Read urhobo 1 Samuẹl 2 Bible Online

1 Samuẹl 2 - urhobo bible

1 Samuẹl 2

¹Hanah da je nẹ ẹrhovwo, ọ da ta, Udu mẹ ghọghọre vwẹ evun rẹ Ọrovwohwo; ogangan mẹ kpare kpenu vwẹ evun rẹ Ọrovwohwo. Unu mẹ kọ vwẹ ivwighrẹn mẹ jehwẹ, kidie me ghọghọre vwẹ evun rẹ esivwo wẹn.

²O vwo ohwo ọvuọvo rọ fonro kerẹ Ọrovwohwo-o, ọfa herọ ba wẹ-ẹ; o vwo oragha ọfa kerẹ Ọghẹnẹ rẹ avwanre na-a.

³Wọ gbe ta ota rẹ eheri ọtiọye ganga-an, Wọ rha jẹ ọjẹfia nẹ unu wẹ cha-a; kidie Ọrovwohwo ọye Ọghẹnẹ rẹ erianriẹn, ọye re vwanvwan uruemu.

⁴Umurhabọ rẹ ọgba e vwirhi ayen, ẹkẹvuọvo ọviẹre vwẹ ogangan chobie.

⁵Otu rẹ evun vọnre vwẹ oma rayen mie emu ẹriọ ẹkẹvuọvo otu rẹ owẹvwe hwe jovwo, owẹvwe gbi hwe aye-en. Ẹga rhoma vwiẹ emọ ighwrẹ ẹkẹvuọvo ọ ro vwiẹri buebu jovwo a rhoma rhe siọn

⁶Ọrovwohwo hwe ghwẹ ọye ọvo re je rhọvwọ; ọ vwẹ ohwo kpo erivwi ọ me je kparọ vrẹn.

⁷Ọrovwohwo ruẹ ohwo phihọ ogbere ọye ji ruẹ phihọ ọdafe; ọ vwẹ ohwo kpotọ ọ je kparọ kpenu.

⁸Ọ kpare ovwiogbere nẹ iwurhie ọ kpare ọ rẹ akpọ bẹn kpenu nẹ evun rẹ erhurhu, rere ayen vẹ isun tidia kugbe rere ayen reuku rẹ ọghọ. Kidie ichivwo rẹ akpọ na ọ rẹ Ọrovwohwo, enu rẹ ayen o mu akpọ na vi.

⁹Ọ sẹro rẹ awọ rẹ ihwo esiri, ẹkẹvuọvo ka nyavwe ihwo umwemwu kufia vwẹ ebri, kidie ọ dia ẹgba ohwo cha vwọ rhọ-ọ.

¹⁰Ivwighrẹn rẹ Ọrovwohwo ejobi ka ghwọrọ ayen vworo vworo; enu kọ cha van ku ayen. Ọrovwohwo che guẹdjọ rẹ oba rẹ akpọ na; ọ cha vwẹ ogangan kẹ ivie rọye, ọ me rha kpare ogangan rẹ ọ rọ jẹreyọ na kpenu.

¹¹Etiyin Ẹlkanah da yanran kpo Ramah. Ọmọ na de gbe odibo kẹ Ọrovwohwo na, vwẹ irharo rẹ Eli rẹ orherẹn na.

¹²Asakiephana emọ rẹ Eli kẹ erharhe rẹ ihwo; ayen se Ọrovwohwo gbe emu-u.

¹³Uruemu rẹ irherẹn na vẹ ihwo na kẹ ọna nẹ ọke rẹ ohwo de ze izobo, odibo rẹ orherẹn na kọ cha vwẹ ọke re de chere eranvwe na, ọ vẹ isosogho ra sa abada ivẹ vwẹ obọ.

¹⁴ko duvwo phihọ oze, eyẹ, ẹvwẹrẹ, eyẹ itaso, eyẹ ubrochẹ, uche rẹ isosogho na duvwuru ejobi kọye orherẹn na reyọ kẹ oma rọye. Ọtiọye ayen ruẹ vwi Shiloh kẹ ihwo rẹ Izrẹl ejobi re rhe etiyin.

¹⁵Ọromarho tavwe ra ke rhe torhẹ ivwri rọye, odibo rẹ orherẹn na kọ cha ọ me rhe ta kẹ ohwo ro ze izobo na, Vwẹ eranvwe kẹ orherẹn na rọ vwọ tọn; kidie ọ cha reyọ eranvwe re chere mie we-e, ẹkẹvuọvo ọkpokpọ.

¹⁶Ọ da dianẹ ohwo na ta kẹ, Jẹn a torhẹ ivwri na tavwe, rere wọ ke reyọ uche obo re wọ guọnọre, kọ ta, Ẹjo, vwọ kẹ vwẹ ọke nana; ọ rha dia ọtiọye-e ke me gba wẹ reyọ.

¹⁷Enẹ kọye umwemwu rẹ imighele na rhe vwọ rho gangan vwẹ obaro rẹ Ọrovwohwo. Kidie ihwo na da vwẹ izobo rẹ Ọrovwohwo na gbotọ.

¹⁸Samuẹl re gbe odibo vwẹ obaro rẹ Ọrovwohwo, omotete ro ku ibuluku re esada phihọ.

¹⁹Jẹ oni rọye re ko amadagba vwo rhe kukpe kukpe, vwẹ ọkẹ rọ vẹ ọshare rọye de kpo izobo rẹ ẹgbukpe eze.

²⁰Etiyin Eli me nẹ ẹrhovwo kẹ Elkanah vẹ aye rọye, ọ me ta, Ọrovwohwo wan oma rẹ aye nana kẹ vwẹ emọ fiki rẹ ọmọ ro siobọ nu kẹ Ọrovwohwo na; etiyin ayen mi rhivwi kpo uwevwi rayen.

