Read urhobo 1 Samuẹl 25 Bible Online

1 Samuẹl 25 - urhobo bible

1 Samuẹl 25

¹Asakiephana Samuẹl de rhi ghwu; Izrẹl ejobi da ghwẹ koko rhe viẹ, ayen de sho phihọ uwevwi rọye vwi Ramah. Etiyin Devid vrẹnri ọ da yanran kpo aghwa ri Paran.

²Ọshare ọvo da herọ vwi Maon, ro vwo iruo vwi Kamẹl. Ọshare na feri gangan; o vwẹ igodẹ uriori erha kugbe ẹvwe uriori. ọ ro bru ẹto rẹ igodẹ vwi Kamẹl.

³Asakiephana odẹ rẹ ọshare na kẹ Nabal, odẹ rẹ aye rọye kẹ Abigail. Aye na vwo erhuvwu kugbe erianriẹn, ẹkẹvuọvo ọshare na pha miomiovwi kugbe uruemu ọbrabra; ohwo ri Kaleh.

⁴Devid de nyo vwẹ obo aghwa nẹ Nabal re bru ẹto rẹ igegede rọye.

⁵Etiyin Devid de ji imighele ihwe; Devid da ta kẹ imighele na, we kpo Kamẹl, bru Nabal, re wa ta nẹ mi yeire.

⁶Ke enẹ we yere; Ufuoma dia kẹ wẹ, ufuoma je dia kẹ uwevwi wẹn, ufuoma je dia kẹ obo wo vwori ejobi.

⁷Mi nyori nẹ wo vwo ihwo ri bru ẹto rẹ igodẹ. Isuigegede wẹn vẹ avwanre re gba herọ vwẹ obonẹ na, yẹ avwanre vwẹ obọ te aye-en, emu ọvuọvo va ayen abọ ghwru-u, vwẹ ọke na ejobi rẹ ayen vwọ hẹ Kamẹl na.

⁸Nọ imighele wẹn na, kẹ ayen ta kẹ wẹ. Vwẹ ọtiọye na gbe jẹ imighele mẹ na mrẹ aroesiri vwẹ obọ wẹn; kidie ẹdẹ orẹ avwanre cha rhe. Biko, kemu kemu ro te we obọ ejobi vwọ kẹ idibo wẹn ji kugbe ọmọ wẹn Dẹvid.

⁹Ọke rẹ imighele ri Devid vwọ rhe, ayen de se odẹ ri Devid vwọ ta eta nana ejobi kẹ Nabal; ayen ke hẹrhẹ.

¹⁰Nabal da kpahe kẹ idibo ri Devid, ono e se Devid? ono ọmọ ri Jesse? Idibo buebu herọ vwẹ Asakiephana re djẹ nẹ obọ rẹ inini rayen.

¹¹Ke me vwẹ emu vẹ ame kugbe eranvwe ri mi hwe kẹ ihwo ri bru ẹto kẹ vwẹ, vwọ kẹ ihwo ri nẹ asan ọvo ri je riẹn rhe?

¹²Etiyin imighele ri Devid de rhivwi rhe, rhi gbe ikun nana ejobi kẹ.

¹³Devid da ta kẹ ihwo rọye, ọ vuẹ ọlọkọ rọye reyọ, dohwo dọlọkọ rọye da reyọ; Devid da je reyọ ọlọkọ rọye; ihwo ujori ẹne de nene Devid, ujori ivẹ de tidia kẹrẹ eghwa.

¹⁴Ẹkẹvuọvo ọvo vwẹ usun rẹ imighele na da ta kẹ Abigail, aye ri Nabal, Nighe, Devid de ji ikọn re yere onini rẹ avwanre vwẹ obo aghwa; ọda van ku ayen.

¹⁵Yẹ ihwo na riẹn emu ru kẹ avwanre gangan, ayen wan avwanre oma-a, yẹ emu rẹ avwanre ọvuọvo ji ghwru vwẹ obọ aghwa na-a nene ọke rẹ avwanre vẹ ayen diarọ krite na;

¹⁶ayen da họhọ igbẹhẹ kẹ avwanre te ason te uvo, vwẹ ọke ejobi avwanre ve ayen diarọ rẹ avwanre vwọ sẹro rẹ igodẹ na.

