Read urhobo 1 Samuẹl 10 Bible Online

1 Samuẹl 10 - urhobo bible

1 Samuẹl 10

¹Etiyin Samuẹl da reyẹ ukoko rẹ evwri o de kuo ku uyovwi rọye, ọ da fiọnfiọn unu ọ da ta, ọ dianẹ Ọrovwohwo re vwẹ evwri ghworo uwe nẹ wọ dia ovie vwẹ enu rẹ ihwo rọye Izrẹl? Ku wọ re vwẹ enu rẹ ihwo rẹ Ọrovwohwo na ku wo sivwi ayen nẹ obọ re ivwighrẹ re riariẹ ayen phihọ na. Ọnana kọ dia oka kẹ wẹ nẹ Ọrovwohwo ghine vwẹ evwri ghworo uwe nẹ wọ dia ovie vwẹ enu rẹ ughwẹ rọye.

²Ọke wo de nẹ etinẹ kpo nonẹ na wọ cha vwa ọshare ivẹ vwẹ asan ushi ri Rachel vwẹ otọ ri Bẹnjamin vwi Zẹlzah, ayen ke ta kẹ wẹ, Ekẹtẹkẹtẹ ru wọ ra guọnọ na a mrẹ ayen re, Asakiephana ọsẹ wẹn gbe rha davwerhọ rẹ ekẹtẹkẹtẹ na-a ẹnwa wẹ kọye ọ rua, tanẹ, kemavo mi ru ọmọ mẹ?

³Ku wọ yan obaro nẹ etiyin ku wo che te ọhahe ri Tabor; eshare erha ri kpo obo rẹ Ọghẹnẹ vwi Bẹtẹl ke cha vwa wẹ vwẹ etiyin ọvo mu ẹmẹvwe erha, ọfa ghwa ọko rẹ ikara erha, ọ ro chekọ de mu oghwara re udi.

⁴Ayen ki che yenre uwe ayen Mm ke wẹ ọko rẹ ikara ivẹ, wọ me reyọ mie ayen.

⁵Ọyena da wan nu ku wo che te Gibeat-ẹlohim, asan rẹ unu rẹ ofovwi rẹ ihwo ri Filistia epha, etiyin, wo de ghwe che te orere na, wọ cha vwa otu rẹ emraro ri wotọ nẹ obenu rẹ ugbenu cha vẹ isorogun, owanre, kugbe akuakua, kugbe une, re mraro.

⁶Etiyin erhi rẹ Ọrovwohwo na ko che mu we gele, ku wọ vẹ ayen cha mraro kugbe ku wo che hirhe phihọ oka rẹ ohwo ọfa.

⁷Ọke rẹ eka nana da vwa wẹ, gbe ru obo ra tani wo ru, kidie Ọghẹnẹ vẹ owẹ herọ.

⁸Ku wọ karo kẹ vwẹ kpo Gilgal; nighe, mi bru we cha che ze izobo rẹ ẹtorhẹ kugbe izobo rẹ ufuoma. Ẹdẹ ighwrẹ wọ hẹrhẹ, bẹsiẹ me cha vwọ rhe rhi dje obo wo ru kẹ wẹ.

⁹Ọke ro vwo chuko ku Samuẹl nu, Ọghẹnẹ da vwẹ udu ọfa vwọ kẹ; eka nana ejobi da rhe phia vwẹ ẹdẹ yena.

¹⁰Ọke rẹ ayen rhi vwo te Gibeah, nighe, otu rẹ emraro da ra vwa; erhi rẹ Ọghẹnẹ de rhe muo gele, ọ da mraro vwẹ ohri rẹ ayen.

¹¹Ọke rẹ ihwo re riẹnre jovwo vwọ mrẹ obo rọ vẹ emraro na mraro, ihwo na da ta kẹ ohwohwo, Die re phia kẹ ọmọ ri Kish? Sọl ji usun rẹ emraro na rhe?

¹²Ohwo rọ asan na da kpahe, Kono ọsẹ rayen? Ọtiọye na o de rhi hirhe phihọ oha, Sọl ji usun rẹ emraro na rhe?

¹³Ọke rọ vwọ mraro nu, o de rhi re enu rẹ ugbenu na.

