Read urhobo 1 Samuẹl 19 Bible Online

1 Samuẹl 19 - urhobo bible

1 Samuẹl 19

¹Sọl da ta kẹ Jonatan rẹ ọmọ rọye kugbe idibo rọye ejobi, nẹ ayen hwe Devid. Ẹkẹvuọvo Jonatan, ọmọ ri Sọl na, da guọnọ Devid gangan.

²Jonatan da ta kẹ Devid, Sọl rẹ ọsẹ mẹ guọnọ owẹ hwe; fiki rẹ ọtiọye na gba kẹnoma wẹn vwẹ irhiọke, kpo asan rọ djahere wo sioma wẹn nu;

³ke me yanran kpo otafe re mudia kẹrẹ ọsẹ mẹ vwẹ evun rẹ aghwa re wọ epha na, ke me ta ota wẹn kẹ ọsẹ mẹ; obo ri mi nyori ke me vuẹ wẹ.

⁴Jonatan de gbe ikun esiri ri Devid kẹ Sọl rẹ ọsẹ rọye, ọ da ra kẹ, e jẹn ovie ruẹ umwemwu kpahe odibo rọye Devidi-i; Fikiridie o ru umwemwu kpahe owẹ-ẹ, fikiridie uruemu rọye vẹ iruo rọye kẹ wẹ oyoyovwi,

⁵kidie o ku arhọ rọye fia ro re vwo hwe ihwo ri Filistia na, Ọrovwohwo da vwẹ obọẹkparọ rode vwọ kẹ Izrẹl ejobi. Wọ mrẹrẹ, wọ da ghọghọ; kidie wo di vwo ru umwemwu kpahe ọbara rẹ ọvwata na ru wo de hwe Devid ekueku?

⁶Sọl de nyo ota ri Jonatan na; Sọl de duvwu iyori nẹ, Kirobo rẹ Ọrovwohwo herọ na, e che hwe-e.

⁷Jonatan de se Devid, Jonatan da vwi Devid rhe Sọl, o de nene dia kirobo rọ epha jovwo.

⁸Ofovwi da rhoma rhi she; Devid da rhoma yanran ra họnre ihwo ri Filistia na, o de hwe ayen buebu, ọtiọye na ayen da mrẹ djẹ.

⁹Etiyin erhi umwemwu ro nẹ obọ rẹ Ọrovwohwo rhe da ro Sọl oma, ro vwo tidia vwẹ uwevwi rọye vẹ ubiri vwẹ obọ; yi Devid re hworo isorogun na.

¹⁰Sọl da guọnọ ro vwẹ ubiri duvwu Devid mu igbẹhẹ; ẹkẹvuọvo o de reghe Sọl, Etiyin ọ da vwẹ ubiri na duvwu igbẹhẹ. Devid da djẹ vabọ.

¹¹Ason yena Sọl de ji ohwo kpo uwevwi ri Devid ra rhẹrẹ, rere ọ vwọ mrasan hwe vwẹ irhiọke. Ẹkẹvuọvo Mikal, aye ri Devid, da vuẹ, wọ rha kẹnọma wẹn vwẹ ason na-a, odẹ rọ cha ke hwe we.

¹²Etiyin Mikal da lọrọ Devid wan ọvakpo; ọ da djẹ vabọ yanran.

¹³Mikal da reyọ oma o de muo sherhe ehwa ọ da vwẹ ochuyovwi rẹ ẹton rẹ ẹvwe vwọ cha uyovwi, ọ da vwẹ emwa phopho.

¹⁴Ri Sọl vwo ji ikọn re mu Devid, ọ da ta, oma herọ-ọ.

¹⁵Etiyin Sọl de ji ikọn ra mrẹ Devid, tanẹ, re muo rhe vwe vwẹ ehwa rọye, rere mi hwe.

¹⁶Ọke rẹ ikọn na vwọ rhire, nighe, oma na hẹ ehwa, vẹ ọchuyovwi rẹ ẹton rẹ ẹvwe rọ vwọ cha uyovwi.

¹⁷Sọl da ta kẹ Mikal, Die wọ vwọ phiẹn vwẹ ọtiọna, rẹ ọvweghrẹ mẹ vwọ mrasan djẹ, rọ vwọ va vwẹ abọ? Mikal da kpahe kẹ Sọl, ọ ta kẹ vwẹ nẹ, Ju vwe kpo; die soro mi vwo hwe we?

¹⁸Asakiephana ri Devid vwọ djẹ vabọ nu, o de bru Samuẹl rhe vwi Ramah, o de gbe ikun rẹ obo ri Sọl ruru kẹ. Te ọye te Samuẹl da yanran ra dia Naiot.

¹⁹A da ra vuẹ Sọl, Nighe, Devid ọ hẹ obi Naiot ri Ramah.

²⁰Etiyin Sọl de ji ikọn re mu Devid; ọke rẹ ayen vwọ mrẹ usun rẹ emraro na re mraro, yi Samuẹl rẹ olori rayen mudia vwẹ obaro rẹ usun na, erhi rẹ Ọghẹnẹ da rhe ro ikọn ri Sọl na oma, ayen da je mraro rhe.

²¹Ọke ra vwọ vuẹ Sọl, o de ji ikọn efa, ayen da je mraro rhe. Sọl de rhe ji ikọn efa vwẹ obọ rerha, ayen da je mraro rhe.

²²Etiyin okpuyovwi rọye de kpo Ramah, o de rhi te orhare rode rọ hẹ Seku; ọ da nọ, Tivọ Samuẹl vẹ Devid epha? ọvo da ta, Nighe, ayen hẹ Naiot ri Ramah.

²³Ọ de nẹ Etiyin kpo Naiot ri Ramah; Erhi rẹ Ọghẹnẹ da je ruo oma rhe, rọ vwọ yanran jọ mraro, bẹsiẹ ro rhi vwo te Naiot vwi Ramah.

²⁴Ọ da je sanvwe emwa rọye nu, o da mraro rhe vwẹ obaro ri Samuel, ọ da ban phihọ shevwerhẹ vwẹ uvo yena ejobi kugbe ason yena ejobi. Kẹ ọye nẹrhẹ a tanẹ, Sọl je hẹ usun rẹ emraro na?