¹⁷Asakiephana gbe riẹn ọnana re wo roro obo wo ru; kidie a rọ jẹ iroro umwemwu kpahe onini rẹ avwanre vẹ uwevwi rọye, yẹ oka rẹ ohwo ọvo ọtiọye rọ guọnọ nẹ ohwo ta ota kẹ ọye-e.

¹⁸Kpata kpata Abigail, da ghwa reyọ ikara ujori ivẹ, kugbe egọ rẹ udi ivẹ, kugbe igodẹ iyori ra va nure, kugbe ovwanvwọn iyori rẹ ọka re duvwuru, kugbe erheghe ri razin ujori, kugbe ikara rẹ a vwẹ owe ru ujori ivẹ, o de kru ayen kpahe ekẹtẹkẹtẹ.

¹⁹Ọ da ta kẹ imighele rọye na, Wa karọ kẹ vwẹ; nighe, me vwọ kpahe ovwan. Ẹkẹvuọvo ọ ta kẹ ọshare rọye Nabal na-a.

²⁰Rọ vwọ gua vwẹ enu rẹ ekẹtẹkẹtẹ na re, ro rhi vwo te otọ rẹ ugbenu na, nighe, Devid vẹ ihwo rọye rọ yan bro cha; ọda vwa ayen.

²¹Asakiephana Devid tare jovwo, Uyota, ke me de rhẹrẹ obo rẹ ohwo nana vwori na kufia ghevweghe vwẹ obo agbwa, rẹ obo ro vwori ejobi de je ghwọrọ; ọda vwẹ umwemwu hwa osa kẹ vwẹ.

²²Ọghẹnẹ ru ọtiọye kẹ Devid ọ rọ tobọ nọ ọtiọye re bẹsiẹ rẹ ọke vwo rhie ohwo rọye ọvo de ji chekọ.

²³Ọke rẹ Abigail vwọ mrẹ Devid, ọ da fiavwoma, wotọ nẹ ekẹtẹkẹtẹ na rhe, o de she bọvwọ opharo rhuotọ vwẹ obaro ri Devid, o de gbe opharo phihọ otọ.

²⁴O de she teyọ awọ rọye ọ da ta, Uyovwi mẹ ọvo, ọrovwovwe, ọye me vwọ ghwa abe na; me rẹ wẹ bikọ jẹ ọmọtẹ wẹn dje ota phihọ orhọn wẹn, re wo nyo ota rẹ ọmọtẹ wẹn.

²⁵Wo jẹn ọrovwovwe davwerhọ rẹ orharhe rẹ ohwo nana, Nabal-l; kidie kirobo rẹ odẹ rọye epha, eriyin ọ epha; Nabal odẹ rọye. eriyin ugheghẹ je vọn evun; ẹkẹvuọvo mẹvwẹ rẹ ọmọtẹ wẹn na mrẹ imighele rẹ ọrovwovwe ji rhe-e.

²⁶Asakiephana, ọrovwovwe, kirobo rẹ Ọrovwohwo herọ na, kirobo rẹ erhi wẹn herọ na, wọ mrẹre nẹ Ọrovwohwo si we nẹ abe rẹ ọbara, ru wọ rha vwẹ obọ wẹn reihri na, gbe je ivwighrẹ wẹn kugbe otu re guọnọ ọrovwovwe umwemwu ruẹ dia kerẹ Nabal.

²⁷Biko gbe je a vwẹ ọmọko nana rẹ odibo wẹn phare rhe ọrovwovwe na kẹ imighele ri nene ọrovwovwe na.

²⁸Biko vwo ghovwo oruchọ rẹ ọmọtẹ wẹn; vwọ ọ rẹ uyota Ọrovwohwo cha kẹ wẹ uwevwi re bẹdẹ, fikiridie ofovwi ri wo phiẹ na Ọrovwohwo wo phio kẹ; a rha sa mrẹ umwemwu vwẹ evun wẹn uchọke wọ dia akpọ na krite-e.

²⁹Ọ da dianẹ ihwo vrẹn vwọ so wẹ re da guọnọ owẹ hwe, arhọ rẹ ọrovwovwe na ke kron phihọ ekrun rẹ ihwo re sivwe ka vwọ k, Ọrovwohwo Ọghẹnẹ wẹn rọ vwẹ ẹro te; arhọ rẹ ivwighrẹ wẹn ke fa kufia kerẹ ohwo rọ fa udoroku.

