

Rutu 3 - urhobo bible

Rutu 3

¹Etiyin Naomi rẹ oniorọvwe rọye da ta kẹ, Ọmọ mẹ, me rha guọnọ uwenre kẹ wẹ, rere o se yovwi kẹ wẹ?

²Asakiephana Boaz dia omoni rẹ awanre ru wọ vẹ emetẹ rọye gba dia oboyi? Nighe, ọ cha fa bali vwẹ ason na vwẹ asan ra da fa efafa.

³Fiki rẹ ọtiọye na, gba họ oma wẹn wọ vwo ori ghworo, vwẹ amwa wẹn ro me yovwi vwo rhuo, ru wo kpo asan ra da fa efafa na: ẹkẹvuọvo, wo dje oma wẹn kẹ ọshare na-a, bẹsiẹ rọ vwọ re rọ vwọ da nu

⁴Ẹkẹvuọvo ọke ro de shevwerhẹ, wo me vwẹ ẹro da asan ro shevwerhẹ, wọ me ro uwevwi, wọ me kpare amwa nẹ awọ rọye wo mi shevwerhẹ, kọ cha ta obo ri wo ru kẹ wẹ.

⁵Ọ da kpahe emu ejobi ru wọ ta kẹ vwẹ mi ruo.

⁶Ọtioye o de kpo asan ra da fa ofafa na, o de ru kirobo rẹ oniorọvwe rọye ta kẹ ejobi.

⁷Ọke ri Boaz vwọ re rọ vwọ da nure, rẹ oma vwọ vwerhọ, o de re shevwerhẹ kẹrẹ ẹko rẹ ọka. Ọ jomatọ yanrhe, ọ da kpare amwa nẹ awọ rọye, o de shevwerhẹ.

⁸Vwẹ uherevie rẹ ason, ọshare na de guegue, ọ da rhẹriẹ oma, nighere aye ọvo de shevwerhẹ kẹrẹ asan awọ rọye.

⁹Ọ da ta, Wẹ ono? Ọ da kpahe, mẹvwẹ Rutu, odibo wẹn rẹ ọmọtẹ: Vwẹ abamwa wẹn phopho ọmọtẹ wẹn: kidie wẹ omoni kpẹkpẹkpẹ.

¹⁰Etiyin ọ da ta, Jẹn Ọrovwohwo bruphihọ kẹ wẹ, ọmọtẹ mẹ; ẹse wẹn nana rhonọ ọ rẹsosuọ kidie wo nenesi re imighene-e, yẹrẹ ivwiogbere yẹrẹ edafe.

¹¹Vwẹ Asakiephana ọmọtẹ mẹ, wọ djẹ oshọ-ọ mi ru obo wọ nọre kẹ wẹ; kidie ihwo rẹ orere mẹ ejobi riẹnre nẹ wẹ omamọ rẹ aye.

¹²Vwẹ asakiephana ghinẹ uyota nẹ mẹvwẹ omoni kpẹkpẹkpẹ: ẹkẹvuọvo omoni ọvo herọ rọ kẹrẹ nọ vwẹ.

¹³Dia vwẹ ason nana, vwẹ irhiọke o de ru ẹkẹ rẹ omoni kẹ wẹ, ye oyoma; jo ruo; ẹkẹvuọvo ọ rha rhọvwe ru ẹkẹ rẹ omoni kpẹkpẹkpẹ kẹ wẹ-ẹ, etiyin, kirobo rẹ Ọrovwohwo herọ na, ki mi ru ẹkẹ rẹ omoni kpẹkpẹkpẹ kẹ wẹ. Shevwerhẹ vwọ vwerhẹ bẹsiẹ rẹ urhiọke vwo te.

¹⁴Etiyin o de shevwerhẹ bẹsiẹ rẹ urhiọke vwo te: o de vrẹn tavwe ohwohwo ki vughe ohwo; ọ da ta, wọ je ohwo riẹn nẹ aye ọvo rhe asan ra da fa efafa-a.

¹⁵Ọ da ta, vwẹ ọkpan ru wo vwo phopho oma na rhe re wọ yọnrọn. Etiyin ọ da yọnrọn, ọ da vwanvwe uchunu esan ri bali. O de muo kpahọ: Etiyin ọ da vanran kpo evun rẹ orere na.

¹⁶Ro vwo bru oniorọvwe rọye rhe, ọ da ta, Mavọ wọ yan te, ọmọtẹ mẹ? Etiyin o de gbe obo rẹ ọshare na ruru ejobi kẹ,

¹⁷tanẹ, Ovwanvwọn ri bali esan nana ọ vwọ kẹ vwẹ: kidie ọ tare nẹ, Wo fiabọ kpo bru oniorọvwe wẹ-ẹn.

¹⁸Ọ da kpahe, Hẹrhẹ, ọmọtẹ mẹ, bẹsiẹ wọ vwọ riẹn obo rẹ ota na cha dia: Kidie ọshare na che rovwoma-a, bẹsiẹ ro vwo ruo nu nonẹ na.