¹⁴Oniọvo rẹ ọsẹ ri Sọl da ta kẹ vẹ odibo rọye, Tivọ wọ rare? ọ da ta, Avwanre ra guọnọ ekẹtẹkẹtẹ na; ọke rẹ avwanre rha mrẹ aye-en, kẹ avwanre kpo obo ri Samuel.

¹⁵Oniọvo rẹ ọsẹ ri Sọl na da ta, Biko, ta kẹ vwẹ obo ri Samuẹl ta kẹ wẹ.

¹⁶Sol da ta kẹ oniọvo rọ ọsẹ rọye na, ọ ta kẹ avwanre gbagba ne a mrẹ ekẹtẹkẹtẹ na re. Ẹkẹvuọvo vwọ kpahe ota rẹ uvie na, ri Samuẹl ta kẹ na, ọ tarọ kẹ-ẹ.

¹⁷Asakiephana Samuẹl de se ihwo na koko bru Ọrovwohwo vwi Mizpah;

¹⁸Ọ da ta kẹ ihwo rẹ Izrẹl, E nẹ Ọrovwohwo tare, Ọghẹnẹ rẹ Izrẹl na, Me reyọ Izrẹl nẹ otọ rẹ Ijipt rhe, mi de sivwi ovwan nẹ obo rẹ ihwo rẹ Ijipt kugbe obọ rẹ uvie ri chekọ ri shenyẹ ovwan.

¹⁹Ẹkẹvuọvo ẹdọke ri nonẹ na wa sen Ọghẹnẹ rẹ ovwan, ro sivwi ovwan nẹ okpetu rẹ ovwan kugbe uvwerhe rẹ ovwan; ovwan da ta, Ẹjo, ẹkẹvuọvo vwẹ ovie mu kẹ avwanre. Asakiephana wa gba vwẹ oma rẹ ovwan phia kẹ Ọrovwohwo vwẹ oruorua rẹ ovwan kugbe ururiori.

²⁰Etiyin Samuẹl da ghwẹ orua rẹ Izrẹl na ejobi kẹre oma, itẹ de mu orua ri Bẹnjamin.

²¹Ọ da vwẹ uvwuvwiẹ ri Bẹnjamin duvwu itẹ, itẹ de mu uvwiẹ ri Matri; ọ da vwẹ ohwo ọvuọvo vwẹ uvwiẹ ri Matri na vwo duvwu itẹ, itẹ de mu Sọl rẹ ọmọ ri Kish. Ẹkẹvuọvo ọke ra vwọ guọnọ, a gbe sa mrẹ-ẹ.

²²Ayen da rhoma duotọ rọye vwẹ obọ rẹ Ọrovwohwo, Ohwo na rhe etinẹ na? Ọrovwohwo da ta, Nighe, o sioma nu vwẹ ohri rẹ aghwa na.

²³Ayen da djẹ ra reyọ nẹ etiyin rhe; ọke ro vwo mudia vwẹ ohri rẹ ihwo na, ọ da vwẹ ki igabọ kpenu gro nọ ihwo na.

²⁴Samuẹl da ta kẹ ihwo na ejobi, Ovwan mrẹ ohwo rẹ Ọrovwohwo jẹre? O vwo ọvuọvo rọ họhere vwẹ ohri rẹ ihwo na ejobi-i. Ihwo na ejobi de kperi, E jẹn ovie tọn.

²⁵Etiyin Samuẹl de dje kẹ ihwo na ọtiẹ ogangan rẹ ovie na kugbe iruo rẹ ovie se ruẹ o de si ayen phihọ ọbe ọ da bẹre ọbe na sa opharo rẹ Ọrovwohwo. Etiyin Samuẹl de siobọ nẹ ihwo na kpo, dohwo duwevwi rọye da ra.

²⁶Sọl de ji kpo uwevwi rọye rhe vwi Gibeah, ihwo ri yivwaro de tue nene kpo ihwo rẹ Ọghẹnẹ vwẹ obọ te ude rayen.

²⁷Ẹkẹvuọvo erharhe rẹ ihwo evo da ta, Kemavọ ohwo nana se vwo sivwi avwanre? Ayen da jẹfa, ayen gbe ghwẹ ẹga rhe-e. Ẹkẹvuọvo ọ da fọ gbiei.