²¹Ọrovwohwo de bru Hanah rhe, ọ da mrevun o de vwiẹ emeshare erha kugbe emetẹ ivẹ. Ọmọ re se Samuẹl da rhe rho vwẹ obaro rẹ Ọrovwohwo.

²²Asakiephana Eli ghworo gangan, o de nyo obo rẹ emọ rọye ruẹ vwẹ Izrẹl ejobi, obo rẹ ayen vẹ eya ri gbe odibo vwẹ anurhoro rẹ utughẹ ra da vwa oma na shẹvwerhẹ.

²³Ọ da ta kẹ ayen, Die sọrọ we vwo ruẹ emu ọtiọna? Kidie ihwo na ejobi re gbe ikun rẹ uvumwemwu rẹ ovwan.

²⁴Ẹjo, emọ mẹ; ọdiẹ omamọ rẹ ikun mi nyo na-a ọ rẹ ihwo rẹ Ọrovwohwo gbe wan asan ejobi na.

²⁵ọ da dianẹ ohwo ru umwemwu kpahe ohwo, Ọghẹnẹ kọye re rhuẹrẹ ayen phihọ ẹkẹvuọvo ohwo de rhe ru umwemwu kpahe Ọrovwohwo, kono re rẹ orẹ kẹ? Ẹkẹvuọvo ayen gbe kerhọ rẹ urhuru rẹ ọsẹ raye-en; kidie ẹguọnọ rẹ Ọrovwohwo rere ọ vwọ teyọ ayen hwe.

²⁶Asakiephana ọmọ re se Samuẹl na ro rhua vwẹ ugboma vẹ aroesiri vwẹ obọ rẹ Ọrovwohwo vẹ ihwo rẹ akpọ.

²⁷Ohwo rẹ Ọghẹnẹ de bru Eli rhe, ọ da ta kẹ, Ẹnẹ Ọrovwohwo na tare, Me vwẹ oma mẹ phia kẹ uwevwi rẹ ọsẹ wẹn vwẹ ọke rẹ ayen vwọ hẹ Ijipt vwẹ otọ rẹ uwevwi ri Fero.

²⁸Me da jẹ reyọ nẹ evun rẹ orua rẹ Izrẹl ejobi nọ gba rhe dia orherẹn mẹ, rere o kpo enu rẹ agbada mẹ na, rọ ra torhẹ ugboduma kẹ vwẹ, ro rhuo ibuluku vwẹ obaro mẹ; Me da vwẹ izobo mẹ rẹ ihwo rẹ Izrẹl ejobi vwo rhe vwe ra vwẹ erhanre torhẹ vwọ kẹ uwevwi rẹ ọsẹ wẹn.

²⁹Die sorọ wọ vwẹ ẹro rẹ urhuru vwo nẹ izobo mẹ kugbe ẹkpẹvwẹ mẹ ri mi ji urhi phihọ, ru wo de mu ọghọ kẹ emọ wẹn nọ vwẹ ru wọ reyọ asan rọ ma vwerhe vwẹ izobo rẹ ihwo mẹ Izrẹl vwọ ghẹrẹ oma tubie tubie?

³⁰Vwẹ ọtiọye na Ọrovwohwo Ọghẹnẹ rẹ Izrẹl na tare: Mi veri jovwo nẹ uwevwi wẹn kugbe uwevwi rẹ ọsẹ wẹn ke ro uwevwi ro otafe vwẹ obaro mẹ bẹdẹ; ẹkẹvuọvo asakiephana Ọrovwohwo tare: ọ gbe dia omẹvwẹ; ọfa-a; kidie ihwo ri mu ọghọ kẹ vwẹ eye mi mu ọghọ kẹ, ihwo re jẹ vwẹ fia ke ni ayen phorhi.

³¹Nighe, ẹdẹ cha, re me cha vwọ nyavwe ogangan wẹn kugbe ogangan rẹ uwevwi ọsẹ wẹn kufia, ọtiọye na a gbe cha mrẹ ọmare vwẹ uwevwi wẹ-ẹn.

³²Ẹro wẹn ko che ni vẹ omaẹvuọ kugbe uvwerhe emu esiri ejobi ri che bru Izrẹl rhe; a gbe cha mrẹ ọmare vwẹ uwevwi wẹn bẹdẹ-ẹ.

³³Ohwo wẹn ri mi che jẹ bro kufia nẹ enu rẹ agbada mẹ ki mi jovwo rere ọ viẹ ẹro dje rọ djẹ udu kpanre; ihwo buebu re che vwiẹ vwẹ uwevwi wẹn ejobi ihwo ke cha vwẹ ọlọkọ nyavwe ayen hwe.

³⁴Emu nana rọ cha phia kẹ emọ wẹn ivẹ na, Hofni kugbe Finihas, kọ cha dia oka kẹ wẹ: ayen ivẹ na che ghwu ukpẹdọke.

³⁵Ke me cha vwẹ ọrherẹn esiri vwo mu kẹ oma mẹ, ro che ru kirobo ri mi roro kugbe obo rẹ udu mẹ guọnọre; ke me cha bọn omamọ uwevwi kẹ, kọ ro uwevwi ro otafe vwẹ obaro rẹ ihwo re me vwẹ evwri ghworo na bẹdẹ.

³⁶Kohwo kohwo ro chekọ vwẹ uwevwi wẹn kọ cha rhe rhi momo idọnọ mie eyẹ ọ me rhe yarọ ukori rẹ ikara, kọ ta, me rẹ wẹ, biko phi vwe phihọ asan ọvo vwẹ ẹdia rẹ irherẹn na, rere me vwọ mrẹ ememu rẹ.