Read urhobo 1 Samuẹl 11 Bible Online

1 Samuẹl 11 - urhobo bible

1 Samuẹl 11

¹Etiyin Nahash rẹ ohwo rẹ Ammọn de kpo imu vwi Jabesh Gilead; ihwo ri Jabesh ejobi da ra kẹ Nahash, Yanrhe re avwanre vẹ owẹ ru ọbe, kẹ avwanre ga wẹ

²Ẹkẹvuọvo Nahash rẹ ohwo rẹ Ammọn da ta kẹ ayen, Fiki rẹ ọnana ọvo ọye me vẹ ovwan vwo ru ọbe, ki mi yoghro ubiẹro rẹ obọrhe rẹ ovwan nu, rere ọ dia omẹvuọ kẹ Izrẹl ejobi.

³Ekpako ri Jabesh da ta kẹ, Gba kẹ avwanre ẹdẹ ighwrẹ ọvo rere ma vwọ vuẹ ovuẹ kpo otọ rẹ Izrẹl ejobi. A rha mrẹ ohwo ro sivwi avwanre-e, avwanre ke vwẹ oma rẹ avwanre kẹ wẹ.

⁴Ọke rẹ ovuẹ na vwo te Gibeah ri Sọl, ayen da nẹ iyẹnrẹ kẹ ihwo na ejobi nyo; ihwo na ejobi da viẹ phia.

⁵Ọke yena Sọl re nẹ aghwa cha ọ vwọ kpahe irhuẹn na ukuko; Sọl da nọ, Die ri ruẹ ihwo na, rẹ ayen vwọ viẹ? Etiyin e de gbe ikun rẹ ovuẹ rẹ ihwo ri Jabesh na kẹ.

⁶Erhi rẹ Ọghẹnẹ da ruo oma o de gele ro vwo nyo eta nana, ophu de muo gangan.

⁷Ọ da reyọ ekru rẹ irhuẹn, ọ da va ayen kẹnẹ kẹnẹ o de ji ihwo ghare ayen nene otọ rẹ Izrẹl ejobi, tanẹ, Kohwo kohwo ro rhe nene Sọl vi Samuelu-u, kẹ ọtiọna e ru kẹ kirobo re ru irhuẹn rọye na Etiyin oshọ rẹ Ọrovwohwo da ro ihwo na oma, ayen ejobi de bru use na.

⁸Ọke rọ rhe vwọ ghwẹ ayen koko vwi Bẹzẹk, ihwo rẹ Izrẹl da dia uriori ujori erha, ihwo ri Juda da dia uriori ọgban.

⁹Ayen da ta kẹ ikọn re ji rhe na, E nẹ wa ta kẹ ihwo ri Jabesh Gilead: Odẹ, bẹsiẹ rẹ ọnre vwọ bẹre muotọ, kẹ ovwan cha mrẹ esivwo. Ọke rẹ ikọn na rhe vwọ vuẹ ihwo ri Jabesh, oma da vwerhe ayen.

¹⁰Fiki rẹ ọtiọye na ihwo ri Jabesh da ta, Odẹ avwanre ke vwẹ oma rẹ avwanre kẹ wẹ, re wo ru avwanre obo ri je we.

¹¹Vwẹ irhiọke rivẹ Sọl da ghare ihwo na phihọ unuofovwi erha; ayen da rhe ro evun rẹ ẹrhọn na vwẹ ọke ohẹrhẹ rẹ irhiọke, ayen da rhe nyavwe ihwo rẹ Ammọn kuotọ bẹsiẹ rẹ ọnre vwọ vi; ihwo rẹ obọ te hwe-e da hrabọ ro aghwa, ọtiọye na ihwo ivẹ gbe djẹ fi ohwohwo-o.

¹²Etiyin ihwo na da ta kẹ Samuel, Amono re tanẹ, Ki Sọl cha re uvie vwẹ enu rẹ avwanre? Vwẹ ihwo na rhe, rere a teye ayen hwe.

¹³Ẹkẹvuọvo Sọl da ta, E che hwe ohwo ọvuọvo nonẹ na-a, kidie nonẹ na ọye Ọrovwohwo ru iruo rẹ esivwo vwẹ Izrẹl.

¹⁴Etiyin Samuẹl da ta kẹ ihwo na, Yanrhe, re avwanre kpo Gilgal ra vwariẹn uvie na re.

¹⁵Etiyin ihwo na ejobi da yanran kpo Gilgal, ayen da vwi Sọl mu ovie vwẹ obaro rẹ Ọrovwohwo vwi Gilgal. Etiyin ayen de ze izobo rẹ ufuoma vwẹ obaro rẹ Ọrovwohwo, etyin Sọl vẹ ihwo rẹ Izrẹl ejobi da ghọghọ gangan.