Read urhobo 1 Samuẹl 18 Bible Online

1 Samuẹl 18 - urhobo bible

1 Samuẹl 18

¹Ọke rọ vwọ ta ota kẹ Sọl nu, erhi ri Jonatan de rhi churu mu erhi ri Devid, Jonatan da guọnọ kerẹ omaobọ rọye.

²Sọl da reyọ vwẹ ẹdẹ yena, o gbe rhọvwe nẹ o rhivwi kpo uwevwi rẹ ọsẹ rọye-e.

³Etiyin Jonatan vi Devid da re ọphọ, fikiridie ọ guọnerọ kerẹ omaobọ rọye.

⁴Jonatan da ghwiẹ adagba rọ oma rọye no, ọ da vwọ kẹ Devid, kugbe ekuakua rẹ ofovwi rọye, kugbe ekpuyovwi rẹ ọlọkọ rọye vẹ umurhabọ rọye kugbe umuamwa rọye.

⁵Etiyin Devid da yanran kpo kasan kasan ri Sọl jiro ra ejobi o de phi kparobọ; Sọl de vwo mu phihọ enu rẹ ihwo rẹ ofovwi na. Ọnana dẹ ji ihwo ejobi kugbe idibo ri Sọl rhe.

⁶Rẹ ayen vwo rhivwi kpore, ri Devid vwo nẹ ihwehwe rẹ ihwo ri Filistia na cha, eya na da djẹ nẹ irere rẹ Izrẹl ejobi rhe, e sua ine gbe eha, ra vwa ọvie Sọl, vẹ ekpagha, vẹ ine rẹ aghọghọ, vẹ ekuakua rẹ ihwehworo.

⁷Eya na ke sua ine kẹ ohwohwo rẹ oma vwọ vwerhe ayen na tanẹ, Sọl hwe uriori, Devid hwe uriori ihwe.

⁸Ivun de miovwi Sọl gangan, ota nana jere-e; ọda ta? Ayen tare nẹ Devid hwe uriori ihwe, uriori ọvo kọye ayen so kẹ vwẹ; ki didi emu ọfa o rhe mie vwe nọ uvie mẹ na?

⁹Sọl de phi ọhoho ri Devid vwọ hẹ evun nẹ ẹdẹ yena yanran.

¹⁰Rẹ ọke vwo rhie erhi umwemwu ro nẹ obọ rẹ Ọghẹnẹ rhe na da họrhọ ro Sọl oma, ko bunu vwẹ evun rẹ uwevwi rọye, yi Devid re hworo isorogun na kẹ, kirobo ro ruẹ kẹdẹ kẹdẹ. Yi Sọl yọnrọn ubiri vwẹ obọ rọye;

¹¹Sọl de phi ubiri na, kidie o rori nẹ, Mi ghwe duvwu Devid mu igbẹhẹ. Ẹkẹvuọvo Devid de fovwi oma kẹ asiava.

¹²Oshọ ri Devid ko mui Sọl, fikiridie Ọrovwohwo vẹ ọye herọ ẹkẹvuọvo yọ kua nẹ oma ri Sọl.

¹³Etiyin Sọl de sionẹ obaro rọye, ọ da vwọ ma onotu rẹ uriori; o de ru dẹndẹn vwẹ obaro rẹ ihwo na kirobo ro ruẹ jovwo.

¹⁴Devid de phi kparobọ vwẹ ofovwi rọ rare ejobi; kidie Ọrovwohwo vẹ ọye herọ.

¹⁵Ọke ri Sọl vwọ mrẹ nẹ o phi kparobọ buebu rẹ, oshọ rọye ko muo.

¹⁶Ẹkẹvuọvo Izrẹl vi Juda ejobi da guọnọ Devid; kidie o ruẹ dẹndẹn vwẹ obaro rẹ ayen.

¹⁷Etiyin Sọl da ta kẹ Devid, ọmọtẹ mẹ rẹ ọkpako Merab na; Me vwọ kẹ wẹ vwọ rọvwọ; ku wo yivwaro rere wọ họnre ofovwi rẹ Ọrovwohwo na kẹ vwẹ. Kidie Sọl rori nẹ, E jẹn obọ mẹ dia-a, ẹkẹvuọvo e jẹn obọ rẹ ihwo ri Filistia na te.

¹⁸Devid da ta kẹ Sọl, Kono omẹvwẹ, amono ekrun mẹ, uvwiẹ rẹ ọsẹ mẹ vwẹ Izrẹl, re me vwọ dia ọgọ rẹ ovie?

¹⁹Ẹkẹvuọvo ọke ra vwọ vwẹ Merab, ọmọtẹ ri Sọl, vwọ kẹ Devid vwọ rọvwọ, a da vwọ kẹ Adriẹl ohwo ri Meholat vwo ru aye.

²⁰Asakiephana ọmọtẹ ri Sọl Mikai kọ guọnọ Devid; a da vuẹ Sọl, emu na de je.

²¹Sọl de roro, E ju vwe vwọ kẹ, rere me vwọ kpahe ufi kẹ, rere abọ rẹ ihwo ri Filistia na vwo te. Ọtiọye na Sọl da ta kẹ Devid obọ rivẹ, ku wọ cha dia ọgọ mẹ.

²²Sọl de ji urhi kẹ idibọrọye, Bẹbẹ ta kẹ Devid tanẹ, Nighe, ivun wẹ vwerha ovie, ivun wẹ je vwerha idibo rọye rhe; gba dia ọgọ rẹ ovie.

²³Idibo ri Sọl ke ta ota nana kẹ Devid. Devid da ta, Wo rori nẹ emu otete ra vwọ dia ọgọ rẹ oviẹ, yu wọ riẹnre nẹ mẹvwẹ ovwiogbere re vugheri-i?

²⁴Idibo ri Sọl da ta kẹ, Ẹ nẹ vẹ e nẹ Devid tare.

²⁵Etiyin Sọl da ta, E nẹ wọ ta kẹ Devid ovie guọnọ igho-o jokpa rẹ ophiẹn rẹ upheruphe re ihwo ri Filistia ujori, rere ọ vwẹ ivwighrẹ rẹ ovie vwọ reihri. Asakiephana Sọl roro nẹ obọ rẹ ihwo ri Filistia wan ọnana te Devid.

²⁶Ọke rẹ idibo rọye vwọ ta eta nana kẹ Devid, o de je Devid gangan nẹ ọye dia ọgọ rẹ ovie. Tavwe rẹ ọke na ki rhi te,

²⁷Devid vrẹnri ọ da yanran, ọ vẹ ihwo rọye, o de hwe ihwo ri Filistia uri; Devid da jẹ ophiẹn rẹ upheruphe rayen, ọ da vwẹ ayen kẹ ovie re tototo, rere ọ vwọ mrasa dia ọgọ rẹ ovie. Sọl da vwẹ ọmọtẹ rọye Mikal vwọ kẹ.

²⁸Ẹkẹvuọvo ọke ri Sọl vwọ riẹn nẹ Ọrovwohwo vẹ Devid herọ, yẹ Izrẹl ejobi guọnerọ,

²⁹Oshọ ri Devid ko rhoma mu Sọl phihọ. Ọtiọye na Sọl kẹ ọvweghrẹ ri Devid vwẹ .oke na ejobi.

³⁰Etiyin isun ri Filistia da rhe rhi phi ofovwi, kọke kọke rẹ ayen vwọ rhe ejobi Devid kọye ma kparobọ nẹ idibo ri Sọl ejobi, ọtiọye na a da kpare odẹ rọye kpenu gangan.