³⁰ọke rẹ Ọrovwohwo de ru kẹ ọrovwovwe emu esiri nana ejobi ra ta kpahọ owẹ na, ra da vwẹ owẹ ma ovie vwẹ enu rẹ Izrẹl

³¹ọrovwovwe gbe mrẹ emu rẹ uvwerhe-e eyẹ obo ri kpokpo udu-u, kidie wo sun ọbara te otọ ekueku-u eyẹ ọrovwovwe reihri kẹ oma rọye-e. Ọke rẹ Ọrovwohwo da kẹ wẹ erhuvwu rọye, gba karohọ ọmọtẹ wẹn.

³²Devid da ta kẹ Abigail, Ebruba kẹ Ọrovwohwo, Ọghẹnẹ rẹ Izrẹl, ro ji we rhe vwọ vwa vwẹ vwẹ ẹdọke ri nonẹ!

³³Ebruba kẹ ọhọ wẹn, ebruba kẹ wẹn, rọ da vwẹ obọ ji mi vwo jẹ abe rẹ ọbara ẹriọ nonẹ na, ri mi vwo jẹ obọ mẹ ẹ vwọ reihri!

³⁴Kidie uyota kirobo rẹ Ọrovwohwo Ọghẹnẹ rẹ Izrẹl herọ na, rọ djẹ vwẹ nẹ me wan wẹ oma-a, ru wo vwo bru okpakpa rhe vwa vwẹ, uyota bẹsiẹ rẹ ọke vwo rhie ọshare ọvo dede gbi chekọ ki Nabali-i.

³⁵Etiyin Devid de mie obo rọ ghwa rhe; ọ da ta kẹ, Yanran kpo uwevwi wẹn egbẹrhẹnẹdẹ. Nighere, mi nyo obo ru wọ tare, orẹ re wọ rẹ vwẹ mi nyori.

³⁶Abigail de bru Nabal rhe; e vwo ni, ọ ra re orẹ vwẹ uwevwi rọye, kerẹ orẹ rẹ ovie. Oma ro mu Nabal vwerha, kidie idi re muo; ọtiọye na ọ rha ta ota ọvuọvo kẹ bẹsiẹ rẹ ọke vwo rhie-e.

³⁷Vwẹ irhiọke, rẹ udi vwo ni Nabal ẹro nu, aye rọye da ta eta nana ejobi kẹ, udu rọye de ghwu mudia, kpehre kerẹ oragha.

³⁸Kerẹ emu rẹ ẹdẹ ihwe ọfa Ọrovwohwo da ghwiẹ Nabal; o de ghwu.

³⁹Ọke ri Devid vwo nyo nẹ Nabal ghwuru, ọ da ta, Ebruba kẹ Ọrovwohwo rọ reihri rẹ oja ri Nabal vwọ re vwẹ rọ nẹrhẹ odibo rọye jẹ umwemwu ẹruo; Ọrovwohwo de krun umwemwu ri Nabal nyẹ uyovwi rọye. Devid de ji ikọn ra riẹriẹ Abigail, rere o vwo ru aye rọye.

⁴⁰Ọke rẹ idibo ri Devid vwo bru Abigail rhe vwi Kamẹl, ayen da ta kẹ, Devid ri ji avwanre rhe re reyọ owẹ vwọ rhe vwọ rọvwọ.

⁴¹O vrẹnri ọ da vwẹ uyovwi te otọ, ọ da ta, Nighe, ọmọtẹ wẹn ọye odibo rọ hworhẹ awọ rẹ idibo rẹ ọrovwovwe.

⁴²Kpata kpata Abigail vrẹnri ọ da ro ekẹtẹkẹtẹ rọye, ọ vẹ emetẹ iyori ri gbe odibo kẹ; ọda vwọ kpahe idibo ri Devid, o de rhi hirhe phihọ aye rọye.

⁴³Devid da reyọ Ahinoam ri Jezreel; ayen ivẹ na de rhi hirhe phihọ eya rọye.

⁴⁴Sọl da vwi Mikal ọmọtẹ rọye rọ kẹ Devid jovwo, vwọ kẹ Palti ọmọ ri Laish, rẹ ohwo ri Gallim.